ទិដ្ឋភាពនៃការសន្យារបស់អ្នកនយោបាយឥណ្ឌា៖ សន្យាផ្តល់មានតាំងពីឆ្នាំងដាំបាយ កុំព្យូទ័រ អ៊ីនធឺណិត និងបង្គន់អនាម័យ
ជាធម្មតាទេ នៅពេលជិតបោះឆ្នោតម្តងៗ គណបក្សនយោបាយជាច្រើនមិនថា ប្រទេសកំពុងអភិវឌ្ឍន៍ឬប្រទេសជឿនលឿននោះទេ គឺតែងតែសន្យាថា នឹងធ្វើនេះធ្វើនោះ ប្រសិនបើគណបក្សខ្លួនជាប់ឆ្នោត។ ងាកមកនិយាយអំពីទិដ្ឋភាពនៃការសន្យារបស់អ្នកនយោបាយឥណ្ឌាវិញ គឺមានច្រើន ក្នុងនោះ រាប់ទាំងផ្ដល់កុំព្យូទ័រ (Latop) ផល់សេវាអ៊ីនធឺណិតឥតគិតថ្លៃ និង បង្គន់អនាម័យ សម្រាប់គ្រួសារនីមួយៗនៅតាមទីជនបទ។
ការសន្យាបែបនេះ គឺដោយសារតែប្រជាជនឥណ្ឌាភាគច្រើនរស់នៅតាមទីជនបទ និង មានស្ថានភាពក្រីក្រ។ អ៊ីចឹងហើយទើប គណបក្សនយោបាយនៅឥណ្ឌា ប្រើប្រាស់វិធីសាស្ត្រផ្សេងៗដើម្បីជំរុញឲ្យប្រជាជននៅតាមទីជនបទបោះឆ្នោតឲ្យខ្លួន តាមរយៈការសន្យាផ្សេងៗ និង ប្លែកៗ។
គណបក្សBJPរបស់លោកNarendra Modi ដែលបច្ចុប្បន្នជានាយករដ្ឋមន្ត្រីទី១៤របស់ឥណ្ឌា បានសន្យាថានឹងផ្ដល់បង្គន់អនាម័យសម្រាប់គ្រួសារនីមួយៗនៅតាមទីជនបទ ក្នុងរយៈពេល៥ឆ្នាំ ហើយនឹងកុំព្យូទ័រយួដៃ (Latop) ជាមួយនឹងការប្រើប្រាស់អ៊ីនធឺណិតដោយមិនគិតថ្លៃរយៈពេលមួយឆ្នាំពេញ។ លើសពីនេះទៀត គណបក្សនេះក៏បានសន្យាលុបចោលបំណុលសម្រាប់កសិករ និង សន្យាបង្កើតសាកលវិទ្យាល័យចំនួន១០ ហើយប្រើWifi ដោយសេរី។
ដោយឡែកគណបក្សSamajwadi ដែលជាគូប្រជែងរបស់គណបក្សBJPបានសន្យាថា ផ្ដល់ទូរស័ព្ទស្មាតហ្វូនដល់មនុស្សប្រមាណ១០លាននាក់ ហើយរំពឹងថាចំណុចនេះធ្វើឲ្យខ្លួនឈ្នះឆ្នោត។ នេះបើយោងតាមការចុះផ្សាយរបស់សារព័ត៌មានTimes of India ។ លើសពីនេះទៀត គណបក្សនេះក៏សន្យាចែកឆ្នាំងដាំបាយសម្រាប់ស្ត្រី និង សន្យាបញ្ចុះតម្លៃលើសំបុត្ររថយន្តក្រុងផងដែរ។
សម្រាប់អ្នកតាមដានស្ថានការណ៍នៅប្រទេសឥណ្ឌាវិញ យល់ឃើញថា ការសន្យាថានឹងផ្ដល់នេះផ្ដល់នោះ គឺមិនមែនជារឿងថ្មីក្នុងប្រទេសឥណ្ឌានោះឡើយ ហើយជាពិសេសបច្ចុប្បន្នគណបក្សនយោបាយនីមួយៗព្យាយាមស្វែងរកតិកនិកថ្មីៗបន្ថែមទៀត តាមរយៈការសន្យាផ្ដល់គ្រឿងអេឡិចត្រូនិកដល់ប្រជាជនដែលក្រីក្រ ឬ មិនដែលប្រើរបស់ទាំងនោះ។
សូមបញ្ជាក់ថា រដ្ឋសំខាន់ៗចំនួន៥របស់ឥណ្ឌាដែលមានប្រជាជនច្រើនជាងគេនោះ មានដូចជា រដ្ឋUttar Pradesh, Punjab, Goa, Manipur និង រដ្ឋUttarakhand បាននឹងកំពុងចាប់ផ្ដើមការបោះឆ្នោតសភា ដោយធ្វើឡើងចាប់ពីថ្ងៃទី៤ខែ កុម្ភៈ ដល់ថ្ងៃទី៨ខែមិនា ឆ្នាំ២០១៧ ហើយការរាប់សន្លឹកឆ្នោតនឹងធ្វើឡើងនៅថ្ងៃទី១១ខែ មិនា ឆ្នាំ២០១៧៕
ដោយ៖ រតនា វិចិត្រ
