ហេតុអ្វីការសង្ស័យលើខ្លួនឯង ឬមិនទុកចិត្តលើខ្លួនឯង នឹងធ្វើឲ្យជីវិតអ្នកអន្តរាយ?
តើអ្នកមានដឹងខ្លួនទេថា មេរោគដ៏គ្រោះថ្នាក់មួយប្រភេទកំពុងតែលួចរស់នៅក្នុងខ្លួនអ្នក និងពង្រីកឥទ្ធិពលរបស់វាយ៉ាងស្ងាត់ៗរហូតដល់ពេលមួយនឹងគ្រប់គ្រងលើជីវិតអ្នកទាំងស្រុង ? តើវាជាមេរោគប្រភេទអ្វី ? ចុះវាមានដើមកំណើតចេញមកពីណា ? ហើយឥទ្ធិពលរបស់វាប៉ះពាល់ដល់អ្នកយ៉ាងដូចម្ដេចខ្លះ ?
មេរោគនោះគឺជាកង្វះភាពជឿជាក់លើខ្លួនឯងនោះឯង។ មានពេលខ្លះអ្វីដែលពិបាកបំផុតគឺជាការលុតដំការគិតរបស់ខ្លួនឲ្យនៅតែរក្សាគោលជំហរទៅរកសុទិដ្ឋិនិយមនៅក្នុងកណ្ដាលមហាសមុទ្រមិនឃើញកោះត្រើយនិងពោរពេញដោយការភិតភ័យទាំងឡាយ។ មេរោគដែលមានឈ្មោះថាកង្វះភាពជឿជាក់លើខ្លួនឯងមួយនេះ បើអ្នកបណ្ដោយវាឲ្យបន្តរស់នៅក្នុងខ្លួនរបស់អ្នក នោះក្នុងដំណាក់កាលណាមួយ ឥទ្ធិពលរបស់វានឹងរីកធំឡើងកាន់តែខ្លាំងរហូតដល់អាចត្រួតត្រាលើជីវិតអ្នកបាន។
អ្នកមិនអាចរំពឹងទុកលទ្ធផលវិជ្ជមានពីខ្លួនឯងបានដោយការគិតរបស់អ្នកត្រូវបានបំពុលដោយភាពអវិជ្ជមានបាននោះឡើយ ជាពិសេសនៅពេលអ្នកមិនជឿជាក់លើសមត្ថភាពនិងសក្ដានុពលដែលខ្លួនឯងអាចឈានទៅដល់។ បើអ្នកចង់បង្កើតការផ្លាស់ប្ដូរវិជ្ជមានចំពោះជីវិតរបស់អ្នក ទាល់តែអ្នកត្រូវចាប់ផ្ដើមដោយផ្លាស់ប្ដូរការគិតរបស់អ្នកជាមួយនឹងការមើលឃើញទៅលើអ្វីៗជុំវិញខ្លួនក្នុងផ្លូវល្អជាមុនសិន។ យ៉ាងណាមិញ អ្នកក៏ត្រូវដឹងផងដែរថាមូលហេតុអ្វីខ្លះដែលបង្កជាកង្វះការជឿទុកចិត្តលើខ្លួនឯងនេះ។
មជ្ឈដ្ឋានរស់នៅរបស់មនុស្សម្នាក់ បង្កើតនូវអត្តចរិតរបស់ពួកគេឡើង។ ឬអាចនិយាយម្យ៉ាងទៀតថា អ្វីៗដែលនៅជុំវិញខ្លួនរបស់អ្នក មានឥទ្ធិពលទៅលើការគិតរបស់អ្នក។ នៅពេលការគិតរបៀបណាមួយត្រូវបានបង្កើតឡើងជាច្រើនដង វានឹងក្លាយជាទម្លាប់ ហើយចុងក្រោយក៏ឆ្លាក់ច្នៃជាអត្តចរិតរបស់អ្នកឡើង។ បើអ្នករស់នៅក្នុងគ្រួសារ ឬសង្គមដែលបង្រៀនអ្នកឲ្យមើលឃើញទៅលើការប្រព្រឹត្តកំហុសជារឿងអាក្រក់ នោះនៅពេលអ្នកធំឡើងផ្នត់គំនិតរបៀបនេះ នឹងចាក់ឫសដ៏ជ្រៅហើយបង្កជាការបន្ទោសលើខ្លួនឯងពេលមានកំហុស និងធ្វើឲ្យអ្នកខ្វះទំនុកចិត្តលើខ្លួនឯងក្នុងការសម្រេចកិច្ចការក្រោយៗទៀត។ ការប្រៀបធៀបខ្លួនឯងជាមួយអ្នកដទៃក៏ជាមូលហេតុនៃការកកើតមេរោគខ្វះជំនឿចិត្តលើខ្លួនឯងដែរ។
តាមពិតស្មារតីភ្ញាក់រលឹកចេះយកខ្លួនឯងទៅប្រៀបធៀបនឹងអ្នកដទៃគឺជាតម្លៃដ៏ល្អខ្ពង់ខ្ពស់មួយដែលមនុស្សម្នាក់ៗគួរមាន។ ប៉ុន្តែអ្វីដែលពួកគេទទួលបានក្រោយពីការប្រៀបធៀបគឺជារឿងផ្សេងគ្នា។ អ្នកខ្លះអាចឆ្លុះបញ្ចាំងឃើញពីចំណុចខ្វះខាតរបស់ខ្លួន និងមើលឃើញវាជាឱកាសក្នុងការកែលម្អឲ្យល្អប្រសើរឡើងវិញ។ ផ្ទុយទៅវិញ អ្នកខ្លះមិនគិតបែបនោះទេ ពួកគេបែរជាបំបាក់ទឹកចិត្តខ្លួនឯងជាមួយនឹងភាពខ្វះខាតរបស់ខ្លួន និងមិនបានធ្វើអ្វីជាប្រយោជន៍សម្រាប់កែប្រែឲ្យល្អឡើងវិញឡើយ។ ពេលឧបសគ្គលេចមុខឡើងទើបអ្នកដឹងថាអ្វីដែលសំខាន់បំផុត ពេលខ្លះគឺជាកម្លាំងចិត្តដែលពោរពេញដោយថាមពលដ៏ខ្លាំងក្លា សម្រាប់ប្រយុទ្ធនឹងសង្គ្រាមជីវិត។ ភាពជឿជាក់លើខ្លួនឯង ត្រូវតែក្លាយមកជាអត្តសញ្ញាណប្រចាំខ្លួនអ្នក ដើម្បីសម្រេចនូវភាពជោគជ័យបាន៕
ប្រែសម្រួល៖ ស្រីពៅ ប្រភព៖ lifehack
