Google នៅសប្ដាហ៍នេះបាន ដាក់ចេញការអភិវឌ្ឍថ្មីមួយ បន្ថែមចូលទៅសេវាកម្ម Project Loon ដែលប្រើបាឡុងហោះធំៗ ហើយវានឹងបន្តធ្វើការហោះជាវដ្ដចុះឡើងជុំវិញផែនដី ដើម្បីផ្ដល់តំណភ្ជាប់អ៊ីនធឺណិត ទៅកាន់តំបន់មួយចំនួន ដែលពិបាកតភ្ជាប់អ៊ីនធឺណិតទៅដល់។
ការអភិវឌ្ឍចុងក្រោយ នៅក្នុងសេវាកម្ម Project Loon នេះ នឹងអាចឱ្យបាឡុងទាំងនោះ ផ្ដល់តំណភ្ជាប់អ៊ីនធឺណិត ក្នុងតំបន់ជាច្រើនជាមួយដំណើរការទៀងទាត់ល្អនៅទីណាដែលត្រូវការ។ ក្បួនច្បាប់ algorithms គឺត្រូវបានប្រើដោយ Project Loon ឥឡូវនេះ គេអាចបង្ហោះឡើងនូវបណ្ដុំបាឡុងមួយចំនួន ធ្វើជាចង្កោម (cluster) គ្របដណ្ដប់លើតំបន់ជាក់លាក់ផ្សេងៗ ដែលមនុស្សត្រូវការអ៊ីនធឺណិត។ សូមទស្សនាវីដេអូពន្យល់ដូចខាងក្រោម៖
https://youtu.be/eHCKL-fCmk8
នៅពេលនេះ បាឡុងរបស់ Google អាចហោះបានក្នុងខ្យល់រយៈពេលអាចច្រើនជាង ៦ខែ ដែលនឹងផ្ដល់ការចែកចាយសេវាអ៊ីនធឺណិតឥតខ្សែ 4G LTE។ ក្រៅពីប្រើសម្រាប់ចែកចាយសេវាអ៊ីនធឺណិត បាឡុង Loon ក៏នឹងត្រូវបានឌីហ្សាញសម្រាប់ប្រមូលយកសញ្ញា (signal) ពីអង់តែនសេវាទូរស័ព្ទនានា (traditional land-based cellular tower)។ បាឡុងក៏អាចប្រតិបត្តិនូវការបញ្ជាប់ daisy-chain configuration ពីអង់តែនក្នុងចម្ងាយឆ្ងាយមួយ ហើយអាចបន្តចែកចាយបណ្ដាក់គ្នាពីបាឡុងមួយទៅបាឡុងមួយទៀតបាន ដើម្បីពង្រីកដែនសេវាអ៊ីនធឺណិតរឹតតែធំឡើង។
បន្ទាប់មក គេនឹងបង្កើតប្រព័ន្ធមួយដើម្បីឱ្យសញ្ញារត់ចូលទៅអង់តែន (វិធីសាស្ត្រ beam signal) របស់ទូរស័ព្ទដៃ មិនថាមនុស្សកំពុងធ្វើដំណើរ ឬនៅតាមផ្ទះនោះទេ គេនឹងអាចប្រើប្រាស់អ៊ីនធឺណិតបាន។ សូមបញ្ជាក់ថា នៅក្នុងដំណាក់កាលធ្វើតេស្តគម្រោង Project Loon កន្លងមក បាឡុងរបស់ Google អាចផ្ដល់ប្រព័ន្ធបណ្ដាញអ៊ីនធឺណិតកម្រិត LTE ជាមួយល្បឿនទាញយក (download) 10Mbps៕
ប្រែសម្រួល៖ រឹទ្ធិរាជ
ប្រភព៖ Google
