យោងតាមសន្ទស្សន៍ការប្រកួតប្រជែងសកលរបស់វេទិកាសេដ្ឋកិច្ចពិភពលោក (WEF) បានឲ្យដឹងថាប្រទេសសឹង្ហបុរីគឺជាប្រទេសដែលមានការប្រកួតប្រជែងផ្នែកសេដ្ធកិច្ចខ្លាំងជាងគេនៅក្នុងតំបន់អាស៊ាន ហើយអ្វីដែលគួរឲ្យភ្ញាក់ផ្អើលទៀតនោះគឺប្រទេសដ៏តូចមួយនេះឈរលើលំដាប់ថ្នាក់លេខ ២ បន្ទាប់ពីសហរដ្ឋអាមេរិកដែលមានការប្រកួតប្រជែងផ្នែកសេដ្ឋកិច្ចយ៉ាងខ្លាំងជាងគេ។ ជាពិសេសនោះ ប្រទេសកូននាគអាស៊ីមួយនេះត្រូវបានគេមើលឃើញថាជាប្រទេសដែលមានសេដ្ឋកិច្ចគំរូដោយយោងតាមរបាយការណ៍ ដែលបានបង្ហាញពីការបើកចំហសម្រាប់ការប្រកួតប្រជែង ចំពេលមានការកើនឡើងនៃភាពតានតឹងនិងការប្រកួតប្រជែងគ្នាប្រឆាំងនឹងសកលភាវូបនីយកម្ម។ របាយការណ៍នេះបានចាត់ទុកសិង្ហបុរីជាប្រទេសដ៏តូចមួយដែលមានការត្រៀមខ្លួនរួចជាស្រេចមុនគេលើពិភពលោកសម្រាប់ “សេដ្ឋកិច្ចក្នុងពេលអនាគត” ។ លើសពីនេះទៅទៀត របាយការណ៍នេះបានឲ្យដឹងថា ការដែលមានការបើកចំហសេដ្ឋកិច្ចខ្ពស់ដូចជា មានពន្ធដារទាប ឬការមិនយកពន្ធនោះគឺនឹងនាំមកនូវភាពងាយស្រួលក្នុងការជួយជំរុញកម្លាំងពលកម្មបរទេសមកធ្វើការក្នុងប្រទេសនិងជំរុញឲ្យមានការសហការក្នុងការប្រកបអាជីវកម្មដែលមានប៉ាតង់ត្រឹមត្រូវ ហើយជំរុញឲ្យមានការរីកចម្រើនដល់ផ្នែកបច្ចេកវិទ្យានិងប្រសិទ្ធភាពទីផ្សារ។ ប៉ុន្តែ ដោយសារតែប្រទេសសិង្ហបុរីគឺជាប្រទេសដែលពឹងផ្អែកខ្លាំងលើការនាំចេញផលិតផលរបស់ខ្លួន គឺប្រទេសនេះអាចទទួលផលប៉ះពាល់ខ្លាំងពីសង្គ្រាមសេដ្ឋកិច្ចពាណិជ្ជកម្មរវាងទីក្រុងវ៉ាស៊ីនតោននិងទីក្រុងប៉េកាំង។ ការប្រកួតប្រជែងក្នុងជំនាន់ថ្មី សន្ទស្សន៍នៅឆ្នាំនេះប្រើវិធីសាស្ត្រថ្មីមួយដែលបង្ហាញពីទិដ្ឋភាពប្រកួតប្រជែងនៃសេដ្ឋកិច្ចប្រទេសចំនួន ១៤០ តាមរយៈការប្រើប្រាស់សូចនាករចំនួន ៩៨ ដែលត្រូវបានរៀបចំទៅជាសរសរស្ដម្ភចំនួន ១២។ សូចនាករនីមួយៗប្រើការវាស់វែងពី ០ ទៅ ១០០ ដែលបង្ហាញពីកម្រិតសេដ្ឋកិច្ចរបស់ប្រទេសមួយមានលក្ខណៈគ្រប់លក្ខខណ្ឌ ឬកំពុងស្ថិតក្នុងការប្រកួតប្រជែង។ ក្នុងចំណោមសរសរស្ដម្ភទាំង ១២ ប្រទេសសិង្ហបុរីជាប់លំដាប់ខ្ពស់ចំនួន ១០ កន្លែងក្នុងចំណោមសរសរស្ដម្ភចំនួន ៧ និងនៅក្នុងកំពូល ២០ ក្នុងចំណោមសរសរស្ដម្ភ ៤ ផ្សេងទៀត។ ក្នុងបង្គោលផលិតផលទីផ្សារ ប្រទេសនេះមានភាពនាំមុខគេក្នុងការមានភាពបើកចំហពាណិជ្ជកម្ម។ សាធារណរដ្ឋកោះនេះក៏មានចំណាត់ថ្នាក់ខ្ពស់បំផុតនៅក្នុងសរសរស្ដម្ភហេដ្ឋារចនាសម្ព័ន្ធដែលមានពិន្ទុល្អឥតខ្ចោះ ៩៥.