វិស័យឧស្សាហកម្មកម្ពុជាត្រូវបានរំពឹងថានឹងមានកំណើន១១%ក្នុងឆ្នាំ២០១៩នេះ
វិស័យឧស្សាហកម្មបានដើរតួនាទីយ៉ាងសំខាន់នៅក្នុងការជម្រុញកំណើនសេដ្ឋកិច្ចជាតិ។តាមរយៈរបាយការណ៍ប្រចាំឆ្នាំរបស់ធនាគារជាតិនៃកម្ពុជាបានបង្ហាញថា នៅឆ្នាំ២០១៩វិស័យឧស្សាហកម្មកម្ពុជាត្រូវបានរំពឹងថានឹងមានកំណើនប្រមាណ១១% ដោយវិស័យនេះបន្តគាំទ្រជាចម្បងដោយ កំណើននៃវិស័យកម្មន្តសាល និងវិស័យសំណង់។ វិស័យឧស្សាហកម្មមានកំណើន ១០,៤% ធៀបនឹង ៩,៧% នៅឆ្នាំ២០១៧ ហើយបានរួមចំណែកប្រមាណ ៣៤,៩% ក្នុង ផ.ស.ស។
វិស័យកម្មន្តសាលអាចផ្ដល់ឱកាសការងារដល់ប្រជាជនបានប្រមាណជា១លាននាក់ ក្នុងនោះចំនួនពលកម្មកាត់ដេរសម្លៀកបំពាក់និងស្បែកជើងមានចំនួនប្រមាណ ៨០ម៉ឺននាក់។ ចំនួនរោងចក្រសរុបមានប្រមាណ ១.៥៨៥ រោងចក្រ កើនឡើង ៤,១% ធៀបនឹងឆ្នាំ២០១៧ ក្នុងនោះរោងចក្រដែលបានបើកថ្មីមានចំនួន ១៤៦ រោងចក្រ។ ការនាំចេញផលិតផលកាត់ដេរសម្លៀកបំពាក់និងស្បែកជើងនៅឆ្នាំ២០១៨ សម្រេចបានប្រមាណ ១០ ប៊ីលានដុល្លារអាមេរិក (៧៣,៧% នៃការនាំចេញសរុប) និងបានកើនឡើងគួរឲ្យកត់សម្គាល់ក្នុងអត្រា ២៤,៧%។
វិស័យសំណង់ បានបន្តនូវកំណើនយ៉ាងរឹងមាំដែលបានទាក់ទាញវិនិយោគិនជាច្រើន និងបានរួមចំណែកកាន់តែច្រើនក្នុងកំណើនសេដ្ឋកិច្ចជាតិ។ កាលពីកំឡុងឆ្នាំ២០១៨ វិស័យសំណង់ត្រូវប៉ាន់ស្មានថាមានការថមថយល្បឿនមកត្រឹម១៧% (១៨% ក្នុងឆ្នាំ២០១៧) ដែលបានរួមចំណែកប្រមាណ ១/៥ នៅក្នុងកំណើនសេដ្ឋកិច្ច។ វិស័យនេះបានផ្ដល់ឱកាសការងារឲ្យអ្នកជំនាញ និងកម្មករបានប្រមាណជា ២២ ម៉ឺននាក់ ដែលធ្វើការតាមការដ្ឋានសំណង់ទូទាំងប្រទេស និងវិនិយោគិនបរទេសភាគច្រើនមកពីប្រទេសចិន កូរ៉េ ជប៉ុន ថៃ តៃវ៉ាន់ សិង្ហបុរី និងអង់គ្លេស។
បើទោះបីជាវិស័យឧស្សាហកម្មនៅតែបន្តមានកំណើនទៅមុខ ប៉ុន្តែបញ្ហាប្រឈមនៅតែបន្តកើតមាន ពិសេសវិស័យកាត់ដេរសម្លៀកបំពាក់និងស្បែកជើង នៅតែប្រឈមនឹងបញ្ហារក្សាថ្លៃប្រកួតប្រជែងក្នុងតំបន់ (វៀតណាម បង់ក្លាដែស និងមីយ៉ាន់ម៉ា)។ ប្រាក់ឈ្នួលអប្បបរមារបស់កម្ពុជាត្រូវបានតំឡើង ១៥៣ដុល្លារអាមេរិក ក្នុង១ខែ នៅឆ្នាំ២០១៧ និងដល់១៧០ ដុល្លារអាមេរិកក្នុងឆ្នាំ២០១៨ ដែលប្រហាក់ប្រហែលនិងប្រទេសវៀតណាម តែខ្ពស់ជាងបង់ក្លាដែស និងមីយ៉ាន់ម៉ា។ ហើយនៅឆ្នាំ២០១៩ខាងនេះ ប្រាក់ឈ្នួលអប្បបរមាកម្ពុជានិងត្រូវដំឡើងដល់ ១៨២ ដុល្លារអាមេរិក៕
អត្ថបទដោយ៖ ជួប ស្រីរ័ត្ន
