អនុវត្តទម្លាប់ល្អៗទាំង៦នេះ ដើម្បីជួយឲ្យការចងចាំរបស់អ្នកមានលក្ខណៈប្រសើរជាងមុន!
ការចងចាំគឺពិតជាមានសារសំខាន់ខ្លាំងណាស់ ក្នុងការសិក្សា និង ការប្រកបកិច្ចការពារផ្សេងៗ សម្រាប់មនុស្សម្នាក់ៗព្រោះបើអន់ផ្នែកចងចាំ នោះប្រាកដជាមានបញ្ហាច្រើនមិនខាន។ ការចងចាំរបស់មនុស្សមួយចំនួន មានការចុះខ្សោយជាលំដាប់ដោយសារតែ វ័យកាន់តែចាស់ និង ទម្លាប់មិនល្អមួយចំនួនផងដែរ។ដើម្បីពង្រឹងឲ្យការចងចាំរបស់អ្នកមានលក្ខណៈល្អប្រសើរ អ្នកគួរអនុវត្តទម្លាប់ល្អៗទាំងនេះ៖
១) បរិភោគអាហារដែលមានប្រយោជន៍៖ បច្ចុប្បន្នអាហារគឺមានលក្ខណៈសម្បូរបែបខ្លាំងណាស់ សម្រាប់មនុស្សជ្រើសរើស។ ទន្ទឹមគ្នានេះ អ្នកគួរតែមានភាពឆ្លាតវៃ ក្នុងការបរិភោគអាហារណាដែលមិនសូវបង្កបញ្ហាច្រើនដល់សុខភាព ប៉ុន្តែវាផ្តល់មកវិញនូវគុណប្រយោជន៍ជាច្រើន ជាពិសេសពពួកបន្លែ និង ផ្លែឈើ។ អ្នកគួរតែព្យាយាមបរិភោគបន្លែ និង ផ្លែឈើឲ្យបានច្រើន ព្រោះវាមានប្រយោជន៍សម្រាប់ខួរក្បាល និង រាងកាយទាំងមូល។
២) បញ្ចៀសការបរិភោគស្រាច្រើន៖ សម្រាប់មនុស្សសម័យថ្មី ទាំងចាស់ និង ក្មេងគឺមាននិន្នាការប្រើប្រាស់គ្រឿងស្រវឹងច្រើន។ ប៉ុន្តែការទទួលទានស្រាច្រើន គឺមិនមែនជារឿងល្អសម្រាប់ការខួរក្បាលរបស់មនុស្សឡើយ ព្រោះវានឹងបណ្ដាលឲ្យការចងចាំចុះខ្សោយជាលំដាប់។ ការបន្តទម្លាប់ទទួលទានស្រាច្រើនជាប្រចាំ នឹងធ្វើឲ្យសុខភាពរបស់អ្នកកាន់តែចុះខ្សោយ ដូច្នេះបើអ្នកចង់ឲ្យសុខភាព និង ការចងចាំល្អ សូមកុំពិសារគ្រឿងស្រវឹងច្រើនពេក។
៣) ហាត់ប្រាណឲ្យទៀងទាត់៖ ការហាត់ប្រាណ គឺពិតជាមានសារសំខាន់ខ្លាំងណាស់ សម្រាប់រាងកាយមនុស្ស ក៏ដូចជាសុខភាពខួរក្បាលផងដែរ។ ប៉ុន្តែមនុស្សមួយចំនួនប្រហែលជា មិនសូវចូលចិត្តការហាត់ប្រាណនោះឡើយ ព្រោះវាធ្វើឲ្យមានអារម្មណ៍ថា នឿយហត់ និង អស់កម្លាំង។ ប៉ុន្តែបើចង់បានសុខភាពល្អ អ្នកមិនគួរខ្លាចការលំបាកបន្តិចបន្តួចប៉ុណ្ណឹងនោះទេ ព្រោះការហាត់ប្រាណ វាផ្តល់គុណប្រយោជន៍ច្រើនលើសលុប ដែលមិនងាយមានអ្វីមិនជំនួសបាន។
៤) ព្យាយាមរៀនសូត្រ និង រម្លឹកឡើងវិញ៖ ខួរក្បាលរបស់មនុស្ស គឺមិនខុសពីកាំបិតនោះទេ ពោលគឺបើមិនប្រើទេប្រាកដជា ប្រើការមិនកើតឡើយ។ ដូច្នេះហើយ អ្នកគួរតែព្យាយាមហ្វឹកហាត់ខួរក្បាលរបស់អ្នកជាមួយនឹងអ្វីដែលថ្មីៗ ហើយរម្លឹកឡើងវិញដើម្បីប្រាកដថា អាចចងចាំបានយូរអង្វែង។ ការធ្វើបែបនេះជាប្រចាំ អ្នកនឹងក្លាយជាមនុស្សម្នាក់ដែលមានការចងចាំល្អ ជាងអ្នកដទៃ។
៥) ធ្វើអ្វីដោយមានរបៀប៖ មិនថា អ្នកមានការចងចាំល្អប៉ុណ្ណាទេ តែបើការងារប្រចាំថ្ងៃរបស់អ្នកមានលក្ខណៈស្មុគស្មាញហួសកំរិតនោះ វានឹងធ្វើឲ្យអ្នកមានអារម្មណ៍មួម៉ៅ និង បណ្ដាលឲ្យការចងចាំចុះអន់ខ្សោយផងដែរ។ ភាពស្មុគស្មាញខ្លះ មិនមែនបណ្ដាលមកពីការងារទាំងនោះវាលំបាកពេកនោះទេ ប៉ុន្តែដោយសារតែការរៀបចំ និង ចាត់ចែងរបស់អ្នកគឺគ្មានរបៀបរៀបរយ។ កាលណាអ្វីៗគ្មានរបៀបរៀបរយ នោះអ្នកប្រាកដជាមិនដឹងថា ត្រូវធ្វើអ្វីមុននោះទេ ជាពិសេសនៅមានកិច្ចការបន្ទាន់។ ដូច្នេះហើយ អ្នកមិនគួរធ្វើអ្វីឲ្យរួចពីដៃនោះឡើយ ពោលគឺត្រូវរៀបចំវាឲ្យមានរបៀប ដើម្បីឲ្យខួរក្បាលរបស់អ្នកមិនធ្វើការធ្ងន់ធ្ងរហួសកម្រិត។
៦) ឆ្លៀតពេលដើម្បីលំហែខួរក្បាល៖ កុំថាឡើយខួរក្បាល សូម្បីតែគ្រឿងម៉ាស៊ីនក៏មានបញ្ហាដែរនៅពេលប្រើវាហួសកម្រិតពេក ។ ដូច្នេះហើយ អ្នកមិនគួរបន្តធ្វើការហួសកម្រិតពេកនោះទេ ព្រោះវានឹងបណ្ដាលឲ្យខួរក្បាលចុះខ្សោយ និង ធ្វើឲ្យការចងចាំអន់ទៅតាមនោះដែរ។ ដោយសារតែបែបនេះហើយ អ្នកគួរតែចេះលៃលកពេលវេលាសមស្រប ដើម្បីលំហែខួរក្បាលខ្លះ ដើម្បីឲ្យមានលក្ខណៈធូរស្រាល៕
ដោយ៖ អ៊ុន ភក្តី
