ក្នុងនាមជាឪពុកម្ដាយនិងបងគេតើអ្នកគួរធ្វើអ្វីខ្លះ ដើម្បីឲ្យកូនៗនិងប្អូនៗ រស់នៅប្រកបដោយភាពរីករាយ?
ជឿជាក់ថា ឪពុកម្ដាយ គ្រប់រូប ក៏ដូចជាបងៗ តែងចង់ឃើញក្មេងៗ នៅក្នុងផ្ទះ រស់នៅដោយសប្បាយរីករាយ មិនចេះឈ្លោះប្រកែកគ្នា ហើយកាន់តែស្រឡាញ់គ្នាខ្លាំង។ ហេតុនេះហើយ វិធីទាំងនេះហើយ ដែលអ្នកគួរតែអនុវត្ត៖
១) ផ្ដល់ពេលវេលាឲ្យពួកគេបានលេងសប្បាយ៖ ទោះបីជាការរៀនសូត្រ ការធ្វើកិច្ចការផ្ទះសាលា គឺជាកាតព្វកិច្ច របស់ពួកគេពិតមែន ។ តែក្មេងៗ ក្នុងវ័យនេះគួរមានពេលវេលាខ្លះដើម្បីលេង ឬធ្វើអ្វីដែលគេចង់ធ្វើ។ ហេតុនេះ អ្នកគួរឧស្សាហ៍ បើកឱកាសឲ្យគេបានទៅលេងខាងក្រៅ ជាមួយបងប្អូនតូចៗ ឬក៏មិត្តភក្ដិខ្លះផង។
២) កុំប្រៀបធៀបពួកគេនឹងក្មេងដទៃ ៖ ចាស់ៗ មួយចំនួន តែងតែប្រៀបធៀបបែបនេះឬក៏បែបនោះ ទៅនឹងក្មេងដទៃ ៗដែលពួកគាត់ស្គាល់។ ពេលខ្លះ ពួកគេមាន នូវអ្វីដែលអ្នកដទៃ គ្មានក៏ថាបាន។ យោងតាមអ្នកស្រាវជ្រាវបានឲ្យដឹងថា « ក្មេងៗ ដែលតែងតែទទួលការប្រៀបធៀប ជាមួយអ្នកដទៃ គឺ ងាយនឹងបាត់បង់ភាពក្លាហាន ព្រមទាំងការជឿជាក់លើខ្លួនឯងណាស់»។
៣) ត្រូវដឹងថាគេខិតខំអ្វីខ្លះ៖ ការដឹងថាតើក្មេងៗ បានខិតខំអ្វីខ្លះ គឺជាផ្នែកមួយជំរុញឲ្យគេខំនូវអ្វីដែលគេកំពុងធ្វើ ដោយមិនបាក់ទឹកចិត្ត។
៤) ផ្ដល់ឱកាសឲ្យគេធ្វើអ្វីដែលចង់ធ្វើ៖ អ្នកត្រូវយល់ថា វាជារឿងល្អប៉ុណ្ណាទៅ នៅពេលក្មេងម្នាក់ចេះចង់ធ្វើអ្វីមួយដោយខ្លួនឯង។ ហេតុនេះ អ្វីដែលអ្នកគួរធ្វើ គឺការលើកទឹកចិត្ត ព្រមទាំងផ្ដល់ឱកាសឲ្យគេធ្វើអ្វីដែលចង់ទៅ។
៥) បង្កើតការចងចាំមួយពោរពេញដោយក្ដីសប្បាយរីករាយ៖ ពេលខ្លះភាពសប្បាយរីករាយ វាមិនអាចកើតឡើង បានដោយមនុស្សតែម្នាក់នោះទេ។ គប្បីកើតចេញឡើងពីគ្រួសារទាំងមូល។ ដូចនេះក្នុងនាមជាឪពុកម្ដាយ និងបងៗ អ្នកគួរចេះបង្កើត ការចងចាំដែលពោរពេញដោយក្ដីសប្បាយរីករាយ និងមានសុភមង្គល ឲ្យបានច្រើន ទើបក្មេងៗ អាចរស់នៅដោយមានស្នាមញញឹមរៀងរាល់ថ្ងៃបាន៕
ប្រែសម្រួល៖ ព្រំ សុវណ្ណកណ្ណិកា ប្រភព៖ www.powerofpositivity.com
