ចំណុចខ្លាំង ៣ យ៉ាងធ្វើឱ្យថៃ ក្លាយជាមេផលិតរថយន្ត នៅអាស៊ីអាគ្នេយ៍
បច្ចុប្បន្នថៃកំពុងឈរនៅលេខរៀងទី ១ នៅអាស៊ីអាគ្នេយ៍ ជាប្រទេសផលិតរថយន្តធំបំផុត និងឈរលេខរៀងទី ១២ លើពិភពលោក។ មិនតែប៉ុណ្ណោះ ប្រទេសជាប់ភូមិផងរបងជាមួយកម្ពុជានេះ ក៏ជាទីផ្សាររថយន្ត Pick Up ធំបំផុទី២លើលោក បន្ទាប់ពីអាមេរិកផងដែរ។ តើអ្វីធ្វើឱ្យថៃក្លាយជាប្រទេសផលិតរថយន្តធំបែបនេះ?
អំពីពន្ធ ទីតាំង កិច្ចព្រមព្រៀងពាណិជ្ជកម្មសេរី និងតម្លៃពលកម្ម អស់រយៈពេល៣ទសវត្សមកហើយ ដែលថៃបានកំណត់ពន្ធនាំចូលរថយន្ត ៨០% និងម៉ូតូ ៦០% ដើម្បីរក្សាការផលិតក្នុងប្រទេស។ រដ្ឋាភិបាលបានផ្ដល់ជូនសិទ្ធិកាន់កាប់ដីធ្លី ចំពោះវិនិយោគិនបរទេស និងទិដ្ឋការវិនិយោគ និងច្បាប់អនុញ្ញាតដោយរលូនសម្រាប់ទីប្រឹក្សាវិនិយោគបរទេស។ មិនតែប៉ុណ្ណោះ ថៃបានចេញពន្ធលើកទឹកចិត្តជាច្រើន ទៅឱ្យអ្នកវិនិយោគបរទេស រួមមានក្រុមហ៊ុនណា ដែលមកវិនិយោគនៅប្រទេសថៃ នឹងទទួលបានការលើកលែងពន្ធលើប្រាក់ចំណេញ ៨ឆ្នាំ តួយ៉ាង ក្នុងខេត្ត រ៉ាក់យ៉ង ដែលមូលដ្ឋានរបស់ក្រុមហ៊ុនរថយន្ត GM និង Ford ត្រូវបានរដ្ឋាភិបាលប្រទេសនេះ បន្ថយពន្ធលើប្រាក់ចំណេញដល់ទៅ ៥០%។ ហេតុផលធ្វើឱ្យថៃក្លាយជាឧស្សាហកម្មរថយន្តធំ ព្រោះថៃមានទឹកដីភូមិសាស្ត្រល្អ ជាពិសេស មានកំពង់ផែ និងប្រលានយន្តហោះ ដែលផ្ដល់ភាពងាយស្រួលក្នុងការនាំចេញ។ មិនដូចប្រទេសគូប្រជែងម៉ាឡេស៊ី ដែលគ្រឿងបន្លាស់ភាគច្រើន ផ្គត់ផ្គង់ដោយក្រុមហ៊ុនបរទេស (Suppliers)។ ដោយឡែកកិច្ចព្រមព្រៀងពាណិជ្ជកម្មសេរី ជាមួយប្រទេសអាស៊ាន៩ ធ្វើឱ្យក្រុមហ៊ុនផលិតរថយន្តនៅថៃ គ្មានការបង់ពន្ធ (Zero Tax) ឬកាត់បន្ថយពន្ធក្នុងកម្រិតខ្ពស់ សម្រាប់នាំចេញរថយន្តទៅក្នុងតំបន់។ ម្យ៉ាងតម្លៃការងារក្នុងប្រទេសថៃ ទាបជាងបណ្ដាប្រទេសអភិវឌ្ឍន៍ និងមហាអំណាចចិន ហើយបើទោះមិនទាបជាងប្រជាជាតិនៅអាស៊ានខ្លាំង ប៉ុន្តែកម្លាំងពលកម្ម ពោរពេញដោយជំនាញ និងបទពិសោធន៍ ។
