គោលគំនិត ៥យ៉ាងជាមូលដ្ឋានគ្រឹះនៃភាពជោគជ័យរបស់សហគ្រិន
មូលដ្ឋាននៃភាពជោគជ័យរបស់សហគ្រិន គឺពឹងផ្អែកទៅលើកត្តាច្រើនយ៉ាង មិនមែនតែទៅលើជំនាញមួយមុខប៉ុណ្ណោះ។ ខាងក្រោមនេះ គឺជាគោលគំនិត ៥យ៉ាងដែលជាមូលដ្ឋានសម្រាប់ភាពជោគជ័យរបស់សហគ្រិន៖
១) មានជំនឿទៅលើខ្លួនឯង និងអាជីវកម្មរបស់អ្នក៖ អ្នកជំនាញផ្នែកទីផ្សារ និងជាស្ថាបនិក BuySellAds លោក Todd Garland បានមានប្រសាសន៍ថា ៖«អ្នកត្រូវតែរឹងប៉ឹង និងអាចបន្តស្ថាបនាអ្វីដែលអ្នកមានជំនឿថា គឺជារឿងអស្ចារ្យនឹងកើតមាននៅពេលអនាគត។ អ្វីដែលអ្នកបង្កើតឡើង មិនមែនសុទ្ធតែជោគជ័យរហូតនោះទេ ប៉ុន្តែការបរាជ័យទាំងនោះនឹងក្លាយជាចំណែកមួយនៃភាគជោគជ័យរបស់អ្នកនៅពេលអនាគត»។ លោក Todd បានចំណាយពេល ៧ឆ្នាំដោយឆ្លងកាត់ការតស៊ូ និងរឿងរ៉ាងលំបាកៗជាច្រើនស្ទើររាប់មិនអស់ទម្រាំមកដល់ថ្ងៃនេះដែលក្រុមហ៊ុនលោកអាចរកចំណូលបាន ១០លានដុល្លារក្នុងមួយឆ្នាំ។
២) គិតបីជំហានទៅមុខ៖ លោក Jessie Shternshus ស្ថាបនិក The ImprovEffect និងជាសហអ្នកនិពន្ធសៀវភៅ CTRL Shift: The Book for Any Day បានថ្លែងថា ៖«ខ្ញុំដើរលើផ្លូវរបស់ខ្ញុំ។ ខ្ញុំមិនលេងអុកនោះទេ ប៉ុន្តែបើខ្ញុំលេងខ្ញុំប្រកាន់គោលការណ៍ដើរបីជំហានទៅមុខ»។ លោកថា ទោះបីជាយើងមិនមែនជាអ្នកលេងអុក ប៉ុន្តែយើងត្រូវចេះប្រៀបធៀបសហគ្រិនភាពទៅនឹងការលេងអុក។ ត្រូវសួរខ្លួនឯងថា តើនឹងមានអ្វីកើតឡើងចំពោះសកម្មភាពដែលអ្នកនឹងធ្វើវាថ្ងៃនេះ?
៣) ធ្វើរឿងដែលលំបាក៖ លោក Josh Pigford ស្ថាបនិកក្រុមហ៊ុន Baremetrics បានថ្លែងដូច្នេះថា ៖«រឿងដែលលំបាក គឺតែងតែជារឿងដែលអ្នកគួរធ្វើបន្ទាប់។ ឱកាស គឺមិនមែនសម្រាប់មនុស្សគ្រប់គ្នានោះទេ ហើយយ៉ាងហោចណាស់ គឺមានតែមនុស្សពីរបីនាក់នោះទេដែលជួបឱកាសនោះ»។ ទស្សនៈរបស់លោក គឺ ចង់ឱ្យលោកអ្នកមានការប្រឹងប្រែងខ្លាំងលើការងារ ហើយចូរគិតថា នៅពេលធ្វើដំបូង កុំរំពឹងលទ្ធផលឥតខ្ចោះឱ្យសោះ។
៤) គិតរឿងធំ និងរឿងតូច៖ លោក Gabriel Weinberg ស្ថាបនិក និងជានាយកប្រតិបត្តិក្រុមហ៊ុន DuckDuckGo បានមានប្រសាសន៍ថា ៖«អ្នកត្រូវតែរៀនគិតរឿងធំ និងតូចព្រមគ្នា។ អ្នកត្រូវតែដើរនៅលើទិសដៅដូចគ្នាស្របទៅនឹងការសម្រេចចិត្តតូចៗប្រចាំថ្ងៃ និងសកម្មភាពធំ និងការសម្រេចចិត្តធំៗរបស់អ្នក»។
៥) បង្កើតសំណាងសម្រាប់ខ្លួនឯង៖ លោក Russ Perry ស្ថាបនិកក្រុមហ៊ុន Design Pickle បានថ្លែងថា ៖«មនុស្សដែលបង្កើតសំណាងសម្រាប់ខ្លួនឯង គឺមិនចាំបាច់គិតពីការទទួលអត្ថប្រយោជន៍ច្រើនជាងអ្នកដទៃនោះទេ។ ប៉ុន្តែគេអាចទទួលអ្វីដែលពួកគេបានប៉ង»។ លោក Russ Perry លើកឡើងថា សម្រាប់រូបលោក លោកបង្កើតសំណាងដូចការគណនាប្រូប៉ាបតាមបែបគណិតវិទ្យាដែរ ដូច្នេះឱកាសនឹងកើតឡើងខ្ពស់ដែរ។
បង្កើតសំណាង លោកចង់សំដៅទៅលើការ សាកល្បងអាជីវកម្មឱ្យបានច្រើន។ ប្រសិនបើអ្នកបង្កើតអាជីវកម្មតែមួយ អាចនឹងជួបបរាជ័យ ដូច្នេះបើអ្នកបង្កើតអាជីវកម្ម ១០ប្រហែលជាមានខ្លះជោគជ័យ និងបរាជ័យ។ នោះហើយគឺជាសំណាង៕
ដោយ៖ រតនៈវិភូ
