គន្លឹះសំខាន់ៗ៥ចំណុចក្នុងការធ្វើជំនួញ ពីមហាសេដ្ឋីជប៉ុននិង ជាពុទ្ធសាសនិក លោក Kazuo Inamori
សហគ្រិនជនជាតិជប៉ុន លោក Kazuo Inamori គឺជាស្ថាបនិករបស់ក្រុមហ៊ុនដ៏ធំរបស់ជប៉ុន២កន្លែង មួយមានឈ្មោះថា Kyocera Corporationជាក្រុមហ៊ុនផលិតគ្រឿងអេឡិចត្រូនិក និងសេរ៉ាមិចចម្រុះជាតិសាសន៍របស់ជប៉ុន និងមួយទៀតមានឈ្មោះថា KDDI Corporation ជាក្រុមហ៊ុនទូរគមនាគមន៍។
មហាសេដ្ឋីរាប់ពាន់លានរូបនេះ ក៏ជាពុទ្ធសាសនិកមួយរូបរបស់ជនជាតិជប៉ុន មិនតែប៉ុណ្ណោះ គាត់មានទស្សនវិជ្ជាប្រចាំខ្លួនសម្រាប់ការគ្រប់គ្រងក្រុមហ៊ុន ដែលគាត់តែងប្រកាន់ខ្ជាប់ប្រកបដោយភាពមានវិន័យ ហើយទស្សនវិជ្ជាទាំងនោះបានដឹកនាំលោកឲ្យឈានមកដល់ចំណុចកំពូលនៃភាពជោគជ័យក្នុងជីវិតរហូតមានថ្ងៃនេះ។ កាន់តែពិសេសជាងនេះទៅទៀត លោកក៏បានចែករំលែកទស្សនវិជ្ជាទាំង៥របស់លោកដូចដែលបានបង្ហាញនៅខាងក្រោមនេះផងដែរ៖
១) សួរខ្លួនឯងពីអ្វីដែលជាកម្លាំងជំរុញចិត្តរបស់អ្នក
ជាការពិតណាស់ មុខជំនួញដែលអាចដឹកនាំសមិទ្ធផលរបស់ខ្លួនឲ្យមានពន្លឺ និងស្ថិតនៅក្នុងជម្រើសទី១របស់អ្នកប្រើប្រាស់បាន ពួកគេទាំងនោះតែងមានចំណុចរួមគ្នាមួយ គឺជាការឲ្យអាទិភាពទៅលើអតិថិជនជានិច្ច ដោយព្យាយាមបំពេញប្រយោជន៍ និងតម្រូវការរបស់អ្នកប្រើប្រាស់។ ទោះជាយ៉ាងណាក៏ដោយ តាមទស្សនវិជ្ជាក្នុងការគ្រប់គ្រងក្រុមហ៊ុនដ៏ជោគជ័យលំដាប់កំពូលរបស់លោកទាំង២ ការបំពេញប្រយោជន៍ឲ្យអតិថិជនតែម្យ៉ាង នៅមិនទាន់គ្រប់គ្រាន់នៅឡើយទេ អ្នកត្រូវប្រកាន់យកគុណធម៌ចំពោះអ្នកដទៃជានិច្ច គឺជាការប្រព្រឹត្តល្អចំពោះអ្នកដទៃនោះឯង។
២) បណ្តុះផ្នត់គំនិតនៃភាពល្អឥតខ្ចោះទៅក្នុងការប្រព្រឹត្តរបស់អ្នក
គាត់បានប្រៀបប្រដូចគម្រងរបស់ផលិតផលទៅនឹងការសាងសង់ស្ពានដ៏រឹងមាំដែលអាចទ្រាំទ្រជាមួយនឹងការរញ្ជួយដីបាន។ ភាពជោគជ័យ៩៩%របស់បុគ្គលម្នាក់ មិនអាចគ្រប់គ្រាន់សម្រាប់ទ្រាំទ្រជាមួយនឹងឧបសគ្គនានាដែលរង់ចាំអ្នកនៅផ្លូវខាងមុខបាននោះឡើយ។ ផ្នត់គំនិតដែលទាមទាររកភាពល្អឥតខ្ចោះសម្រាប់ផលិតផលរបស់អ្នក នឹងធ្វើឲ្យអ្នកខិតខំដុសខាត់ និងអភិវឌ្ឍវាឲ្យកាន់តែល្អឡើងៗពីមួយដំណាក់ទៅមួយដំណាក់ បើទោះជាពេលនេះអ្នកទទួលបានការគាំទ្រ និងលើកសរសើរដែលឆ្លុះបញ្ចាំងពីភាពជោគជ័យនៃសមិទ្ធផលរបស់អ្នកក៏ដោយ។ គាត់ក៏បានបន្ថែមទៀតថា ការទាមទារភាពល្អឥតខ្ចោះពីខ្លួនឯងជារៀងរាល់ថ្ងៃ គឺជារឿងមួយដ៏ពិបាក ប៉ុន្តែនៅពេលអ្នកទម្លាប់ខ្លួនជាមួយវាបានហើយ អ្នកនឹងរស់នៅជាមួយវាបានយ៉ាងងាយស្រួលជាងមុន ហើយវានឹងបង្ហាញឲ្យឃើញនៅក្នុងលទ្ធផលនៃផលិតផលដែលចេញពីការចម្រោះបន្សុទ្ធ និងភាពប្រាកដប្រជារបស់អ្នក។
៣) គិតដូចមនុស្សសុទិដ្ឋិនិយម តែរៀបផែនការដូចមនុស្សទុទ្ទិដ្ឋិនិយម
ការរក្សាបាននូវការគិតដែលព្យាយាមសម្លឹងរកភាពវិជ្ជមាននៅរាល់ស្ថានភាពទាំងឡាយ នៅពេលស្ថាបនានូវគំនិតសម្រាប់ការបង្កើតផលិតផលណាមួយឡើង គឺជារឿងចាំបាច់សម្រាប់ភាពជោគជ័យនៃផលិតផលរបស់អ្នក។ ប៉ុន្តែ នៅពេលដំណើរការណ៍នៃការប្រតិបត្តិចាប់ផ្ដើម អ្នកត្រូវរៀនគិតដូចមនុស្សទុទ្ទិដ្ឋិនិយម ដើម្បីអាចកត់សម្គាល់នូវរាល់ឧបសគ្គរារាំងទាំងឡាយដែលអាចកើតឡើង នោះដំណើរការណ៍របស់អ្នកនឹងឆ្ពោះទៅរកលទ្ធផលវិជ្ជមានជាក់ជាមិនខាន។
៤) ឥរិយាបថ x ការខិតខំប្រឹងប្រែង x សមត្ថភាព
នេះគឺជារូបមន្តរបស់លោក Inamori សម្រាប់គណនាពីលទ្ធផលនៃការងាររបស់នរណាម្នាក់។ រូបមន្តនេះទៀតសោត គឺជាកញ្ចក់ឆ្លុះបញ្ចាំងពីគតិបណ្ឌិតរបស់គាត់ក្នុងការជួលបុគ្គលិកឲ្យមកទទួលខុសត្រូវលើភារកិច្ចរបស់ខ្លួន ព្រោះថាទោះជាបុគ្គលនោះមានសមត្ថភាព រួមផ្សំនឹងការខិតខំប្រឹងប្រែងក៏ដោយ ដរាបណាបុគ្គលនោះមិនមានឥរិយាបថល្អជាប់តាមខ្លួនរបស់ពួកគេទេនោះ វាមិនមានអត្ថន័យអ្វីឡើយ។
៥) កំណត់នូវគោលដៅដែលហួសពីសមត្ថភាពរបស់អ្នក
ទស្សនរបស់លោក Inamori ដ៏មានតម្លៃដែលគួរចងចាំទុក និងប្រែក្លាយវាជាទស្សនសម្រាប់ដឹកនាំជីវិតរបស់អ្នកគឺ បើអ្នកគិតចំពោះជីវិតរបស់អ្នកបែបណា ចុងក្រោយជីវិតរបស់អ្នកនឹងទៅជាបែបនោះទៅតាមការគិតរបស់អ្នក។ គាត់បាននិយាយថា អ្នកត្រូវកំណត់នូវគោលដៅណាដែលអ្នកមិនអាចសម្រេចវាបានក្នុងថ្ងៃនេះ រួចដាក់កាលកំណត់ច្បាស់លាស់មួយសម្រាប់សម្រេចវាចេញជារូបរាងឡើង បន្ទាប់មកប្រឹងប្រែងធ្វើការឲ្យខ្លាំងជាងនរណាៗទាំងអស់៕
ប្រែសម្រួល៖ ស្រីពៅ ប្រភព៖ bloomberg
