អ្នកអាចនឹងមិនសមធ្វើជាអ្នករកស៊ី អ៊ីចឹងកុំចេះតែជោរតាមគេ!
ទស្សនមួយចំនួនបានលើកឡើងថា ទាល់តែរកស៊ីបានគេហៅថា ជីវិតជោគជ័យ។ គំនិតនេះហាក់ដូចជា មិនទាន់មានន័យគ្រប់ជ្រុងជ្រោយ និង ត្រឹមតែនៅឡើយទេ។ ការដំណើរការអាជីវម្មមិនមែន មានន័យថា «ប្រសើរជាង អ្នកមានការងារធម្មតានោះទេ» ហើយមិនមែនមនុស្សគ្រប់គ្នាសុទ្ធតែសមធ្វើជា អ្នករកស៊ីនោះទេ។
តាមពិតទៅ មនុស្សម្នាក់ៗមានគំនិត សមត្ថភាព និង ទេពកោសល្យផ្សេងទៀត។ អ្នកខ្លះមានទេពកោសល្យក្នុងការរកស៊ី និង មានគំនិតមួយមិនចង់ឲ្យគេត្រួតត្រា ឬ នៅចង់មានសេរីភាពក្នុងការសម្រេចចិត្ត។ អ្នកខ្លះទៀត មានចំណេះដឹងជ្រៅជ្រះ ប៉ុន្តែមិនចូលចិត្តក្នុងការប្រថុយប្រថានខ្លាំងនោះឡើយ ដូច្នេះមិនចាំបាច់ទៅបង្កើតអាជីវកម្មអ្វីនោះទេ តែគ្រាន់តែមានការងារមួយដែលខ្លួនពេញចិត្ត និង ចំណូលសមរម្យគឺ ជាការស្រេច។
មនុស្សមួយចំនួនបានសម្រេចចិត្តបោះបង់ការងាររបស់ខ្លួនដើម្បីបង្កើតអាជីវកម្ម ព្រោះតែខ្លួនយល់ឃើញថា ការប្រកបអាជីវកម្មគឺជាជម្រើសល្អបំផុត និង ជាអ្វីដែលខ្លួនពេញចិត្តបំផុតក្នុងជីវិត។ នេះជាផ្លូវត្រឹមត្រូវមួយដែល ខ្លួនបានសម្រេច ហើយក៏ទទួលបានលទ្ធផលជាទីពេញចិត្ត។ តែអ្នកខ្លះវិញ ក៏បានសម្រេចចិត្តបោះបង់ការងារ ដើម្បីបើកអាជីវកម្មដែរ ព្រោះឃើញគេធ្វើទៅជោគជ័យ និង បានលុយច្រើន ហើយមើលទៅហាក់ដូចជាអស្ចារ្យខ្លាំងណាស់ តែភ្លេចគិតថា ខ្លួនជាមនុស្សប្រភេទណា ហើយពិតជាសក្ដិសមធ្វើជាអ្នករកស៊ីឬអត់។
ដោយសារតែបែបនេះហើយ ទើបពេលចេញរកស៊ី គឺបរាជ័យគ្មានថ្ងៃងើបមុខរួច។ ជារួមមនុស្សគឺមិនដូចគ្នាទេ រឿងខ្លះអ្នកអាចធ្វើបានយ៉ាងល្អ និងមានភាពងាយស្រួលប៉ុន្តែសម្រាប់អ្នកផ្សែងទៀតមិនអាចធ្វើបានទេ ហេតុនេះហើយកុំគិតថាអ្នកណាមានតម្លៃខ្ពស់ជាងអ្នកណា សំខាន់យើងជានរណា។ ដូច្នេះហើយ កុំជោរតាមគេ តែ គួរតែព្យាយាមរកខ្លួនឯងឲ្យឃើញថា ខ្លួនជានរណា ហើយចង់ធ្វើអ្វីឲ្យប្រាកដ។ នៅពេលអ្នកដឹងច្បាស់ហើយ នោះសឹមសម្រេចចិត្ត មិនថា រកស៊ីឬធ្វើការទេ គឺសុទ្ធតែល្អទាំងអស់៕
ប្រែសម្រួលដោយ៖ អ៊ុន ស្រីនាង
