អាជីវកម្ម​រាប់​សិប​ម៉ឺន​នៅ​ទូទាំង​ពិភពលោក​សុទ្ធ​តែ​ទទួល​រង​បញ្ហា​ប្រឈម​ខាង​ផ្នែក​ប្រតិបត្តិការ​ និង​ការ​រក​ចំណូល​ ក្នុង​ពេល​ដែល​វីរុស​កូវីដ​១៩ បាន​និង​កំពុង​វ៉ៃលុក​ពិភពលោក។ ប៉ុន្តែ​សម្រាប់​ស្ថាបនិក​ និង​ជា​នាយក​ប្រតិបត្តិ​កម្មវិធី​ Zoom ​លោក​ Eric Yuan ​បាន​និង​កំពុង​កើប​លុយ​ហើយ​ត្រឹម​តែ​ ៣​ខែ​ចុង​ក្រោយ​នេះ​ ខ្លួន​រក​បាន​ ៤០០០​ (៤​ ពាន់​) លាន​ដុល្លារ។ ​នេះ​បើ​យោង​តាម​សេចក្ដី​រាយការណ៍​ពី​ Business Insider។

​លោក​ Eric Yuan ​សញ្ជាតិ​អាមេរិក​ ដើម​កំណើត​ចិន​ ​បាន​បង្កើត​កម្មវិធី​ Zoom ដែល​ជា​កម្មវិធី​​ Video Conference App ​កាល​ពី​ឆ្នាំ​២០១១​ ​ប៉ុន្តែ​កម្មវិធី​នេះ​ ​​មាន​ការ​ចាប់​អារម្មណ៍​ប្រើ​យ៉ាង​គំហុក​នៅ​ទូទាំង​ពិភពលោក​ក្នុង​អំឡុង​ផ្ទុះ​ឡើង​កូវីដ​១៩​ នា​ដើម​ឆ្នាំ​២០២០ នេះ​។ ​តម្លៃ​របស់​ភាគហ៊ុន​របស់​កម្មវិធី​ Zoom បាន​ហក់​ឡើង​យ៉ាង​គួរ​ឱ្យ​កត់​សម្គាល់។

​បើ​តាម​​យោង​តាម​សន្ទស្សន៍​​មហាសេដ្ឋី​ពិភពលោក​របស់​​ Bloomberg (Bloomberg Billionaires Index) បាន​ឱ្យ​ដឹង​ថា​ ​​លោក​ Eric Yuan ​មាន​ទ្រព្យ​សម្បត្តិ​សរុប​​ប្រមាណ​ ​៧,៥​ពាន់​លាន​ដុល្លារ​ឯណោះ។ នៅ​ពេល​សារព័ត៌មា​ន Business Insider ស្នើ​សុំ​សម្ភាសន៍​ លោក​បាន​បដិសេធ​តាម​ជំនួយ​ការ​របស់​លោក​ថា​ លោក​មាន​ការ​មមាញឹក​ខ្លាំង​​ដែល​ត្រូវ​ចំណាយ​ពេល​ប្រមាណ​ ១៨​ម៉ោង​ក្នុង​មួយ​ថ្ងៃ​ជា​មួយ​ Zoom។

​​​ស្ថាបនិក​រូប​​នេះ​ មាន​ទី​កំណើត​នៅ​ខេត្ត​ Shandong ​កើត​នៅ​ឆ្នាំ​១៩៧០​ ​ដែល​ឪពុក​ម្ដាយ​របស់​លោក ​គឺ​ជា​វិស្វករ​រ៉ែ​ ហើយ​លោក​បាន​បញ្ចប់​ថ្នាក់​បរិញ្ញាបត្រ​​ផ្នែក​គណិតសាស្ត្រ​ និង​អនុបណ្ឌិត​ផ្នែក​​វិស្វករ​ នៅ​សាកលវិទ្យាល័យ​​​ប្រទេស​ចិន។ ​លោក​​បាន​ចំណាយ​ពេល​ធ្វើ​ការ​ ៤ ឆ្នាំ​នៅ​ប្រទេស​ជប៉ុន​ មុន​ពេល​បញ្ចប់​ការ​សិក្សា។ លោក​មាន​​កត្តា​ជំរុញ​ចិត្ត​ចង់​មក​ធ្វើ​ការ​នៅតំបន់​​ Silicon Valley ដែល​គេ​ស្គាល់​ថា​ ជា​មជ្ឈមណ្ឌល​ក្រុមហ៊ុន​បច្ចេកវិទ្យា​ធំ​បំផុត​របស់​ពិភពលោកមាន​មូលដ្ឋាន​នៅរដ្ឋ​កាលីហ្វ័រញ៉ា។ ​

សូមបញ្ជាក់៖ ក្រុម hackers ធ្វើស៊ីកម្មវិធី Zoom ខណៈកំពុងមានកំណើនអ្នកប្រើប្រាស់កម្មវិធីកាន់តែច្រើន

ទោះ​ជា​ចង់​ធ្វើ​ដំណើរ​មក​ធ្វើ​ការ​នៅ​សហរដ្ឋ​អាមេរិក​បែប​នេះ​ក្ដី​តែ​លោក​បាន​បរាជ័យ​ក្នុង​ការ​​​ស្នើ​សុំ​ទិដ្ឋាការ​​ទៅ​ធ្វើ​ការ​នៅ​អាមេរិក​ ៨​ដង​ រហូត​ដល់​ឆ្នាំ​១៩៩៧​ ទើប​លោក​បាន​ជាប់​ ខណៈ​នោះ លោក​មាន​អាយុត្រឹម​តែ​ ២៧​ឆ្នាំ​ប៉ុណ្ណោះ។ លោក​អាច​និយាយ​ភាសាអង់គ្លេស​បាន​បន្តិចបន្តួច​ប៉ុណ្ណោះ​​នៅ​ពេល​មក​ដល់​អាមេរិក​ដំបូង។ លោកថា​ លោកធ្លាក់​ច្រើន​ដង​ពេល​ស្នើរ​សុំទិដ្ឋាការ​ដោយ​សារ​តែ​លោក​មាន​ការ​ទាស់សម្ដីគ្នាជាមួយនឹងមន្ត្រីអន្តោប្រវែសន៍។ 

មុន​ពេល​បង្កើត​ Zoom ​លោក​ Yuan គឺ​ជា​អនុប្រធាន​ក្រុមហ៊ុន​ Cisco System ដែល​ធ្វើ​ការ​លើ​គម្រោង​ Videoconferencing ឈ្មោះ​ WebEx ដែល​ត្រូវ​បាន​ក្រុមហ៊ុន​ Cisco ​ទិញ​នៅ​ឆ្នាំ​២០០៧៕

ដោយ៖ រតនៈវិភូ
ប្រភព៖ Business Insider, Bloomberg and Forbes