លោក កែវ បណ្ឌិត ស្ថាបនិកក្រុមហ៊ុន AKworld៖ ៥ គន្លឹះដើម្បីជោគជ័យអាជីវកម្មផ្នែក E-commerce
ភាពជោគជ័យមិនប្រាកដថា មនុស្សគ្រប់គ្នាសុទ្ធតែអាចទទួលបាននោះទេ ស្របគ្នានេះដែរលោក កែវ បណ្ឌិត ស្ថានិកក្រុមហ៊ុន AKworld Online Mall មានប្រសាសន៍ថា អ្វីដែលយើងធ្វើ គឺយើងរំពឹងថា ជោគជ័យតែមិនប្រាកដ១០០%ថាជោគជ័យនោះទេ ប៉ុន្តែពិតជាមានមនុស្សមួយចំនួនដែលអាចធ្វើបានជោគជ័យ ដូច្នេះថាតើយើងគួរមានចំណេះដឹងអ្វីខ្លះដើម្បីអាចជោគជ័យអាជីវកម្មបាន? ខាងក្រោមនេះគឺជាការចែករម្លែករបស់លោក កែវ បណ្ឌិត នូវគន្លឹះទាំង៥ដើម្បីជោគជ័យផ្នែកអាជីវកម្ម៖
ចំណុចទី១ ត្រូវមានផ្នត់គំនិតជោគជ័យ៖ យើងត្រូវមានផ្នត់គំនិតជោគជ័យផ្ដើមចេញពីខ្លួនឯងដំបូងបំផុត ព្រោះថាជាទូទៅមនុស្សមួយចំនួន ធ្វើអាជីវកម្មដើម្បីតែបង្ហាញ ឬដើម្បីតែបង្អួតអ្នកដទៃប៉ុណ្ណោះ ប៉ុន្តែមិនបានធ្វើដោយការតាំងចិត្តឬដោយក្ដីស្រលាញ់នោះទេ នោះហើយគឺជាផ្នត់គំនិតអវិជ្ជមាន ដូច្នេះផ្នត់គំនិតជោគជ័យ ចង់សំដៅទៅលើការតាំងចិត្តនិងការមានជំនឿចិត្តចំពោះខ្លួនឯងក្នុងការធ្វើរឿងអ្វីមួយដើម្បីសម្រេចក្ដីសុបិនរបស់យើង។ ទន្ទឹមនឹងនោះផងដែរ ក៏តម្រូវឲ្យយើងត្រូវតែមានការលះបង់ខ្ពស់ផងដែរដើម្បីជោគជ័យ។
ចំណុចទី២ ចេះបង្កើតក្រុមការងារ Team work៖ យើងត្រូវចេះជ្រើសរើសដៃគូ ដែលល្អ គឺសំដៅលើយការជ្រើសរើសដៃគូដែលអាចបំពេញឲ្យគ្នានៅក្នុងអាជីវកម្ម មានន័យថា បើយើងចេះជំនាញផ្នែកហិរញ្ញវត្ថុ ដូច្នេះដៃគូ ៤ទៅ៥នាក់ផ្សេងទៀតត្រូវមានជំនាញផ្សេងៗគ្នា ដែលពាក់ព័ន្ធទៅនឹងអាជីវកម្មនោះ។ ក្រៅពីនោះយើងក៏ត្រូវមានទំនាក់ទំនងល្អផងដែរដើម្បីបំពេញបន្ថែមឲ្យអង្គភាពកាន់តែរឹងមាំ។
ចំណុចទី៣ មានភាពជាអ្នកដឹកនាំ៖ ក្នុងនាមជាអ្នកដឹកនាំក្រុម ប្រៀបដូចជាគ្រូដូច្នោះដែរ ដូច្នេះបើយើងចង់ឲ្យក្រុមការងាររបស់យើងខ្លាំងគឺទាល់តែយើងជាអ្នកបណ្ដុះបណ្ដាលផ្ទាល់ យើងត្រូវដឹកនាំពួកគាត់ និងបង្រៀនពួកគាត់ពីរបៀបគ្រប់គ្រងនិងធ្វើការងារដើម្បីឲ្យពួកគាត់យល់ពីអ្វីដែលពួកគាត់ត្រូវធ្វើ និងអ្វីដេលក្រុមហ៊ុនចង់បាន។
ចំណុចទី៤ បង្កើនទំនឿចិត្តដល់ក្រុមការងារ៖ យើងត្រូវធ្វើឲ្យអង្គភាពទាំងមូល មានទំនុកចិត្តនិងជំនឿមកលើទស្សនវិស័យរបស់យើង មានន័យថា បើសិនជាយើងជឿជាក់តែទៅលើខ្លួនឯង តែបែជាមិនអាចធ្វើឲ្យសមាជិកក្រុមមានជំនឿមកលើយើងនោះទេ អាជីវកម្មក៏មិនអាចដំណើរការបានល្អដែរ។ ដូច្នេះយើងត្រូវតែបង្កើននូវជំនឿកម្រិតខ្ពស់ និងផ្ទេរនូវទស្សនៈវិស័យរបស់យើងឲ្យទៅកូនក្រុមឬសមាជិកក្រុមរបស់យើងឲ្យគាត់មានជំនឿមកលើយើងកាន់តែខ្លាំងឡើង។
ចំណុចទី៥ គឺ ត្រូវបង្កើនចំណេះដឹងផ្នែកTechnology៖ យើងត្រូវមានការយកចិត្តទុកដាក់ទៅលើប្រព័ន្ធបច្ចេកវិទ្យា ព្រោះសម័យបច្ចុប្បន្នប្រព័ន្ធបច្ចេកវិទ្យាបានដើរតួនាទីយ៉ាងសំខាន់ស្ទើរតែគ្រប់វិស័យ ហើយសម្រាប់អាជីវកម្មផ្នែកវេបសាយពាណិជកម្មដូចជាក្រុមហ៊ុនរបស់លោកវិញគឺរិតតែចាំបាច់ត្រូវតែពង្រឹងការយល់ដឹងផ្នែកបច្ចេកវិទ្យានេះ ចំពោះបច្ចេកវិទ្យាដែលគួរពង្រឹងសម្រាប់អាជីវកម្មប្រភេទនេះមានដូចជា big data, AI, blog change technology ជាដើម៕
អត្ថបទ៖ ជួប ស្រីរ័ត្ន
