អនុវត្តមូលដ្ឋានគ្រឹះទាំង៦នេះ ដើម្បីក្លាយជាមនុស្សមានសិល្បៈក្នុងការចរចាដ៏ជោគជ័យ
ការចរចាជា ចំណុចសំខាន់មួយសម្រាប់ជីវិតប្រចាំថ្ងៃរបស់មនុស្សគ្រប់គ្នា។ មនុស្សដែលពូកែចរចា ជាមនុស្សដែលឆាប់ជោគជ័យ នៅពេលដែលពួកគេត្រូវការអ្វីមួយពីនរណាម្នាក់។ ដើម្បីទទួលបានជោគជ័យក្នុងការចរចាអ្វីមួយ គួរមានចំណុចសំខាន់ៗទាំងនេះ៖
១) ដឹងច្បាស់ពីអ្វីដែលខ្លួនចង់បាន៖ មុនពេលចាប់ផ្ដើមនិយាយ ឬចរចាអ្វីមួយជាមួយនរណាម្នាក់ អ្នកត្រូវតែដឹងច្បាស់ពីវត្ថុបំណងរបស់ខ្លួនជាមុនសិន ព្រោះបើសូម្បីតែខ្លួនឯងមិនច្បាស់លើអ្វីដែលខ្លួនចង់បានផង នោះធ្វើឲ្យដំណើរការជជែក និង ចរចានោះមិនអាចទៅមុខបានយ៉ាងរលូននោះទេ។
២) ដឹងច្បាស់ពីអ្វីដែលភាគីម្ខាងទៀតចង់បាន៖ នៅពេលដឹងថា ខ្លួនអ្នកត្រូវការអ្វីហើយ វាជាពេលដែលអ្នកត្រូវដឹងឲ្យច្បាស់ថា ភាគីម្ខាងទៀតគេចង់បានអ្វី។ ការដឹងច្បាស់អំពីបំណងរបស់ភាគីម្ខាងទៀតនេះ នាំឲ្យមានភាពងាយស្រួលក្នុងការចរចា និង សម្រុះសម្រួលគ្នា និង ទាញចូលចំណុចរួមបានយ៉ាងរហ័ស។
៣) ស្ដាប់ឲ្យបានច្រើនក្នុងពេលនិយាយ៖ ក្នុងពេលនិយាយ និង ចរចាទល់មុខគ្នានោះ អ្នកត្រូវព្យាយាមធ្វើយ៉ាងណារក្សាភាពស្ងៀមស្ងាត់នៅពេលភាគីម្ខាងទៀតនិយាយ ព្រោះការធ្វើបែបនេះ វាជួយឲ្យអ្នកអាចដឹងច្បាស់ពីអ្វីដែលគេចង់បាន ហើយម្យ៉ាងវិញទៀតវាជាការបង្ហាញថា អ្នកជាមនុស្សមានសីលធម៌ និង ចេះគោរពអ្នកដទៃផងដែរ។
៤) និយាយភាសាខ្លីតែខ្លឹម៖ ត្រូវចាំថា រាល់ពេលសម្ដីដែលអ្នកនិយាយ មិនគួរប្រើភាសាឡេះឡោះច្រើនពេកនោះទេ ពោលគឺគ្រប់ពាក្យត្រូវតែមានខ្លឹមសារ ដើម្បីបង្ហាញថា អ្នកជាមនុស្សដែលម៉ត់ចត់។
៥) ត្រូវបង្ហាញពីភាពជឿជាក់ និង ទំនុកចិត្តលើខ្លួនឯង៖ រាល់សកម្មភាពដែលសម្ដែងចេញក្នុងពេល ចរចាគ្នានោះ គឺត្រូវធ្វើឡើងក្នុងរូបភាពដែលធ្វើឲ្យអ្នកដទៃដឹងច្បាស់ថា អ្នកមានភាពជឿជាក់ និង មានទំនុកចិត្តខ្ពស់លើខ្លួនឯង។ បើមិនដូច្នោះទេ នោះអ្នកនឹងបរាជ័យក្នុងការចរចាមិនខាន។
៦) មានព័ត៌មានឬ ទិន្នន័យជុំវិញប្រធានបទឲ្យបានច្រើន៖ ដើម្បីឲ្យគេពិបាកប្រកែកជាមួយអ្នក គឺទាល់តែការនិយាយនោះអមជាមួយដោយឯកសារ និង ភស្តុតាងច្បាស់លាស់។ ដូច្នេះហើយ មុនពេលទៅចរចា អ្នកត្រូវតែចំណាយពេលស្រាវជ្រាវឲ្យបានល្អិតល្អន់ និង ប្រមូលរាល់ព័ត៌មាន និង ទិន្នន័យពាក់ព័ន្ធទៅជាមួយ ដើម្បីជាសំអាង៕
ដោយ៖ អ៊ុន ភក្តី