៧ ដោយសារតែមានហេដ្ឋារចនាសម្ព័ន្ធដឹកជញ្ជូនលំដាប់ថ្នាក់ពិភពលោកដោយមានសេវាកម្មនិងការតភ្ជាប់យ៉ាងល្អ។ ម្យ៉ាងទៀត ប្រទេសនេះក៏ទទួលបានពិន្ទុយ៉ាងល្អលើការរង្វាយតម្លៃនៃសរសរស្ដម្ភសុខភាពដែលមានការរីកចម្រើនផ្នែកសន្ទស្សន៍អាយុកាលមធ្យមរហូតដល់ ៧៤ ឆ្នាំដែលខ្ពស់ជាងប្រទេសជប៉ុនទៅទៀត។ ចំពោះសមាជិកអាស៊ាន ៣ ប្រទេសផ្សេងទៀតដែលមានប្រទេសម៉ាឡេស៊ី (ស្ថិតក្នុងចំណាត់ថ្នាក់លេខ ២៥) ប្រទេសថៃ (ស្ថិតក្នុងចំណាត់ថ្នាក់លេខ ៣៨) និងប្រទេសឥណ្ឌូនេស៊ី (ស្ថិតក្នុងចំណាត់ថ្នាក់លេខ ៤៥) កំពុងព្យាយាមបង្កើនចំណាត់ថ្នាក់របស់ខ្លួនក្នុងចំណោមចំណាត់ថ្នាក់ ៥០។ ចំណែកឯប្រទេសសមាជិកអាស៊ានផ្សេងទៀតមានប្រទេសវៀតណាម (លេខរៀង ៧៧) ប្រទេសកម្ពុជា(លេខរៀង ១១០) ប្រទេសឡាវ (លេខរៀង ១១២) គឺស្ថិតនៅក្នុងចំណាត់ថ្នាក់ទាបក្រោមលេខចំណាត់ថ្នាក់ ៥០។ ប៉ុន្តែប្រទេសមីយ៉ានម៉ាមិនបានរាប់ចូលនៃការវាយតម្លៃនេះទេ។ របាយការណ៍នេះក៏បានកោតសរសើរប្រទេសម៉ាឡេស៊ីថាជាប្រទេសមានសេដ្ឋកិច្ចជឿនលឿនយ៉ាងខ្លាំងដែលមានប្រទេសឥណ្ឌូណេនី ស៊ីហ្វីលីពីន វៀតណាម ថៃ និងប្រ៊ុយណេកំពុងរត់តាមប្រកិតតាមពីក្រោយ។ ទោះជាយ៉ាងណាក៏ដោយទីផ្សារដែលកំពុងរីកចម្រើនដូចជាប្រទេសកម្ពុជានិងឡាវមានការរីកចំរើនច្រើនប៉ុន្តែងាយរងគ្រោះដោយការរង្គោះរង្គើភ្លាមៗដូចជាការកើនឡើងនៃអត្រាការប្រាក់នៅក្នុងសេដ្ឋកិច្ចជឿនលឿននិងការកើនឡើងនៃភាពតានតឹងពាណិជ្ជកម្ម។ មិនមែនជាល្បែងបូកបានសូន្យទេ ការរួមបញ្ចូលគ្នានិងការប្រកួតប្រជែងគឺមានសារៈសំខាន់ដូចគ្នា។ ដូចនេះ ការបញ្ចូលរួមគ្នានិងការបង្កើនសមិទ្ធិផលក្នុងពេលតែមួយគឺអាចកើតឡើងបាន។ ដូច្នេះរបាយការណ៍នេះមានការលើកទឹកចិត្តដល់គោលនយោបាយបែងចែក កត្តាប្រាក់ចំណេញ  ការវិនិយោគលើមូលធនមនុស្ស ក៏ដូចជាការបង្កើនពន្ធបន្ថែមទៀតក្នុងគោលបំណងដោះស្រាយវិសមភាព។ លោកស្រី Saadia Zahidi ជាសមាជិកក្រុមប្រឹក្សាភិបាលនិងជាប្រធានមជ្ឈមណ្ឌលសេដ្ឋកិច្ចនិងសង្គមថ្មីបាននិយាយថា "ការប្រកួតប្រជែងមិនមែនជាការប្រកួតប្រជែងឬជាល្បែងសូន្យនោះទេ ដែលនេះមានន័យថាប្រទេសទាំងអស់អាចមានភាពរុងរឿងជាងមុន" ។ ហើយលោកស្រីក៏បានផ្ដល់យោបល់ថាត្រូវតែពង្រឹងតម្រូវការសម្រាប់វិធីសាស្ត្រទូលំទូលាយក្នុងការបង្កើនការប្រកួតប្រជែងជាពិសេសនៅពេលមានការច្នៃប្រឌិតព្រោះថាការដែលមានចំណុចទាំងអស់នេះគឺនឹងជំរុញឲ្យមានការរីកចម្រើនក្នុងបដិវត្តឧស្សាហកម្មជំនាន់ទី ៤ ដែលជះឥទ្ធិពលដល់កំណើនសេដ្ឋកិច្ចរបស់ពិភពលោក។ តួនាទីសំខាន់របស់រាជរដ្ឋាភិបាលគឺត្រូវយកចិត្តទុកដាក់លើបញ្ហាអភិវឌ្ឍដទៃទៀត ដូចជាអភិបាលកិច្ច ហេដ្ឋារចនាសម្ព័ន្ធ និងការបណ្តុះបណ្តាលជំនាញ។ ដោយសារតែបច្ចុប្បន្នគឺការប្រកួតប្រជែងផ្នែកសេដ្ឋកិច្ចមានការអភិវឌ្ឍខ្លាំងដោយមានអំណោយផលពីវិស័យបច្ចេកវិទ្យាទំនើបៗ។ ហើយក៏មានផលវិបាកមួយចំនួនដែលបានកើតឡើងមកជាមួយសម័យបច្ចេកវិទ្យានេះដែរ ដែលជំរុញឲ្យរាជរដ្ធាភិបាលនិងសា្ថប័នអាជីវកម្មផ្សេងៗព្យាយាមសម្របខ្លួនទៅនឹងការផ្លាស់ប្ដូរនេះដើម្បីអាចទទួលបានសមិទ្ធផលល្អប្រសើរក្នុងពេលខាងមុខ៕ ដោយ៖​ នឿន វណ្ណៈ