មេរៀន៤យ៉ាងអំពីចំណេះដឹងផ្នែកហិរញ្ញវត្ថុរបស់លោក Robert Kiyosaki
«ហេតុអ្វីសិស្សនិទ្ទេសAធ្វើការឲ្យសិស្សនិទ្ទេសC» ? វាមិនត្រឹមតែជាចំណងជើងសៀវភៅដ៏ល្បីល្បាញមួយក្បាលរបស់ Robert Kiyosaki ប៉ុណ្ណោះទេ លើសពីនេះទៅទៀតវាថែមទាំងជាសំណួរដ៏គួរឲ្យចាប់អារម្មណ៍មួយសម្រាប់លាតត្រដាងឲ្យឃើញពីចន្លោះប្រហោងនៃចំណុចខ្វះខាតដែលបង្កប់នូវក្រោមប្រព័ន្ធអប់រំក្នុងសាលាដែលគ្រប់គ្នាតែងមើលឃើញតែម្យ៉ាងអំពីភាពល្អឥតខ្ចោះរបស់វារាប់ជំនាន់កន្លងមក។
បើអ្នកធ្លាប់ស្គាល់ឬបានអានសៀវភៅភាគ «ឪពុកអ្នកមានបង្រៀនកូនអ្នកក្រ» នោះប្រាកដណាស់ថាអ្នកស្គាល់ដល់អ្នកផ្ដួចផ្ដើមនិពន្ធសៀវភៅនេះគឺលោក Robert Kiyosaki។ គាត់ជាសហគ្រិន វិនិយោគិន អ្នកនិយាយបំផុសទឹកចិត្ត និងអ្នកបង្រៀនចំណេះដឹងផ្នែកហិរញ្ញវត្ថុពោរពេញដោយបទពិសោធន៍ក្រាស់ក្រែលមួយរូប។ តើអ្នកជឿទេថា បុរសសញ្ជាតិអាមេរិកជប៉ុនដែលជាម្ចាស់ក្រុមហ៊ុន Rich Dad Company and Cashflow Technologies, Inc.រូបនេះ ធ្លាប់បរាជ័យជាមួយនឹងការក្ស័យធននូវក្រុមហ៊ុនរបស់លោកចំនួន២រហូតដល់ថ្នាក់ត្រូវអត់ផ្ទះនៅរួចមកហើយ ? អ្នកជំនួញដែលមានទ្រព្យសម្បត្តិដ៏ច្រើនលានដុល្លាររូបនេះដែរ បានមើលឃើញពីអ្វីដែលធ្វើឲ្យប្រព័ន្ធអប់រំបង្កើតឲ្យសិស្សនិទ្ទេសAធ្វើការឲ្យសិស្សនិទ្ទេសC ហើយខាងក្រោមនេះគឺជាចំណេះដឹងសំខាន់ៗពាក់ព័ន្ធនឹងហិរញ្ញវត្ថុដែលអ្នកអាចនឹងយល់ថាមានតម្លៃបំផុតសម្រាប់អ្នក។
១) កុំធ្វើការដើម្បីលុយ តែត្រូវឲ្យលុយមកធ្វើការឲ្យអ្នកវិញ៖ Robertបាននិយាយថា «មូលហេតុដ៏ចម្បងមួយដែលធ្វើឲ្យមនុស្សមានបញ្ហាហិរញ្ញវត្ថុ គឺដោយសារតែពួកគេចំណាយពេលជាច្រើនឆ្នាំនៅក្នុងសាលាដោយមិនបានរៀនអ្វីសោះពីលុយ។ លទ្ធផលគឺថាមនុស្សនាំគ្នារៀនធ្វើការដើម្បីលុយ ប៉ុន្តែមិនដែលរៀនឲ្យលុយមកធ្វើការឲ្យពួកគេវិញនោះទេ»។
