តិចនិក ៥យ៉ាងដើម្បីបង្កើនភាពឆ្នៃប្រឌិតសម្រាប់ការរកស៊ីនាសម័យទំនើប
សព្វថ្ងៃនេះអ្នករកស៊ីដ៏ជោគជ័យគឺជាសហគ្រិនដែលតែងតែមានគំនិតឆ្នៃប្រឌិតប្លែកៗ ល្អជាងគេឯង ជាពិសេសនោះ គឺមានភាពវ័យឆ្លាតនេះឯង។ តែពួកគេក៏នៅមានតិចនិកខ្លះដែលអ្នកមិនដែលដឹង ពីក្រោយការបង្កើនគំនិតច្នៃប្រឌិតសម្រាប់អាជីវកម្មគេផងដែរ។ នេះគឺជាចំណុចសំខាន់ៗទាំង៥ដែលអ្នកគួរយកទៅអនុវត្តន៍ក្នុងការរកស៊ីរបស់អ្នក៖
១) សិក្សាស្វែងយល់គំនិតអ្នកដទៃ៖
ជាការពិតណាស់មានគំនិតតែមួយវាហាក់ដូចជាទាល់ច្រកពេកណាស់សម្រាប់អ្នក។ គំនិតផ្សេងៗគ្នាជាច្រើននឹងបង្រៀនអ្នកឲ្យស្គាល់កាន់តែច្រើនពីអ្វីដែលហៅថាភាពចេះច្នៃប្រឌិត។
២) ផ្ដល់ពេលសម្រាកខ្លះ៖
អ្នកស្រាវជ្រាវបានរកឃើញថាអ្នកអាចនឹងទទួលបានគំនិតថ្មីៗល្អៗបន្ថែមទៀតនៅពេលអ្នកចេះផ្ដល់ពេលវេលាសម្រាកដល់ខ្លួនឯង។ ដូចនេះគួរកុំធ្វើខ្លួនអោយស្មុគស្មាញនឹងការងារខ្លាំងពេក។
៣) កាត់បន្ថយសម្ពាធ៖
ពេលវេលាមួយដែលមានសម្ពាធអាចនឹងជំរុញការងារអ្នកទៅមុខដោយមិនរលូន ហើយទទួលបានលទ្ធផលមិនដូចបំណងទៀត។ ដូច្នេះហើយអ្នកគួរតែសាកល្បងកាត់បន្ថយសម្ពាធដែលយើងមាននោះចោលសិន។ រួចសឹមទទួលយកគំនិតថ្មីៗ ពីគេឯង ឬមួយស្រាវជ្រាវបន្ថែម ដោយកុំឲ្យខ្លួនឯងរងសម្ពាធតទៅទៀត។
៤) ផ្លាស់ប្ដូរបរិយាកាសខ្លះ៖
អ្នកគួរចេះស្វែងរកបរិយាកាសណាដែលអំណោយផលដល់ការធ្វើការរបស់អ្នក។ អ្នកគួរតែចេះបត់បែន គ្រប់កាលៈទេសៈឲ្យតែខ្លួនឯងបានស្រួលខ្លួន ព្រោះមានតែខ្លួនអ្នកទេដែលជាអ្នកសម្រេចចិត្តថាគួរដើរលើផ្លូវបែបណានោះ។
៥) ទទួលស្គាល់ការបរាជ័យកន្លងមក៖
មនុស្សគ្រប់រូបតែងជួបការបរាជ័យ ហើយមនុស្សដែលជោគជ័យមិនដែលខ្មាសអៀននូវអ្វីដែលពូកគេធ្លាប់ធ្វើខុសពីមុនមកទេ។ បើសិនគ្មានថ្ងៃបរាជ័យនោះ ម៉្លោះហើយគេក៏គ្មានមុខនៅទីនេះដែរ។ ដោយសារតែគេគិតថាមានតែភាពបរាជ័យនេះទេដែលជាគ្រូដ៏ស័ក្ដិសិទ្ធិសម្រាប់ជីវិត៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ power of positivity
