ប្រទេសទាំង ១០ ដែលត្រូវគេទស្សទាយថានឹងគ្រប់គ្រងពិភពលោកក្នុងឆ្នាំ ២០៥០
អ្នកមានដែលធ្លាប់គិតមើលទេថារយៈពេល ៥ឆ្នាំ ឬ ១០ឆ្នាំ ឬ២០ឆ្នាំខាងមុខ តើប្រទេសណាខ្លះដែលអាចក្លាយខ្លួនជាប្រទេសដែលមានសេដ្ឋកិច្ចរីកចម្រើនជាងគេ ហើយប្រទេសណាខ្លះដែលនៅតែបន្តជួបបញ្ហាផ្នែកសេដ្ឋកិច្ច?
យោងតាមរបាយការណ៍ដែលចេញផ្សាយក្រុមហ៊ុនសវនកម្ម PwC ដែលបានព្យាករណ៍លើការរីកចម្រើនសេដ្ឋកិច្ចបណ្តាប្រទេសក្នុងពិភពលោកឆ្នាំ ២០៥០ និងបានរកឃើញប្រទេសចំនួន ១០ ដែលវិសាលភាពសេដ្ឋកិច្ចធំជាងគេបំផុត ផ្អែកលើ GDP ដែលវាស់វែងលើអំណាចទិញ (Purchasing Power Parity)។ ចង់ដឹងថាមានប្រទេសណាខ្លះតោះទៅតាមដានទាំងអស់គ្នា៖
១) ចិន
ចិនត្រូវបានគេរំពឹងថានឹងដណ្តើមតំណែងលេខ ១ ជាប្រទេសដែលមានសេដ្ឋកិច្ចរីកធំធាត់ជាងគេក្នុងពិភពលោកនៅឆ្នាំ ២០៥០។ ជាមួយនឹងប្រជាជនដែលមានវ័យចំណាស់ បូកផ្សំនឹងអត្រាកំណើន GDP ៤.៤% ជាមធ្យមប្រចាំឆ្នាំ។
២) ឥណ្ឌា
ឥណ្ឌាត្រៀមខ្លួនចូលទៅជំនួសកន្លែងសហរដ្ឋអាមេរិកក្នុងឆ្នាំ ២០៥០ ជាមួយនឹងអត្រាកំណើនសេដ្ឋកិច្ចប្រចាំឆ្នាំ ៧.៧%។ ប្រទេសនេះត្រូវបានព្យាករណ៍ថានឹងមានអត្រាកំណើន GDP ខ្ពស់បំផុតគិតជាដុល្លារនៃប្រទេសមានក្នុងរបាយការណ៍របស់ PwC នេះ។
៣) សហរដ្ឋអាមេរិក
អាមេរិកអាចធ្លាក់តំណែងពីលេខ២ ឆ្នាំ ២០១៦ មកកាន់តំណែងលេខ៣ ឆ្នាំ ២០៥០ ដោយសារកំណើនយឺតនៃចំនួនប្រជាជន រូមផ្សំនឹងការធ្លាក់ចុះ GDP។
៤) ឥណ្ឌូនេស៊ី
ធ្លាប់ជាប្រទេសដែលឈរនៅលេខរៀងទី ៨ ក្នុងពិភពលោកក្នុងឆ្នាំ ២០១៦ តែពេលនេះប្រទេសនេះត្រូវបានគេសម្លឹងឃើញថានឹងក្លាយជាជើងខ្លាំងមួយរូបក្នុងឆ្នាំ ២០៥០ ដោយសារមានការរីកចម្រើនខ្លាំងផ្នែកសេដ្ឋកិច្ច។
៥) ប្រេស៊ីល
ជាប្រទេសដែលមានកំណើនសេដ្ឋកិច្ចថេរ តែការរីកលូតលាស់នៃសេដ្ឋកិច្ចមិនមានភាពផ្ទុះខ្លាំងដូចប្រទេស E7 ផ្សេងទៀតដូចជាម៉ិកស៊ិកនិងឥណ្ឌូនេស៊ី។ សម្រាប់ហេតុផលនេះទើបប្រេស៊ីលរំពឹងថានឹងស្ថិតក្នុងលំដាប់ទី ៥ ក្នុងឆ្នាំ ២០៥០។
