មេរៀនដ៏ល្អបំផុតក្នុងជីវិតរបស់អ្នក គឺរៀនពីកំហុស
នៅលើលោកនេះ គ្មានអ្នកណាម្នាក់ចង់មានកំហុសនោះឡើយ ហើយក៏គ្មានអ្នកណាខ្លះដែលគេចផុតពីកំហុសនោះដែរ។ សម្រាប់មនុស្សខ្លះ កំហុសគឺជាភាពបរាជ័យដែលបានធ្វើឲ្យពួកគេបោះបង់ បាក់ទឹកចិត្ត និងអស់សង្ឃឹម ខណៈដែលមនុស្សខ្លះទៀតយល់ថា កំហុសគឺជាឱកាសល្អមួយធ្វើឲ្យជីវិតរបស់ពួកគេកាន់តែរឹងមាំ។
ទោះបីជាអ្នកយល់ឃើញផ្សេងៗគ្នាពីកំហុសនេះក៏ដោយ អ្នកគួរតែបង្វែរការគិតមកយល់បែបនេះថា ហេតុអ្វីបានជាអ្នកមានកំហុស? តើជីវិតអ្នកនឹងត្រូវបញ្ចប់ដោយសារតែកំហុសនេះដែរឬទេ? តើអ្នកអាចប្រែក្លាយកំហុសឲ្យក្លាយទៅជាភាពជោគជ័យបានដែរឬទេ? ប្រសិនបើអ្នកចង់បានចម្លើយពីចម្ងល់ខាងលើ អ្នកអាចស្វែងយល់ពីចំណុចសំខាន់ដែលជាអត្ថប្រយោជន៍ចំនួន ៣ របស់កំហុសដែលមាននៅខាងក្រោមនេះ៖
១. វាអាចជាគ្រូល្អបំផុតរបស់អ្នក អ្នកនិពន្ធ និងជាទស្សនវិទូលោក John Dewey ធ្លាប់បានសរសេរថា " បរាជ័យ គឺជាមេរៀន។ មនុស្សជោគជ័យរៀនសូត្រពីភាពបរាជ័យរបស់ខ្លួន"។ វាជារឿងលំបាកដើម្បីពិនិត្យមើលកំហុសរបស់អ្នកឡើងវិញ និងអាចប្រែក្លាយវាទៅជាឱកាសមួយដើម្បីសិក្សារៀនសូត្រ។ ប្រសិនបើអ្នកសញ្ជឹងគិតកំហុសនោះតែមួយភ្លែត អ្នកនឹងគិតថា វាគឺជាធម្មជាតិរបស់មនុស្ស។ ប៉ុន្តែបើអ្នកគិតឲ្យបានស៊ីជម្រៅជាងនេះ អ្នកនឹងអាចរកឃើញថា មានមេរៀនល្អៗជាងនេះពីកំហុស ឬភាពបរាជ័យនោះ។ គ្មានអ្នកណាអាចផ្លាស់ប្ដូរអតីតកាលបានទេ។ ប៉ុន្តែអ្វីដែលបានកើតឡើងរួចមកហើយ វាអាចជួយប្រាប់អ្នកថា តើអ្នកត្រូវធ្វើអ្វីខ្លះសម្រាប់ថ្ងៃខាងមុខ? ដោយការចំណាយពេលវេលាដើម្បីវាយតម្លៃនូវអ្វីដែលជាកំហុស និងកន្លែងណាខ្លះដែលអ្នកអាចធ្វើបានខុសពីមុន អ្នកនឹងអាចជៀសវាងប្រព្រឹត្តកំហុសដដែលៗដូចគ្នានេះនៅពេលអនាគតបាន។
២. ប្រើឱកាសដើម្បីពិនិត្យមើលគោលដៅរបស់អ្នកឡើងវិញ តើនឹងមានអ្វីកើតឡើងប្រសិនបើអ្នកមិនមើលកំហុសរបស់អ្នកថា ជាការបរាជ័យ ឬចុងបញ្ចប់របស់អ្នក ហើយសម្លឹងឃើញវាជាឱកាសល្អមួយថ្មីទៅវិញ? នៅពេលអ្នកមានកំហុស វាអាចជាឱកាសល្អមួយដើម្បីពិនិត្យមើលគោលដៅរបស់អ្នកឡើងវិញ និងធ្វើឲ្យអ្នកយកចិត្តទុកដាក់លើអាជីពការងាររបស់អ្នកបានល្អប្រសើរជាងមុន។ អាចអាចសាកសួរថា តើកំហុសនោះអាចជាលទ្ធផលនៃការខ្វះការលើកទឹកចិត្ត ការយកចិត្តទុកដាក់ ឬចំណង់ចំណូលចិត្តដែរឬទេ? បើដូច្នេះមែននោះ តើអ្នកអាចធ្វើការផ្លាស់ប្ដូរគោលដៅរបស់អ្នក ឬអាចធ្វើឲ្យវាប្រាកដជាងនេះដើម្បីសម្រេចភាពជោគជ័យបានដែរឬទេ? នេះអាចបញ្ជាក់បានថា កំហុសអាចជាកាតាលីករមួយដែលជួយជំរុញឲ្យមានការផ្លាស់ប្ដូរជាវិជ្ជមាន ហើយវាគឺជារឿងល្អខ្លាំងណាស់សម្រាប់អាជីពការងារ និងធ្វើឲ្យគំនិតរបស់អ្នកមានភាពចាស់ទុំជាងមុន។
៣. កំហុសធ្វើឲ្យអ្នកកាន់តែរឹងមាំជាងមុន នៅក្នុងបញ្ហាអាជីពការងារក៏ដោយ នៅក្នុងជីវិតជាក់ស្តែងក៏ដោយ អ្វីក៏ដោយដែលមិនអាចសម្លាប់អ្នកបាន មានន័យថា អ្នកជាមនុស្សកាន់តែរឹងមាំហើយ។ នេះគឺជារឿងពិត ប៉ុន្តែលុះត្រាតែអ្នករៀនសូត្រពីកំហុសនោះតែប៉ុណ្ណោះ។ កំហុសវាជារឿងល្អ ពីព្រោះវាបានបង្ហាញឲ្យអ្នកដឹងថា អ្នកមានចំណុចខ្សោយ មានចំណុចខ្វះខាត និងមិនមានស្ថិរភាពក្នុងខ្លួន។ សូមចាំថា កំហុសគ្រាន់តែជាហេតុការណ៍មិនល្អមួយដែលកើតមានមកលើអាជីពការងារ ឬជីវិតរបស់អ្នកនៅក្នុងរយៈពេលខ្លីមួយប៉ុណ្ណោះ ហើយថ្ងៃណាមួយភាពជោគជ័យនឹងមកជំនួសវិញ។ ថ្វីត្បិតតែវាបានធ្វើឲ្យអ្នកខកចិត្ត ឬពេលខ្លះអស់កម្លាំងចិត្ត អ្នកត្រូវប្រើឱកាសនេះកែលំអចំណុចខ្វះខាតទាំងនោះឡើងវិញដូចជា ការរកឃើញពីមូលហេតុដែលនាំឲ្យមានកំហុស ហើយកែប្រែវាឲ្យកាន់តែ ប្រសើរ ពេលនោះហើយដែលអ្នកនឹងក្លាយជាមនុស្សមានជំហររឹងប៉ឹងយ៉ាងពិតប្រាកដ៕
ប្រភព៖ Entrepreneur
