លោក Tim Cook៖ នៅលើលោកនេះមានមនុស្សគិតអវិជ្ជមានច្រើនណាស់ បើចង់ជោគជ័យអ្នកត្រូវដកខ្លួនចេញពីពួកគេ
នាយកប្រតិបត្តិក្រុមហ៊ុន Apple លោក Tim Cook បានផ្តល់ដំបូន្មានឲ្យយុវជនទាំងអស់ត្រូវតែប្រកាន់ជំហរជាមនុស្សដែលមានគំនិតវិជ្ជមានជានិច្ច។ ទន្ទឹមនឹងនេះលោកក៏បានលើកឡើងដែរថា ពេលខ្លះក៏ត្រូវតែធ្វើគរធ្វើថ្លង់ឲ្យបានឆ្លាតបំផុតខ្លះដែរជាមួយមនុស្សមួយចំនួន។
នាយកប្រតិបត្តិរូបនេះបានលើកឡើងដូច្នេះថា៖ « នៅក្នុងបរិបទសម័យបច្ចុប្បន្ន ពិភពលោកនេះពោរពេញទៅដោយមនុស្សមានគំនិតអវិជ្ជមាន ហើយអ្នកត្រូវនៅឲ្យឆ្ងាយពីពួកគេ មិនត្រូវទុកមនុស្សទាំងនេះឲ្យនៅត្រាំត្រែងក្នុងជីវិតរបស់អ្នកឡើយ»។ នេះជាការថ្លែងរបស់លោកទៅកាន់និស្សិតជាច្រើននៅក្នុងសាកលវិទ្យាល័យមួយនៃប្រទេសស្កុតឡែន។
លោកបន្តថា៖« ប្រសិនបើអ្នកមិនធ្វើបែបនេះទេ មនុស្សទាំងនេះនឹងក្លាយជាជំងឺមហារីកខួរក្បាលរបស់អ្នកដែលធ្វើឲ្យការគិតរបស់អ្នកក្នុងផ្លូវអវិជ្ជមាន ឬក៏ថា អ្នកមិនអាចធ្វើឲ្យជីវិតរបស់អ្នកធ្វើអ្វីបានតាមអ្វីដែលអ្នកចង់បាននោះឡើយ។ នៅពេលអ្នកមានគំនិតវិជ្ជមានច្រើន វានឹងប៉ះពាល់ដល់របៀបគិតរបស់អ្នកទៅលើមនុស្សជុំវិញខ្លួន»។
លោកបានថ្លែងទៀតថា៖« អ្វីដែលយើងរំពឹងទុកនោះ គឺចង់ឃើញពិភពលោកមានការផ្លាស់ប្ដូរចេញពីអ្វីដែលយើងបានឃើញ។ ប៉ុន្តែមនុស្សទាំងនេះអាចទាញយើងទម្លាក់ទឹកបាន ដូច្នេះយើងត្រូវមានគំនិតវិជ្ជមាន និងមានសុទិដ្ឋិនិយម។ គំនិតសុទិដ្ឋិនិយមមិនត្រឹមតែជាផ្នែកមួយនៃគំនិតជោគជ័យប៉ុណ្ណោះទេ ប៉ុន្តែវាថែមទាំងនាំយើងឲ្យជោគជ័យផងដែរ»។
លោកបានផ្តល់ដំបូន្មានបន្ថែមថា៖« ភាពសុទិដ្ឋិនិយមនាំឲ្យយើងជោគជ័យក្នុងសាលា កីឡា នយោបាយ ជំនួញ និងជីវិតរបស់យើងឲ្យស្រស់ថ្លា។ ហើយរឿងដែលល្អបំផុតនោះគឺថា សុទិដ្ឋិនិយមមានគុណប្រយោជន៍ខ្លាំងដល់សុខភាពរបស់យើងទៀតផង។ បើយើងរំពឹងថា យើងនឹងមានអនាគតល្អនៅថ្ងៃខាងមុខ ការធ្លាក់ទឹកចិត្ត អារម្មណ៍តានតឹងផ្លូវចិត្ត និងភាពនឿយហត់របស់យើងនឹងអាចកាត់បន្ថយបាន»។
ប៉ុន្តែលោកTim Cook បានលើកយោបល់ថា ចង់ក្លាយជាមនុស្សម្នាក់មានសុទិដ្ឋិនិយមវាមិនមែនជារឿងមួយងាយស្រួលនោះឡើយ ហើយវាទាមទារឲ្យអ្នកត្រូវតែដើរគេចចេញពីក្រុមមនុស្សមានគំនិតអវិជ្ជមានមួយចំនួន។
«ទោះបីមនុស្សមានគំនិតអវិជ្ជមានជាមិត្តភក្ដិស្និតស្នាលរបស់អ្នកក៏ដោយ អ្នកក៏ត្រូវលះបង់ពួកគេចេញពីជីវិតអ្នកផងដែរ។ ពីព្រោះថាពេលខ្លះបើអ្នកអនុញ្ញាតឲ្យមនុស្សទាំងនេះមករួមរឹតធ្វើជាមិត្តសម្លាញ់ក្នុងជីវិតរបស់អ្នកតទៅទៀត អ្នកនឹងចាប់ផ្តើមមានអារម្មណ៍ដូចពួកគេជាមិនខាន»។ លោក Tim Cook បន្ថែម។
យ៉ាងណាមិញលោកថា មនុស្សដែលយើងរាប់អានមិនមែនសុទ្ធតែជាប្រភេទមនុស្សបែបនេះទាំងអស់នោះទេ។ ប៉ុន្តែធ្វើយ៉ាងណាអ្នកកុំចាយពេលច្រើនពេកជាមួយមនុស្សប្រភេទនេះ។ អ្នកត្រូវចំណាយពេលឲ្យបានច្រើនបំផុតជាមួយមនុស្សមានគំនិតវិជ្ជមាន ចំណាយពេលរៀនសូត្រ ចំណាយពេលលើការងារដែលមានប្រយោជន៍ គឺជារឿងល្អបំផុត៕
ប្រភព៖ cnbc