៦) រុស្សី
ប្រទេសនេះត្រូវបានគេព្យាករណ៍ថានឹងឈរលើលំដាប់លេខ ៦ នៃប្រទេសដែលមានសេដ្ឋកិច្ចធំជាងគេ។ តែរឿងដែលគួរឲ្យខកចិត្តសម្រាប់ E7 នោះគឺការធ្លាក់ចុះនៃចំនួនប្រជាជន ដែលនាំឲ្យមានការយឺតយ៉ាវជាងការរំពឹងទុកលើការកើនឡើង GDP និងត្រូវបានគេរំពឹងថានឹងរារាំងសេដ្ឋកិច្ចរបស់ប្រទេសនេះក្នុងរយៈពេល ៣៣ ឆ្នាំខាងមុខ។
៧) ម៉ិកស៊ិក
មិនខ្វល់ថាលោក Trump សង់ជញ្ជាំងឃាំងរវាងប្រទេសខ្លួនឬអត់ទេ ក៏សេដ្ឋកិច្ចប្រទេសនេះនៅតែស្ថិតក្នុងកម្រិតរីកចម្រើន និងស្ថិតក្នុងលំដាប់ទី ១១ នៃប្រទេសដែលមានសេដ្ឋកិច្ចធំបំផុតឆ្នាំ ២០១៦ និងបន្តកាន់តំណែងក្នុងលំដាប់ទី ៧ ឆ្នាំ ២០៥០ ផ្អែកតាមការកំណើនថេរនៃចំនួនប្រជាជននិង GDP។
៨) ជប៉ុន
ក្នុងនាមជាប្រទេសដែលធ្លាប់មានសេដ្ឋកិច្ចខ្លាំងក្លាមួយនៅអាស៊ី ពេលនេះត្រូវបានគេរំពឹងថានឹងកំណើនសេដ្ឋកិច្ចយឺតបំផុតនៃប្រទេសដែលបានព្យាករណ៍បាយការណ៍របស់ PwC ក្នុងកម្រិតទាបជាមធ្យម ១,១% ក្នុងមួយឆ្នាំ ឯចំនួនប្រជាជនត្រូវបានគេព្យាករណ៍ថានឹងមានការធ្លាក់ចុះយ៉ាងឆាប់រហ័សដោយគិតជាមធ្យម ០,៥% ក្នុងមួយឆ្នាំ។
៩) អាល្លឺម៉ង់
សេដ្ឋកិច្ចរបស់ប្រទេសនេះត្រូវបានគេរំពឹងថានឹងធ្លាក់ចុះពីលំដាប់ទី ៥ របស់ពិភពលោកនៅក្នុងឆ្នាំ ២០១៦ ហើយធ្លាក់មកលំដាប់ទី ៩ ដោយ ២០៥០។ កំណើនសេដ្ឋកិច្ចយឺតយ៉ាវគឺមានត្រឹមតែ ១,៧% ក្នុងមួយឆ្នាំ និងចំនួនប្រជាជនដែលកំពុងធ្វើការថយចុះបើទោះបីជាការហូរចូលជនអន្តោប្រវេសន៍ថ្មីក៏ដោយ។
១០) ចក្រភពអង់គ្លេស (UK)
បើទោះជា PwC រំពឹងថា Brexit នឹងរារាំងសេដ្ឋកិច្ចក្នុងរយៈពេលមធ្យមក្តី ការព្យាករណ៍រយៈពេលវែងនៅតែមានភាពវិជ្ជមាន។ ចក្រភពអង់គ្លេសត្រូវបានគេរំពឹងថានឹងធ្លាក់ចុះត្រឹមតែមួយកន្លែងប៉ុណ្ណោះនៅត្រឹមឆ្នាំ ២០៥០ ដែលសន្សំសំចៃដោយកំណើនប្រជាជនដែលកំពុងលូតលាស់និងកំណើនសេដ្ឋកិច្ចថេរ៕
ដោយ៖ យ៉ាយ៉ា
