ហេតុផលសំខាន់ៗ ដែលនាំឲ្យមនុស្សដាច់ចិត្តធ្វើអត្តឃាត (សម្លាប់ខ្លួន)
នៅលើលោកនេះ គ្មានអ្វីដែលនៅឋិតថេរជាអមតនោះទេ ឯជីវិតរបស់មនុស្សក៏ដូចគ្នាដែរ ពោរពេញទៅដោយភាពមិនប្រាកដប្រជាថានឹងត្រូវស្លាប់ពេលណា។ អ្នកខ្លះស្ទើរតែមានឱកាសបានឃើញពន្លឺនៃពិភពលោកទៅហើយ ក៏បែរជាមិនបានសម្រេចតាមបំណងដោយហេតុផលមួយចំនួន ឯអ្នកខ្លះមានជីវិតរស់រានមកហើយ តែបែរជាចង់បញ្ចប់វាដោយមិនទាន់បានសាងប្រយោជន៍និងតម្លៃសម្រាប់ជីវិតរបស់ខ្លួន និងមនុស្សជាតិ។
ពំនោលសាសនាមួយបានពោលថា៖«ខាងលើបែបណា ខាងក្រោមក៏នឹងបែបនោះ។ ខាងក្នុងបែបណា ខាងក្រៅក៏នឹងបែបនោះដែរ»។ អត្ថន័យនៃឃ្លាមួយនេះចង់បង្ហាញថា មនុស្សគិតបែបណា ពួកគេនឹងក្លាយជាបែបនោះ ស្ថានភាពគ្រប់យ៉ាងនៅក្នុងជីវិតរបស់បុគ្គលម្នាក់ គឺជាលទ្ធផលនៃការគិតរបស់ពួកគេនោះឯង។ ឯមនុស្សធ្វើអត្តឃាតខ្លួនឯង ក៏ដោយសារព្រលឹងរបស់ពួកគេត្រូវបានបំពុលដោយគំនិតអវិជ្ជមានជ្រួតជ្រាបគ្របដណ្ដប់ពួកគេ ដោយមិនអាចគ្រប់គ្រងខ្លួនឯងបាន។ ការធ្វើអត្តឃាតរបស់មនុស្ស អាចស្ថិតនៅក្នុងចំណោមមូលហេតុខាងក្រោមនេះ៖
១) សេចក្ដីទុក្ខក្រៀមក្រំ៖ ដំណើរជីវិតរបស់មនុស្សជាធម្មតាមានឡើងមានចុះ មិនទៀងថានឹងរីករាយគ្រប់ពេលឬក្រៀមក្រំគ្រប់ពេលនោះដែរ ដូច្នេះអារម្មណ៍និងការគិតរបស់មនុស្សក៏ដូចគ្នាដែរ។ ដោយឡែក សម្រាប់មនុស្សមួយចំនួន ពួកគេតែងមើលឃើញជីវិតស្ថិតនៅក្នុងទីឃុំឃាំងដ៏ងងឹត មិនមានច្រកចេញសម្រាប់បញ្ហាគ្រាំគ្រាចិត្តទាំងឡាយ ធ្វើឲ្យពួកគេមិនមានសេរីភាពផ្លូវចិត្ត ដែលតាមពិតពួកគេជាអ្នកឃុំឃាំងខ្លួនឯងនោះឯង។ ឃ្លារបស់ផ្លាតុង ទស្សនវិទូក្រិកបុរាណមួយរូបមានសេចក្ដីថា "គេមិនមានសេរីភាពនោះទេ បើពួកគេមិនអាចសូម្បីតែគ្រប់គ្រងចក្រភព (ចិត្ត) របស់ខ្លួនឯងបាននោះ"។ ចុងក្រោយមនុស្សទាំងនេះក៏ជ្រើសរើសការស្លាប់ដើម្បីបញ្ចប់រាល់បញ្ហា ដោយអត្តឃាតខ្លួនឯង។
២) ពួកគេមានអារម្មណ៍ខុសនឹងខ្លួនឯង៖ អ្នកទាំងនេះតែងរំពឹងទុកនូវលទ្ធផលដ៏ល្អឥតខ្ចោះសម្រាប់ខ្លួនឯងជានិច្ច ហេតុនេះនៅពេលពួកគេមិនសម្រេចបានទៅតាមការរំពឹងទុកនោះ វិប្បដិសារីនិងអារម្មណ៍ខុសឆ្គងមកលើខ្លួនឯង នឹងចូលទៅដល់ទីជម្រៅចិត្តរបស់ពួកគេ។ ពួកគេតឹងតែងចំពោះខ្លួនឯងជាខ្លាំង និងមានសម្ពាធពីអារម្មណ៍ដែលមិនលើកលែងឲ្យខ្លួនឯង រហូតធ្វើឲ្យពួកគេមានបញ្ហាចិត្តសាស្ត្រ និងយកការធ្វើអត្តឃាតខ្លួនឯងជាជម្រើសចុងក្រោយនៃជីវិត។ ត្រង់នេះការស្លាប់របស់សិស្សជប៉ុនជាច្រើននាក់កន្លងមក នៅពេលពួកគេមិនអាចសម្រេចបានលទ្ធផលល្អនៅក្នុងសាលា អាចធ្វើជាឧទាហរណ៍បង្ហាញអ្នកបាន។
៣) ពួកគេមានចំណង់នៃចិត្តសម្រាប់ការស្លាប់៖ មនុស្សដែលធ្វើអត្តឃាតខ្លួនឯងដោយមូលហេតុនេះ តែងតែទទួលរងសម្ពាធផ្លូវចិត្តពីបញ្ហាជីវិតប្រៀបដូចជាមានអម្រែកពិភពលោកដ៏ធំនៅលើស្មាពួកគេដូច្នោះ។ ពួកគេតែងព្យាយាមគ្រប់គ្រងជោគវាសនាជីវិតរបស់ខ្លួន និងប្រឹងប្រែងដោះស្រាយបញ្ហាគ្រប់បែបយ៉ាងដោយពួកគេផ្ទាល់។ ពួកគេយល់ថាមិនអាចរើបម្រះរួចពីអម្រែកដែលកំពុងគាបសង្កត់ពួកគេ ហើយក៏សម្លាប់ខ្លួនឯងដើម្បីបញ្ចប់អ្វីៗគ្រប់យ៉ាងទៅ៕
ប្រែសម្រួល៖ ស្រីពៅ
ប្រភព៖ www.psychologytoday.com
