១) ឈប់ពីការរាវរកសេវា (Stop Searching for a signal)
នៅពេលអ្នកស្ថិតនៅតំបន់ខ្សោយសេវា ឬគ្មានសេវាតែម្ដងនោះ ទូរស័ព្ទរបស់អ្នកនឹង ធ្វើការរាវរកសេវាដែលល្អបំផុតមួយ ដូច្នេះវានឹងស៊ីថ្មខ្លាំងជាងធម្មតា។ បើអ្នកគិតថា មិនសូវចាំបាច់នោះទេ អាចសាក flight mode ដើម្បីបញ្ឈប់ការរាវរកសេវានោះ ដើម្បីសន្សំថ្មបានមួយកម្រិត។
២) កុំសាកថ្ម ចាប់ពី ០% ទៅ ១០០%
ក្បូនច្បាប់នៃថ្មប្រភេទ Li-Ion គឺត្រូវរក្សាការសាកថ្មឱ្យនៅត្រឹម ៥០% ឬច្រើនជាងនេះ រាល់ពេលសាកថ្ម។ ប៉ុន្តែកុំសាកថ្ម រហូតទាល់តែគ្រប់ ១០០%។ វាមិនប៉ះពាល់ដល់ថាមពលប្រើប្រាស់អ្វីនោះទេ ប៉ុន្តែនឹងធ្វើឱ្យអាយុកាលប្រើប្រាស់របស់ថ្ម ឆាប់អស់ ឬខូច (lifespan)។ ដូច្នេះ នេះគ្រាន់តែជាសារចែករំលែកបទពិសោធន៍ថ្ម Li-Ion ឱ្យប្រិយមិត្តបានយល់ដឹងប៉ុណ្ណោះ។ ការសាកថ្ម Li-ion ប្រហែលចាប់ពី ៤០% ទៅ ៨០% គឺល្មមស័ក្ដិសម ទាំងរក្សាថាមពលទុកប្រើនៅលើស្មាតហ្វូន និងអាចប្រើប្រាស់ថ្មបានយូរឆ្នាំ តែក៏កុំឱ្យថ្ម ស្រកនៅសល់តិចជាង ២០% នោះ។
៣) បិទមុខងារញ័រ (Vibrate) លើទូរស័ព្ទ
ចាំបាច់ទេ ដែលអ្នកចង់ឱ្យញ័រ? សួរខ្លួនអ្នក ហើយប្រសិនមិនចាំបាច់ទេ គួរតែបិទ ព្រោះនៅពេលអ្នកដាក់ទូរស័ព្ទរោទ៍ គឺមានន័យថា អ្នកពឹកផ្អែកសំឡេងជាជាងលំញ័រ ផ្ទុយគ្នានឹងការបិទសំឡេង ទុកតែញ័រ។
៤) ការប្រើភ្លើង Flash កាមេរ៉ាមិនត្រឹមត្រូវ
ប្រហែលកម្រមានករណីនេះណាស់ យ៉ាងណា យើងគ្រាន់តែបញ្ជាក់ត្រង់នេះបន្តិច។ ភ្លើង Flash គួរបើកនៅពេលអ្នកថតនៅទីខ្សោយពន្លឺ មិនគួរបើក ON ជាប់នោះទេ ព្រោះពេលខ្លះ អ្នកអាចថតរូបនៅទីកន្លែងមានពន្លឺគ្រប់ ប៉ុន្តែមិនបានចាប់អារម្មណ៍បិទវា។ នេះក៏ជាចំណុចស៊ីថ្មខ្លាំងដែរ។
៥) និយាយទូរស័ព្ទ គួររិះថាំថ្មបន្តិច មានន័យថា អ្នកគួរដឹងច្បាស់ថា មិនមានការចាំបាច់អ្វីត្រូវនិយាយទូរស័ព្ទរយៈពេលយូរៗ។ អ្នកគួរនិយាយតែកិច្ចការសំខាន់ និងប្រើពេលខ្លះបំផុតតាមដែលអាចធ្វើបាន។
៦) Bluetooth និង Wi-Fi នៅតែមានអ្នកប្រើខ្លះ មិនយកចិត្តទុកដាក់ ដោយបើកចោល។ គួរមានទម្លាប់បិទចោល បើមិនត្រូវការប្រើនោះ។ មុខងារ GPS ក៏ដូចគ្នា។
៧) កំណត់ពន្លឺអេក្រង់ឱ្យបានត្រឹមត្រូវ និងសមរម្យសម្រាប់ភ្នែករបស់អ្នក។ សាមញ្ញនោះទេ ព្រោះថា បើអ្នកបើកពន្លឺខ្លាំងជ្រុលនៅពេលយប់ ពេលសំឡឹងយូរៗអ្នកនឹងឈឺភ្នែក ឬចាំងភ្នែកខ្លាំងដែលនាំឱ្យប៉ះពាល់ទៅថ្ងៃក្រោយក៏ថាបាន។ គឺមានអ្នកប្រើខ្លះ មិនបានចាប់អារម្មណ៍ឡើយ គេមិនបានកំណត់ឱ្យបានត្រឹមត្រូវនោះទេ។
ដោយ៖ រឹទ្ធិរាជ
ប្រភព៖ wikihow
