តើអាហារអ្វីខ្លះដែលអាចបង្កើនកម្រិតកូឡេស្តេរ៉ុលរបស់អ្នកបាន?
អាហារជាច្រើនបានត្រឹមតែឆ្ងាញ់ដល់រសរបស់អ្នកប៉ុណ្ណោះ តែវាមិនមានជីវជាតិបំប៉នអ្វីល្អសម្រាប់សុខភាពអ្នកនោះឡើយ ហើយមានតែធ្វើឲ្យកម្រិតកូឡេស្តេរ៉ុលរបស់អ្នកកើនឡើងទៅទៀត។ នៅពេលកម្រិតកូឡេស្តេរ៉ុលកើនឡើង នោះអ្នកងាយនឹងប្រឈមមុខទៅនឹងជំងឺបេះដូងបាន។ តើអាហារអ្វីខ្លះដែលអាចបង្កើនកម្រិតកូឡេស្តេរ៉ុលរបស់អ្នក ?
១) អាហារចៀនឬបំពងខ្លាញ់៖ មូលហេតុដែលអាហារចៀនឬបំពងខ្លាញ់បង្កើនកម្រិតកូឡេស្តេរ៉ុលរបស់អ្នក នេះក៏ព្រោះតែប្រភេទអាហារបែបនេះតែងសម្បូរដោយអាស៊ីដខ្លាញ់ឆ្អែតនិងជាតិសូដ្យូម និងអាស៊ីដខ្លាញ់មិនទាន់ឆ្អែតដែលត្រូវបានប្រើប្រាស់សម្រាប់យកទៅបំពងឬចៀនអាហាររបស់អ្នក។ នៅពេលអ្នកទទួលទានវា វាអាចបង្កើនកម្រិតកូឡេស្តេរ៉ុលរបស់អ្នក និងបង្កើនហានិភ័យរបស់អ្នកពីជំងឺបេះដូងបាន។
២) ការ៉េម៖ ការ៉េមគឺជាបង្អែមដ៏ពេញនិយមបំផុតមួយសម្រាប់មនុស្សជាច្រើន។ ប៉ុន្តែវាសម្បូរដោយអាស៊ីដខ្លាញ់ ដែលមិនមានផលល្អចំពោះសុខភាពបេះដូងរបស់អ្នកឡើយ។ ហេតុនេះបើអ្នកចង់ទទួលទានបង្អែម អ្នកគួរតែងាកទៅរកផ្លែឈើស្រស់ៗទើបជាការល្អ ព្រោះថាផ្លែឈើសម្បូរជាតិសរសៃនិងមានកាឡូរីទាប ថែមទាំងមានវីតាមីននិងសារធាតុបំប៉នដែលចាំបាច់សម្រាប់ទ្រទ្រង់រាងកាយអ្នកឲ្យមានសុខភាពល្អទៀតផង។
៣) សាច់គោស្តេក(steak)៖ ទទួលទានសាច់គោស្តេកប្រមាណ៤អោនស៍ឬស្មើនឹង១១៣ក្រាម អ្នកនឹងទទួលទានលើសពី៥០%នៃបរិមាណអាស៊ីដខ្លាញ់ឆ្អែតដែលបានកំណត់ក្នុង១ថ្ងៃ។ ដូច្នេះដើម្បីសុខភាពបេះដូងរបស់អ្នក និងដើម្បីកាត់បន្ថយការកើនឡើងនៃកម្រិតកូឡេស្តេរ៉ុល ជាជាងសាច់គោស្តេកអ្នកគួរតែទទួលទានសាច់ត្រី និងបន្លែផ្លែឈើឲ្យបានច្រើនវិញ។
៤) សាច់មាន់៖ សាច់មាន់ក៏ជាអាហារដែលអាចបង្កើនកម្រិតកូឡេស្តេរ៉ុលរបស់អ្នកដោយមិនដឹងខ្លួនដែរ ជាពិសេសគឺសាច់ដែលមានជាប់ស្បែក។ ជើងមាន់មានជាប់ស្បែក១ចំហៀងមានអាស៊ីដខ្លាញ់ច្រើនជាងហាំបឺហ្កឺទៅទៀត។ ម្យ៉ាងទៀតត្រង់ផ្នែកក្រមៅនៃសាច់មាន់ក៏មានអាស៊ីដខ្លាញ់ច្រើនជាងផ្នែកសដែរ។ អ្នកក៏គួរចងចាំផងដែរថា បើអ្នកយកសាច់មាន់ទៅបំពងក្នុងខ្លាញ់ នោះអ្នកក៏បានធ្វើឲ្យអាហារនេះមិនមានសុខភាពល្អសម្រាប់អ្នក៕
ដោយ៖ ស្រីពៅ
សូមអាន៖ ៣យ៉ាងដែលអ្នកគួរធ្វើ ដើម្បីមានបញ្ហាធ្ងន់ធ្ងរដល់សុខភាពបេះដូងរបស់អ្នក
