(ភ្នំពេញ)៖ កម្ពុជា ចង់បានការវិនិយោគបន្ថែមពីប្រទេសចិន លើឧស្សាហកម្មកែច្នៃ និងវេចខ្ចប់ផលិតផលកសិកម្ម ដើម្បីធ្វើពិពិធកម្មការនាំចេញទៅកាន់ទីផ្សារអន្តរជាតិ ដោយសារយើងមានកសិផលមិនទាន់កែច្នៃជាច្រើនដូចជា ផ្លែស្វាយខេត្តកំពង់ស្ពឺ, ផ្លែមៀនខេត្តប៉ៃលិន និងឈើហូបផ្លែជាច្រើនទៀត ។

នៅក្នុងជំនួបពិភាក្សាជាមួយគណៈប្រតិភូចិន ដឹកនាំដោយ លោក លី អាន (Li An) ទីប្រឹក្សាសេដ្ឋកិច្ច និងពាណិជ្ជកម្មចិន (ចប់អាណត្តិ) នៅទីស្តីការក្រសួង កាលពីរសៀលថ្ងៃពុធ ទី២៤ ខែកក្កដា ឆ្នាំ២០១៩ ឯកឧត្តម ប៉ាន សូរស័ក្តិ បានជម្រាបភាគីចិន ពីកិច្ចប្រឹងប្រែងរបស់ក្រសួងពាណិជ្ជកម្ម ក្នុងការជំរុញការនាំចេញកសិផលទៅកាន់ទីផ្សារចិន តាមរយៈការចូលរួមព្រឹត្តិការណ៍ពិព័រនានា និងការបង្ហាញនៅតាមមជ្ឈមណ្ឌលពាណិជ្ជកម្មកម្ពុជា ស្ថិតក្នុងរដ្ឋធានី និងខេត្តចំនួន៥ នៃសាធារណរដ្ឋប្រជាមានិតចិន។

ឯកឧត្តមរដ្ឋមន្ត្រី បានស្នើភាគីចិន ជួយសម្របសម្រួលការនាំចេញកសិផលខ្មែរ និងជួយកៀងគរក្រុមហ៊ុនចិន ដែលមានឯកទេសត្រឹមត្រូវ មកលើវិនិយោគនៅក្នុងប្រទេសកម្ពុជាថែមទៀត ដើម្បីពង្រឹងទំនាក់ទំនងពាណិជ្ជកម្ម និងវិនិយោគទ្វេភាគី។ លើសពីនេះ ឯកឧត្តមរដ្ឋមន្ត្រី ក៏បានសន្យាបន្តសហការជាមួយភាគីចិនក្នុងវិស័យពាណិជ្ជកម្មអេឡិចត្រូនិក (E-Commerce) ដើម្បីជំរុញការលក់ និងនាំចេញផលិតផលខ្មែរ ទៅកាន់ទីផ្សារក្នុងតំបន់ និងពិភពលោក។

ជាកិច្ចឆ្លើយតប លោក លី អាន និងប្រតិភូ បានថ្លែងអំណរគុណឯកឧត្តមរដ្ឋមន្ត្រី ដែលបានគូសបញ្ជាក់ពីកិច្ចសហប្រតិបត្តិការល្អរវាងក្រសួងពាណិជ្ជកម្ម និងសាធារណរដ្ឋប្រជាមានិតចិន ព្រមទាំងសេចក្តីត្រូវការរបស់កម្ពុជា ដើម្បីពង្រឹង និងពង្រីកទំនាក់ទំនងសេដ្ឋកិច្ច និងពាណិជ្ជកម្មទ្វេភាគី ស្របតាមចក្ខុវិស័យរបស់ប្រមុខរដ្ឋាភិបាលនៃប្រទេសទាំងពីរ។

លោកទីប្រឹក្សាទើបចប់អាណត្តិរូបនេះ បានណែនាំលោក វូ កៅក្វាន់ (Wu Guoquan) ដែលត្រូវចូលកាន់តំណែងទីប្រឹក្សាសេដ្ឋកិច្ច និងពាណិជ្ជកម្មថ្មី ដល់ឯកឧត្តមរដ្ឋមន្ត្រី និងសហការី ដើម្បីបន្តធ្វើកិច្ចការជាមួយគ្នា លើកិច្ចការអទិភាពផ្សេងៗដែលប្រទេសទាំងពីរបានកំណត់។ នៅក្នុងឱកាសនោះដែរ លោក វូ កៅក្វាន់ បានប្តេជ្ញាជំរុញកិច្ចសហប្រតិបតិ្តការពាណិជ្ជកម្មទ្វេភាគី តាមរយៈការជួយគាំទ្រការរៀបចំពិព័រណ៍ ឬវេទិកាជំរុញពាណិជ្ជកម្មទ្វេភាគី ដើម្បីផ្តល់ឱកាសដល់វិស័យឯកជននៃប្រទេសទាំងពីរ អាចស្វែងយល់សក្តានុពល និងចាប់ដៃគូធុរកិច្ចទៅវិញទៅមក។

គួរបញ្ជាក់ ថាគិតត្រឹមឆ្នាំ ២០១៨ រហូតដល់ ឆ្នាំ ២០២០ រាជ រដ្ឋាភិបាល កម្ពុជា សម្តេច នាយក រដ្ឋមន្ត្រី ហ៊ុន សែន និង លោក ប្រធានា ធិបតី ចិន ស៊ី ជិន ពីង បាន ដាក់ ចេញ ផែនការ ជំរុញ ទំហំ ពាណិជ្ជកម្ម រវាង ប្រទេស ទាំង ពីរ ឲ្យ បាន ៦ ពាន់ លាន ដុល្លារ នៅឆ្នាំ ២០២០ និង ១០ប៊ីលានដុល្លារ នៅត្រឹមឆ្នាំ២០២៣ ក្រោយ ប្រទេស ទាំង ពីរ បាន សម្រេច លើស ផែនការ ក្នុង ឆ្នាំ ២០១៧ ៕