រដ្ឋាភិបាលតួកគីបន្ទោសថាការកើនឡើងថ្លៃម្ហូបអាហារគឺជា ភេរវកម្មអាហារ
តួលេខអតិផរណាចុងក្រោយបង្អស់នៅក្នុងប្រទេសទួរគីនៅពេលនេះបាននិងកំពុងធ្វើឲ្យប្រជាពលរដ្ឋជួបការលំបាកកាន់តែខ្លាំងឡើងៗ។ វិទ្យាស្ថានស្ថិតិទួរគីបានកំណត់អត្រាអតិផរណាប្រចាំឆ្នាំត្រឹម 20.35% នៅក្នុងខែមករា តែនៅពេលនេះវាបានកើនដល់កម្រិតស្ទើរតែ 31% ទៅហើយ ម្ហូបអាហារគ្រប់មុខបានឡើងថ្លៃកប់ពពក។
ដើម្បីប្រឆាំងនឹងវិបត្តអតិផរណានេះ រដ្ឋាភិបាលបានផ្តួចផ្តើមដាក់ចេញនូវកិច្ចគាំពារអ្នកដែលកំពុងតស៊ូជាមួយថ្លៃទំនិញម្ហូបអាហារនេះ។ រដ្ឋបាលនៅក្នុងទីក្រុង Istanbul និង Ankara បានបើកតូបលក់បន្លែសម្រាប់មនុស្សរាប់សិបនាក់ដែលដាក់លក់ទំនិញដែលមានតម្លៃត្រឹមតែពាក់កណ្តាលនៃអ្នកលក់រាយធម្មតា។
ប្រជាជនជាច្រើនបានស្វាគមន៍ក្នុងការធ្វើដំណើរទៅទិញ ទោះបីត្រូវតម្រង់ជួរយ៉ាងវែង ហើយអាចទិញទំនិញត្រឹមចំនួនកំណត់ក៏ដោយ។ អ្នកដែលបានទៅទិញទំនិញនោះបានប្រាប់ថា ពួកគេបានទទួលរងការប៉ះពាល់ពីការតម្លើងថ្លៃនៅផ្សារទំនើប។ ស្ត្រីម្នាក់សុំមិនបញ្ចេញឈ្មោះក៏បានឲ្យដឹងដែរថាគ្រួសាររបស់គាត់មិនអាចទិញអាហារបាគ្រប់គ្រាន់ទេបើសិនជាទៅយឺត ដោយសារទំនិញមួយចំនួនដូចជាខ្ទឹមបារាំង និងដំឡូងបារាំងបានលក់អស់មុនពេលរសៀល។ អ្នកលក់បានព្យាយាមតម្លើងថ្លៃដោយសារអតិផរណា តែវាមិនមានតុល្យភាពទេរវាងប្រាក់ឈ្នួលបុគ្គលិក កម្មករ ពន្ធ និងថ្លៃជួលនានា។
ប្រធានាធិបតីតួកគី លោក Recep Tayyip Erdogan បានបន្ទោសនូវការឡើងថ្លៃទំនិញនេះដោយសារឈ្មួញកណ្តាល ដោយលោកបានឲ្យឈ្មោះសកម្មភាពរបស់ពួកគេនេះថាជា “ភេរវកម្មអាហារ” ហើយលោកបានស្បថថានឹងបញ្ចប់វាដូចដែលបោសសម្អាតជនភេរវកម្មដូចគ្នា។ លោក Erdogan ក៏បានសន្យាដែរថានឹងពង្រីកការចែកចាយទំនិញរួមទាំងអាហារដទៃទៀត ដែលជាផលិតផលមានអនាម័យបានសម្អាតរួច ហើយតូបត្រូវបើកប្រមាណជាង ៥០ កន្លែងនៅក្នុងទីក្រុងធំៗទាំងពីរ។
ទោះជាយ៉ាងនេះក្តីមិនមែនអ្នករាល់គ្នាសុទ្ធតែពេញចិត្តនឹងចំណាត់ការរបស់រដ្ឋាភិបាលនោះទេ អ្នករិះគន់មួយចំនួនបានមើលឃើញថាវាជាការជំរុញខាងផ្នែកនយោបាយទៅវិញ ជាមួយនឹងការមកដល់នៃការបោះឆ្នោតក្រុងនៅថ្ងៃទី ៣១ ខែមិនា ខាងមុខនេះ៕
ដោយ៖ ទីន ម៉ាទីយ៉ា
ប្រភព៖ Michal Bardavid CGTN
