បើមានចំណុចសំខាន់ៗទាំងនេះ មានន័យថា អ្នកមាននិស្ស័យធ្វើជាគ្រូបង្រៀនតាំងពីកំណើត
មិនមែនមនុស្សគ្រប់គ្នាអាចក្លាយជាគ្រួបង្រៀនបាននោះទេ (ជាពិសេសគ្រួដែលពូកែ)គឺវាអាស្រ័យទៅលើចំណង់ចំណូលចិត្ត និង ទេពកោសល្យពីកំណើត ដែលនាំឲ្យពេលក្លាយជាគ្រូបង្រៀននោះ គឺពោរពេញទៅដោយសិល្បៈក្នុងការបង្រៀន ឬ វិធីសាស្រ្តក្នុងការបង្រៀនល្អៗ ដែលធ្វើឲ្យសិស្សមានអារម្មណ៍ថា មិនស្តាយពេល ឬ ធុញពេលចូលថ្នាក់ម្តងៗ។ ខាងក្រោមជាចំណុចដែលអាចបញ្ជាក់ថា អ្នកមាននិស្ស័យក្នុងការធ្វើជាគ្រូបង្រៀន៖
១) អ្នកមានចំណង់ក្នុងការរៀននិងចែករំលែក៖ ប្រសិនជាអ្នកចូលចិត្តអាននិងធ្វើការស្រាវជ្រាវទៅលើប្រធានបទណាមួយ ហើយអ្នកចូលចិត្តចែករំលែកព័ត៌មានទៅកាន់អ្នកដទៃទៀតនោះ អាជីពជាគ្រូបង្រៀនពិតជាស័ក្ដិសមសម្រាប់អ្នក។
២)ពេលប្រឈមនឹងបញ្ហាឬឧបសគ្គ អ្នកមិនដែលរារែក៖ អាជីពជាគ្រូបង្រៀនជួបប្រទះនិងដោះស្រាយនូវបញ្ហាជាច្រើន មិនថាបញ្ហាក្នុងថ្នាក់និងក្រៅថ្នាក់។ លើសពីនេះទៅទៀត គ្រូបង្រៀនក៏ត្រូវដោះស្រាយបញ្ហាជាមួយអាណាព្យាបាលនិងម្ចាស់សាលាផងដែរ។ វាអាចជាឧបសគ្គដែលអាចហួសពីការរំពឹងទុក។ ដូច្នេះប្រសិនបើ អ្នកជាមនុស្សដែលមិនរារែកនៅពេលជួបបញ្ហាផ្សេងៗនោះ មានន័យថា វាជាចំណុចមួយដែលអ្នកអាចធ្វើជាគ្រូបាន។
៣) ពូកែជំរុញទឹកចិត្ត៖ អ្នកជាមនុស្សវិជ្ជមានដែលតែងតែមើលឃើញឱកាសក្នុងការរីកចម្រើន។ មិនតែប៉ុណ្ណោះ អ្នកជំរុញទឹកចិត្តអ្នកដទៃឲ្យបន្តធ្វើកិច្ចការផ្សេងៗ។ ជាទូទៅ សិស្សតែងតែមានអារម្មណ៍បាក់ទឹកចិត្តនៅពេលដែលជួបបញ្ហាផ្សេងៗក្នុងពេលរៀន ជាពិសេសចំណុចដែលរៀនមិនយល់ ដូច្នេះហើយ បើអ្នកពូកែខាងលើកទឹកចិត្តសិស្សឲ្យបន្តសិក្សាទៀតនោះ គឺមានន័យថា អ្នកពិតជាស័ក្តិសមជាគ្រូពិតប្រាកដ។
៤)អាចធ្វើការច្រើនម៉ោងដោយមិនធុញ៖ អាជីពជាគ្រូបង្រៀនមិនមែនធ្វើការពីថ្ងៃច័ន្ទដល់ថ្ងៃសុក្រនោះទេ អ្នកត្រូវរៀបចំការប្រលង រកលំហាត់ឲ្យសិស្ស រៀបចំកម្មវិធីសិក្សា។ល។ មានពេលខ្លះ អ្នកគ្មានសូម្បីតែថ្ងៃសៅរ៍និងថ្ងៃអាទិត្យ។ តែទោះបីជាយ៉ាងណាក៏ដោយ អ្នកនៅតែពេញចិត្តនិងសប្បាយរីករាយនឹងការងារ។ ដូច្នេះហើយ បើអ្នកជាមនុស្សដែលមិនរារែក ឬ ធុញទ្រាន់ចំពោះការធ្វើការច្រើនម៉ោងនោះ គឺមានន័យថា អ្នកអាចធ្វើជាគ្រូបង្រៀនបាន៕
ប្រែសម្រួល៖ អុឹង មុយយូ ប្រភព៖ www.kangan.edu.ai
