ហេតុផលសាមញ្ញៗ ៤យ៉ាងអាចទាញអ្នកឲ្យបរាជ័យមិននឹកស្មានដល់
នៅពេលអ្នកនិយាយពីការសម្រេចបានភាពជោគជ័យធំសម្រាប់ខ្លួនឯង អ្នកក៏ត្រូវដាក់មហិច្ឆតាឲ្យធំផងដែរ។ នេះជាការលើកឡើងរបស់លោក Brian Tracy ដែលជាសហគ្រិន និងវាគ្មិនអាមេរិកដ៏ល្បីល្បាញមួយរូបរបស់អាមេរិក។
ប៉ុន្តែលោកថា កុំនិយាយពីមហិច្ឆតាធំដែលអ្នកត្រូវធ្វើដើម្បីសម្រេចគោលដៅរបស់អ្នក បើគ្រាន់តែទម្លាប់សាមញ្ញៗមិនល្អរបស់អ្នក អ្នកមើលវាមិនឃើញផងនោះ។ ឆ្លងកាត់តាមបទពិសោធន៍ជីវិតដែលលោក លោក Brian Tracy បានសង្កេតឃើញថា មានឧបសគ្គមួយចំនួនដែលរារាំងមនុស្សភាគច្រើនមិនឲ្យជោគជ័យ៖
១.ការយកលេស
លោក Brian Tracy លើកឡើងថា ការយកលេសគឺជាជំងឺចាក់ស្រេះនៅក្នុងខ្លួនរបស់មនុស្សភាគច្រើន។ ការយកលេសនេះធ្វើឲ្យបុគ្គលនោះចូលចិត្តទម្លាក់កំហុសលើអ្វីផ្សេងៗលើកលែងតែខ្លួនឯង។ មនុស្សយកលេសចូលចិត្តពន្យារពេលណាស់ ហើយបើថាខ្លួនឯងបរាជ័យវិញ តែងចោទថា ជាកំហុសអ្នកនេះអ្នកនោះ ដោយសារតែបញ្ហានេះបញ្ហានោះ ពោលគឺយករួចខ្លួនរហូត។ វិធីដ៏ ល្អបំផុតដើម្បីបញ្ឈប់ជំងឺមួយនេះ គឺត្រូវចាប់ផ្តើមធ្វើអ្វីដែលអ្នកចង់ធ្វើនៅពេលឥឡូវនេះ បំបាត់ចោលទម្លាប់ចូលចិត្តពន្យារពេល ចេះបែងចែកពេលវេលាឲ្យបានត្រឹមត្រូវតាមការងារអាទិភាព ត្រូវមានផែនការជីវិត និងការទទួលខុសត្រូវ។
២.មើលរំលងលើការថែទាំសុខភាព មនុស្សទូទៅទទួលស្គាល់ថា សុខភាពគឺជារឿងសំខាន់ជាងអ្វីៗទាំងអស់។ ប៉ុន្តែមានមនុស្សមិនច្រើនទេតែយកចិត្តទុកដាក់លើការថែទាំសុខភាព។ លោក Brian Tracy បាននិយាយថា មនុស្សខ្លះលះបង់សុខភាពធ្វើការគ្មានថ្ងៃសម្រាកដើម្បីរកលុយ តែទីបំផុតលុយមិនអាចទិញសុខភាពរបស់ពួកគេមកវិញបានទេ។ ការមិនយកចិត្តទុកដាក់លើសុខភាពដូចជា ចូលចិត្តទទួលទានគ្រឿងស្រវឹង មិនហាត់ប្រាណ ឬទទួលទានអាហារមិនត្រឹមត្រូវនឹងធ្វើឲ្យសុខភាពរបស់មនុស្សទន់ជ្រាយ។ នៅពេលសុខភាពរបស់អ្នកមិនល្អ ការគិតរបស់អ្នកក៏មិនល្អ ហើយទីបំផុតលទ្ធភាពជោគជ័យរបស់អ្នកក៏មិនល្អទៅតាមហ្នឹងដែរ។
៣.មិនដើរចេញពីទីតាំងដែលអ្នកកំពុងឈរ (Comfort Zone) មនុស្សគ្រប់រូបតែងជួបបញ្ហា ប៉ុន្តែមនុស្សភាគច្រើនមិនព្រមដោះស្រាយបញ្ហានោះទេ។ ពួកគេដឹងថា ខ្លួនមិនចង់បានលទ្ធផលដែលខ្លួនកំពុងជួបនោះឡើយ ប៉ុន្តែពួកគេនៅតែត្រាំត្រែងនឹងលទ្ធផលទាំងនោះ មិនមានមធ្យោបាយណាមួយថ្មីដើម្បីដោះស្រាយបញ្ហាទាំងនោះទេ។ នេះជាការលើកឡើងរបស់លោក Brian Tracy។ លោកថា បើអ្នកចង់ឲ្យជីវិតរបស់អ្នកល្អប្រសើរជាងនេះ អ្នកត្រូវដើរចេញពីទីតាំងដែលអ្នកកំពុងឈរ ពោលគឺត្រូវផ្លាស់ប្ដូរការគិត ហើយនៅពេលគំនិតរបស់អ្នកមានការផ្លាស់ប្ដូរ ទង្វើរបស់អ្នកក៏មានការផ្លាស់ប្ដូរដែរ។
៤.មិនរៀនសូត្រជាប្រចាំ មនុស្សខ្លះយកការងារ ជំនួញ និងកត្តាផ្សេងៗទៅបញ្ចប់ការរៀនសូត្ររបស់ខ្លួន។ ពួកគេយល់ថា ការងារនឹងបង្រៀនខ្លួន ហើយបើចងធ្វើជំនួញក៏មិនចាំបាច់រៀនច្រើនដែរ ។ល។ ក៏ប៉ុន្តែអ្នកត្រូវចាំថា ការរៀនសូត្រគឺជាបេសកកម្មជីវិតមួយដែលគ្មានដែនកំណត់។ លោក Brian Tracy និយាយថា ទោះជាអ្នកបានជោគជ័យ ឬបរាជ័យក៏ដោយ ដរាបណាអ្នកនៅមានជីវិត អ្នកត្រូវរៀនសូត្រជាប្រចាំពីព្រោះថា ចំណេះដឹងធ្វើឲ្យអ្នកកាន់តែមានគំនិតទូលំទូលាយ។ នៅពេលអ្នកមានចំណេះដឹងកាន់តែច្រើន អ្នកនឹងចេះអភិវឌ្ឍខ្លួន ហើយវាជាមូលដ្ឋានគ្រឹះ និងជាធាតុផ្សំដ៏សំខាន់ដើម្បីកសាងភាពជោគជ័យក្នុងជីវិត៕
ប្រភព៖ Entrepreneur
