សេចក្ដីព្រាងច្បាប់ថវិកាឆ្នាំ២០១៩៖ រាជរដ្ឋាភិបាលត្រៀម ១០០លានដុល្លារសម្រាប់បង្កើត SME Bank
ទឹកប្រាក់ចំនួន ៤០៥,០០០លានរៀលឬសមមូលនឹងទឹកប្រាក់ ១០០លានដុល្លារអាមេរិក នឹងត្រូវបានគ្រោងយកមកប្រើប្រាស់សម្រាប់ផ្ដល់ទុកដល់ការបង្កើតធនាគារសហគ្រាសធុនតូច និងមធ្យម (SMEs Bank) របស់រដ្ឋ។ នេះដោយយោងតាមសេចក្ដីព្រាងច្បាប់ថវិកាជាតិឆ្នាំ២០១៩ ដែលចុះផ្សាយដោយហ្វេសប៊ុកផេករបស់ ក្រសួងសេដ្ឋកិច្ច និងហិរញ្ញវត្ថុកាលពីពេលថ្មីៗនេះ។
តាមរយៈសេចក្ដីព្រាងច្បាប់ថវិកាជាតិឆ្នាំ២០១៩ ចំណូលក្នុងប្រទេសថវិការដ្ឋ ឬថវិកាជាតិ ត្រូវបានគ្រោងចំនួន ២១ ១៨៦ ២២៨ លានរៀល ស្មើរនឹង ១៩,២៨%នៃ ផសស និងមានកំណើន១៤,០%ធៀបនឹងច្បាប់ឆ្នាំ២០១៨ ចំណែកឯចំណាយសរុបថវិការដ្ឋ ឬថវិកាជាតិត្រូវបានគ្រោងចំនួន ២៧ ១៦៤ ៩៩៦ លានរៀលស្មើរនឹង ២៤,៧២%នៃ ផសស នឹងមានកំណើន១១,៤% ធៀបនឹងច្បាប់ឆ្នាំ២០១៨។
ជាលទ្ធផល អតិរេកថវិកាចរន្ត អាចរក្សាបានក្នុងកម្រិតប្រមាណ២,៨១% នៃផសស នៅឆ្នាំ២០១៩ និងមានឱនភាពថវិកាសរុប ស្មើរនឹង -៥,៤៤%នៃ ផសស ស្របតាមគោលនយោបាយពង្រឹងការគ្រប់គ្រងថវិកា (Fiscal Consolidation) ។
ឱនភាពនេះត្រូវបានបំពេញបន្ថែមដោយហិរញ្ញប្បទានក្រៅប្រទេសក្នុងទំហំ ៤,៨៤%នៃ ផសស, មូលនិធិទ្រទ្រង់ថវិកាប្រមាណ ០,២៣%នៃ ផសស និងប្រាក់បញ្ញើរាជរដ្ឋាភិបាលក្នុងទំហំ ០,៣៧%នៃ ផសស ស្មើរនឹង ៤០៥ ០០០លានរៀល ឬសមមូលនឹង ១០០លានដុល្លារអាមេរិក ដែលត្រូវបានគ្រោងយកមកប្រើប្រាស់សម្រាប់ផ្ដល់ទុនដល់ការបង្កើតធនាគារសហគ្រាសធុនតូច និងមធ្យម (SMEs Bank) របស់រដ្ឋ។
ដូច្នេះ បើមិនគិតអំពីតម្រូវការទុនសម្រាប់បង្កើតធនាគារធុនតូច និងមធ្យម គឺថវិកាឆ្នាំ២០១៩ មានតុល្យភាព ដោយមិនចាំបាច់ប្រើប្រាស់បញ្ញើ ឬហៅថា ប្រាក់សន្សំ របស់រាជរដ្ឋាភិបាលនោះទេ៕
ដូច្នេះ បើមិនគិតអំពីតម្រូវការទុនសម្រាប់បង្កើតធនាគារធុនតូច និងមធ្យម គឺថវិកាឆ្នាំ២០១៩ មានតុល្យភាព ដោយមិនចាំបាច់ប្រើប្រាស់បញ្ញើ ឬហៅថា ប្រាក់សន្សំ របស់រាជរដ្ឋាភិបាលនោះទេ៕