២) រៀនពីការរកចំណូលអកម្ម៖ ផ្អែកតាមម្ចាស់ជំនួញRich Dad Companyរូបនេះ ប្រាក់ចំណូលមានពីរប្រភេទគឺ ប្រាក់ចំណូលបែបសកម្មនិងប្រាក់ចំណូលបែបអកម្ម។ ភាពខុសគ្នារវាងប្រភពប្រាក់ចំណូលទាំងពីរនេះស្ថិតនៅត្រង់ថា បែបសកម្ម បើអ្នកធ្វើការ១ម៉ោង អ្នកនឹងទទួលបានប្រាក់១ដុល្លារ។ វាមានដែនកំណត់ និងទាមទារឲ្យអ្នកលះបង់ថាមពលនិងពេលវេលាដើម្បីទទួលបានចំណូល ដូចជាម្ចាស់អាជីវកម្មតូចៗផ្ទាល់ខ្លួន ឬក៏អ្នកជំនាញអាជីពមានគ្រូពេទ្យជាដើម។ ផ្ទុយទៅវិញ ប្រាក់ចំណូលបែបអកម្ម មិនអាស្រ័យទៅលើអ្នកនោះទេ វាជារបៀបដែលលុយធ្វើការឲ្យអ្នក តួយ៉ាងដូចជាវិនិយោគិន ឬម្ចាស់អាជីវកម្មធំៗជាដើម។ បើអ្នករកចំណូលតាមប្រភពសកម្ម នោះអ្នកនឹងមិនមានសេរីភាពនោះឡើយ។
៣) រៀនសូត្រពីចំណេះដឹងផ្នែកហិរញ្ញវត្ថុ៖ គាត់បាននិយាយថា មូលហេតុដែលបណ្ដាលឲ្យសិស្សនិទ្ទេសAមួយចំនួនដូចជា អ្នកជំនាញខាងធនាគារ គ្រូពេទ្យ និងគណនេយ្យករ តែងមានវិបត្តិហិរញ្ញវត្ថុនោះក៏ដោយសារនៅក្នុងសាលាពួកគេត្រូវបានបង្វឹកឲ្យផ្ដោតទៅលើជំនាញដែលមានលក្ខណៈអាជីពចំពោះមុខវិជ្ជាជាក់លាក់របស់ពួកគេ ដែលមិនមែនជាជំនាញផ្នែកហិរញ្ញវត្ថុ។ ផ្ទុយទៅវិញ ចំណេះដឹងផ្នែកហិរញ្ញវត្ថុបែរជាត្រូវបានឪពុកម្ដាយក្រីក្របង្រៀន ដែលតែងប្រាប់ពួកគេឲ្យប្រឹងប្រែងរៀននៅសាលា ដើម្បីទទួលបានលទ្ធផលសិក្សាល្អ និងមានការងារល្អប្រាក់ខែខ្ពស់។ បើដូច្នេះ តើពួកគេម្ដេចនឹងអាចមានសេរីភាពផ្នែកហិរញ្ញវត្ថុបាន ?
៤) លុយតែម្យ៉ាងមិនអាចធ្វើឲ្យអ្នកក្លាយជាអ្នកមានបានឡើយ៖ Robertលើកឡើងថា «ទ្រព្យសកម្មដ៏មានអំណាចបំផុតដែលពួកយើងមានគឺជាការគិតរបស់អ្នកនោះឯង។ បើវាត្រូវបានបណ្ដុះបណ្ដាលយ៉ាងត្រឹមត្រូវ នោះវានឹងបង្កើតនូវទ្រព្យសម្បត្តិដ៏ច្រើនមហាសាលឲ្យអ្នក»។ ត្រង់នេះគាត់ចង់សំដៅទៅលើភាពវៃឆ្លាតផ្នែកហិរញ្ញវត្ថុនោះឯង។ មិនមែនជាលុយ មាស ផ្ទះសម្បែងដីធ្លី ដែលធ្វើឲ្យអ្នកមាននោះទេ តែវាជាអ្វីដែលអ្នកដឹងអំពីលុយ មាស ផ្ទះសម្បែងដីធ្លីនោះទៅវិញទេ ដែលពិតធ្វើឲ្យអ្នកមានបាន៕
ប្រែសម្រួល៖ ស្រីពៅ
ប្រភព៖ www.theinspiringjournal.com
