ពេលខ្លះការគិតទាំងនេះអាចធ្វើឲ្យអ្នករាថយទោះបីមួយជំហានទៀតនឹងជោគជ័យក៏ដោយ
អ្នកអាចនឹងជោគជ័យគ្រប់ពេលវេលា ប្រសិនបើ ការតស៊ូ និងការខិតខំប្រឹងប្រែងនៅតែមាននៅឡើយនោះ។ តែបើអ្នកបើកឱកាស ឲ្យខ្លួនឯង គិតពីរឿងភ័យខ្លាច ខ្លាចចាញ់គេ និងឆាប់ងាយចុះចាញ់នោះ អ្វីៗដែលអ្នកចង់ធ្វើវានឹងទៅជាអាសាបង់មិនខាន។ ខាងក្រោមនេះជាគំនិតដែលអាចឲ្យអ្នក ឆាប់រាថយគ្រប់ពេលវេលាទាំងអស់៖
១) ភ័យខ្លាចការបរាជ័យ៖ ការគិតពីភាពបរាជ័យ ការខ្លាចភាពអាម៉ាស់ ពេលធ្វើអ្វីមិនបានសម្រេចវានឹងក្លាយជាគំនិតមួយដែលរារាំងអ្នកក្នុងការទទួលបានភាពជោគជ័យ។ ការគិតបែបនេះគឺមិនផ្ដល់ប្រយោជន៍អ្វីឡើយសម្រាប់ជីវិត។ ហេតុនេះហើយគួរបង្រៀនខ្លួនឯង កុំឲ្យគិតឬខ្លាចភាពបរាជ័យតទៅទៀត។
២) ភ័យខ្លាចភាពមិនច្បាស់ការដែលអ្នកមាន៖ មនុស្សម្នាក់ៗ តែងមានភាពមិនច្បាស់ ការនៅក្នុងខ្លួនសឹងតែគ្រប់ពេលទៅហើយ។ តែពេលខ្លះ វាក៏ក្លាយជាគំនិតមួយ សម្រាប់អ្នកក្នុងការបន្តសកម្មភាពទៅមុខដែរ។ ហេតុអ្វីអ្នកចាំបាច់ភ័យខ្លាចភាពមិនច្បាស់ការរបស់អ្នក? វាមិនអាចជះឥទ្ធិពលអ្វីអាក្រក់មកលើអ្នកទេ អ្វីដែលអាក្រក់នោះ គឺអ្នកងាយចុះចាញ់ទៅវិញទេ។
៣) គ្មានភាពជឿជាក់លើខ្លួន៖ អ្នកនឹងមិនងាយទទួលបានភាពជោគជ័យទេ ប្រសិនបើអ្នកតែងតែ មានមន្ទិលសង្ស័យ លើខ្លួនឯងនោះ។ ការឆ្ងល់ និងសង្ស័យ លើខ្លួន ឯង នឹងមិនងាយឲ្យអ្នកឆាប់ដល់គោលដៅនោះទេ វាតែងតែវិលវល់ បង្កើតឧបសគ្គសម្រាប់អ្នកជានិច្ច៕
ដោយ៖ ព្រំ សុវណ្ណកណ្ណិកា