កំណើនប្រជាជនជីវភាពមធ្យមផ្ទុះឡើងខ្លាំង ខណៈអត្រាលក់រថយន្តក៏កើនឡើង ក្នុងឆ្នាំ២០០២ វិទ្យាស្ថានឧស្សាហកម្មរថយន្ត បានប្រកាសគម្រោងផ្លាស់ប្ដូរថៃទៅជា "the Detroit of Asia”។ រវាងឆ្នាំ២០០០ និង២០១៧ ផលិតកម្មរថយន្តថៃ បានកើនឡើង ៣៨៣%។ បើទោះការនាំចេញមានតែ៦០% នៃផលិតកម្មសរុបក្ដី តែទីផ្សារក្នុងស្រុកមានការលូតលាស់ ដោយសារកំណើនប្រជាជនជីវភាពមធ្យម (Middle class)។ បើតាមការឱ្យដឹងពី Nielsen Global នៃតម្រូវការរថយន្ត មានគ្រួសារតែត្រឹមតែ ១៨%ប៉ុណ្ណោះ ដែលគ្មានរថយន្តប្រើកាលពីឆ្នាំ២០១៣ ហើយតាមការវាយតម្លៃ របស់អង្គការ កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍ ប្រជាជនជីវភាពមធ្យមនឹងកើនឡើងច្រើនជាង២ដង ពោលគឺ ៤០០ លាននាក់នៅឆ្នាំ ២០២០។ ថៃពូកែផលិតរថយន្តពាណិជ្ជកម្ម (Commercial vehicles) ជាពិសេសរថយន្ត Pick Up ចំណុះ១តោន ដូចជា Chevrolet Colorado និង Ford Range។ ថៃជាប្រទេសទីផ្សាររថយន្ត Pick Upធំលំដាប់ទី ២លើពិភពលោក បន្ទាប់ពីអាមេរិក។ GM ផលិតតែរថយន្ត២ប្រភេទប៉ុណ្ណោះក្នុងប្រទេសជាប់របងកម្ពុជានេះ គឺ Colorado និង Chevy Trailblazer ប្រភេទSUV មានចំណែកទីផ្សារ ៤២%។ ចាប់តាំងពីឆ្នាំ២០០០មក GM បានវិនិយោគច្រើនជាង២ពាន់លានដុល្លារ លើការផលិតក្នុងខេត្ត Rayong។ ថៃផលិតបានរថយន្តពាណិជ្ជកម្ម ១,២ពាន់លានគ្រឿង បើធៀបឆ្នាំ២០១៧ មានតែ ៨១៨, ០០០ គ្រឿងប៉ុណ្ណោះ។ នៅរយៈពេល៥ខែឆ្នាំ២០១៨ អត្រាលក់រថយន្តសរុបក្នុងប្រទេសថៃ បានកើន១៨% ធ្វើឱ្យក្រុមហ៊ុនជាច្រើនសប្បាយចិត្ត ខណៈអ្នកនាំពាក្យ Mercedes-Benzដែលផលិតតែ Passenger Car ថា ឆ្នាំ២០១៧ ក្រុមហ៊ុនខ្លួនលក់បានច្រើនខ្លាំងជាងឆ្នាំណាៗទាំងអស់ ពោល១៤,០០០ គ្រឿង។
តើអ្វីជាគម្រោងផែនការអនាគត រដ្ឋាភិបាលថៃ ចង់ទាក់ទាញការផលិតរថយន្តថែរក្សាបរិស្ថាន និងអគ្គិសនី ដែលជាផ្នែកមួយនៃគម្រោងថ្មីចាយប្រាក់ ៤៥ពាន់លានដុល្លារឈ្មោះថា Eastern Economic Corridor ដែលបានអនុម័តហើយកាលពីខែកុម្ភៈ ឆ្នាំ ២០១៨។ ថៃនឹងរួមបញ្ចូលនូវគំនិតផ្ដួចផ្ដើម ផ្នែកការអភិវឌ្ឍន៍ និងពាណិជ្ជកម្ម ដើម្បីជំរុញឧស្សាហកម្មរថយន្តរបស់ខ្លួនក្នុងខេត្ត រ៉ាក់យ៉ង់ និងខេត្តផ្សេងទៀត។ ថៃនឹងបញ្ចុះពន្ធ និងផ្ដល់ជូនទិដ្ឋាការវិនិយោគ (Fast-track visas) រួមទាំងលទ្ធភាពអាចជួលដី រយៈបេល ៩៩ ឆ្នាំផងដែរ។ គណៈកម្មការវិនិយោគសហព័ន្ធថៃ បានព្យាករណ៍ថា ប្រទេសខ្លួននឹងផលិតបានរថយន្ត ៣ លានគ្រឿងក្នុងឆ្នាំ២០២០ រំកិខ្លួនទៅលំដាប់ថ្នាក់ទៅលេខ ៨ ក្នុងផលិតកម្មសរុបលើពិភពលោក៕
ដោយ៖ សុម៉ាលីន
