មានរឿងមួយដែល Jack Ma ធ្លាប់ស្អប់ Bill Gates កាលនៅពីក្មេង
អ្នកណាខ្លះដែលមិនទទួលស្គាល់ថា លោក Bill Gates គឺជាអ្នកមានជាងគេបំផុតមួយរូបនៅលើសាកលលោក និងបានដើរតួនាទីយ៉ាងសំខាន់ផ្តល់ជាគំរូសម្រាប់សហគ្រិនជាច្រើននោះ។ ប៉ុន្តែមហាសេដ្ឋីរូបនេះ ក៏ធ្លាប់ត្រូវបានស្អប់ខ្ពើមដោយលោក Jack Ma កាលនៅជាអតីតគ្រូបង្រៀនអង់គ្លេសម្នាក់។ តើហេតុអ្វីបានលោក Jack Ma ធ្លាប់ស្អប់លោក Bill Gates?
ថ្លែងនៅក្នុងកិច្ចប្រជុំកំពូលស្តីពីភាពច្នៃប្រឌិតនៅទីក្រុង Tel Aviv ប្រទេសអ៊ីស្រាអែលកាល ពីថ្ងៃព្រហស្បតិ៍ម្សិលមិញ លោក Jack Ma បានសារភាពដូច្នេះថា៖« កាលពីខ្ញុំនៅក្មេងខ្ញុំស្អប់ Bill Gates ខ្លាំងណាស់ ព្រោះខ្ញុំគិតថា ម្នាក់នេះបានដណ្តើមយកការងារសព្វបែបយ៉ាងទាំងអស់។ ក្រុមហ៊ុន IBM ក្រុមហ៊ុន Oracle បានក្តោបយកឱកាសពីខ្ញុំអស់ទៅហើយ»។
លោកបានបន្តថា នៅពេលលោកបើកក្រុមហ៊ុន Alibaba ដំបូងនៅក្នុងឆ្នាំ ១៩៩៩ លោកជឿថា ក្រុមហ៊ុនរបស់លោកបានជួបការលំបាកនៅក្នុងការចូលប្រឡូកក្នុងវិស័យបច្ចេកវិទ្យានេះ ព្រោះបើធៀបក្រុមហ៊ុនផ្សេងៗគេមានអ្វីៗរួចអស់ទៅហើយ។ ប៉ុន្តែក្រោយមក សេដ្ឋីរូបនេះក៏បានដឹងថា នោះមិនមែនដោយសារក្រុមហ៊ុន Bill Gates ឬក្រុមហ៊ុនអ្នកណាផ្សេងខ្លាំងជាងក្រុមហ៊ុនលោកនោះទេ។
លោកថា ខ្លួនលោកផ្ទាល់ទេដែលជាអ្នកឃុំឃាំងខ្លួនឯងមិនឲ្យចេះឆក់យកឱកាសដោយចេះតែយកលេសទម្លាក់កំហុសនេះទម្លាក់កំហុសនោះ។ លោកយល់ឃើញបែបនេះថា៖« មនុស្សភាគច្រើនចូលចិត្តត្អូញត្អែរពីបញ្ហានេះបញ្ហានោះ ទម្លាក់កំហុសទៅអ្នកនេះអ្នកនោះមិនចេះចប់។ ប៉ុន្តែបើអ្នកអាចដោះស្រាយបញ្ហាទាំងនោះបាន នោះហើយគឺជាឱកាស»។
សម្រាប់លោក លោកបានរៀនសូត្រថា ក្រុមហ៊ុនរបស់លោកគួរតែរៀនសូត្រ អភិវឌ្ឍ និងចេះច្នៃប្រឌិតអ្វីម្យ៉ាងឲ្យកាន់តែទំនើបជាងមុន មិនមែននៅតែមួយកន្លែងនោះឡើយ។ លោក Jack បានបន្តថា៖« យើងត្រូវតែមានគំនិតច្នៃប្រឌិត និងការបង្កើតថ្មីៗជាប្រចាំ។ យើងបង្កើតបច្ចេកវិទ្យាមួយដែលមានលក្ខណៈងាយស្រួលជាងមុន។ ការបង្កើតថ្មីចេះតែមានឡើងមិនមែនដោយសារតែមនុស្សចង់ធ្វើនោះទេ ប៉ុន្តែដោយសារតែការផ្លាស់ប្ដូររបស់ពិភពលោកបានបង្ខំឲ្យយើងធ្វើបែបនេះ»។ ហេតុនេះហើយបានជាមហាសេដ្ឋីរូបនេះអះអាងថា Alibaba មានវត្តមានមកដល់សព្វថ្ងៃនេះដោយសារតែក្រុមហ៊ុននេះបានដោះស្រាយបញ្ហាជាច្រើនរបស់អតិថិជននៅក្នុងវិស័យអនឡាញ។ Alibaba មិនអាចដកដង្ហើមបានទេបើគ្មានគំនិតថ្មី ឈាមថ្មីសម្រាប់ប្រកួតប្រជែងជាមួយក្រុមហ៊ុនយក្សនៅលើទីផ្សារសាកលលោក៕
សូមអានអត្ថបទ៖ Jack Ma៖ មិនថាចាស់ឬក្មេង ត្រូវសួរខ្លួនឯង ៣ សំណួរនេះ ពេលបើកក្រុមហ៊ុន
ប្រភព៖ cnbc
