អាចទៅរួចទេដែលក្នុងពេលអនាគត មនុស្សយន្តនឹងអាចមានសតិដឹងពីអត្ថិភាពរបស់វាដូចជាមនុស្សយើងដែរ ?
ពីមួយថ្ងៃទៅមួយថ្ងៃ វិទ្យាសាស្ត្រនិងបច្ចេកវិទ្យានាពេលបច្ចុប្បន្ននេះមានភាពជឿនលឿនយ៉ាងខ្លាំងក្លា។ ជាឧទាហរណ៍ជាក់ស្ដែងដូចមានឡានដែលអាចបើកបរស្វ័យប្រវត្តិដោយខ្លួនវា ម៉ាស៊ីនដែលត្រូវបានបង្កើតឲ្យចេះសន្ទនាជាមួយមនុស្សដូចជា siri ដែលអ្នកនិយាយឆ្លើយឆ្លងជាមួយនៅក្នុងទូរស័ព្ទស្មាតហ្វូនរបស់អ្នក មនុស្សយន្តដែលអាចជំនួសការងារជាច្រើនប្រភេទរបស់មនុស្ស ហើយមិនយូរប៉ុន្មានក្នុងពេលអនាគត វានឹងអាចទៅរួចដែលអ្នកជំនាញនឹងអាចបង្កើតមនុស្សយន្តដែលឈ្លាសវៃខ្លាំងក្លា និងថែមទាំងអាចមានសតិដឹងពីអត្ថិភាពរបស់វាដូចជាមនុស្សរបស់យើងដូច្នោះដែរ។
បើមនុស្សយើងពិតជាអាចបង្កើតមនុស្សយន្តដែលមានសមត្ថភាពឈ្លាសវៃខ្លាំងក្លាបែបនោះប្រាកដមែន នោះវានឹងចោទជាបញ្ហាធំៗយ៉ាងច្រើនសម្រាប់មនុស្សជាតិរបស់យើង។ ក្នុងចំណោមបញ្ហាដ៏ចម្បងៗទាំងនោះមានដូចជាអត្រាអ្នកអត់ការងារធ្វើនឹងមានច្រើន ព្រោះជាក់ស្ដែងដូចពេលបច្ចុប្បន្ននេះជាតឹកតាងស្រាប់ គឺមានក្រុមហ៊ុនធំៗជាច្រើនដែលបានប្ដូរជំនួសកម្លាំងពលកម្មរបស់មនុស្សមកប្រើបច្ចេកវិទ្យាម៉ាស៊ីននិងមនុស្សយន្តវិញ។ នៅពេលដែលសង្គមមួយមានអ្នកអត់ការងារធ្វើច្រើន នោះវានឹងចោទជាបញ្ហាធំចម្បងបន្តទៀតដែលជាគម្លាតរវាងអ្នកមាននិងអ្នកក្រ ហើយបើអ្នកអត់ការងារធ្វើមានច្រើនហើយគម្លាតរវាងអ្នកមាននិងអ្នកក្រមានឆ្ងាយទៀត នោះបញ្ហាផ្លូវចិត្តរបស់មនុស្សក៏មានកាន់តែច្រើននិងធ្ងន់ធ្ងរទៅជាមួយគ្នាដែរ។
ល្អនិងអាក្រក់គឺតែងតែមកជាគូនឹងគ្នា។ អ្នកមិនអាចធ្វើអ្វីមួយដែលរំពឹងទុកតែល្អសុទ្ធ ឬអាក្រក់សុទ្ធបានឡើយ។ ថ្វីបើភាពជឿនលឿនរបស់បច្ចេកវិទ្យាទាំងនេះអាចផ្ដល់ផលប្រយោជន៍ជាច្រើនចូលមកក្នុងជីវិតរស់នៅរបស់មនុស្សយើងក៏ដោយ ដូចជាកាលដែលឡានដែលបើកបរស្វ័យប្រវត្តិដោយខ្លួនវាអាចជួយកាត់បន្ថយអត្រាគ្រោះថ្នាក់ចរាចរណ៍ដែលបង្កឡើងដោយភាពធ្វេសប្រហែសរបស់មនុស្សយើងក៏ដោយ ក៏បច្ចេកវិទ្យាទាំងនោះនឹងចោទជាបញ្ហាធំៗជាច្រើនទៀតដូចជាពាក់ព័ន្ធនឹងច្បាប់និងសីលធម៌ ដែលបើសិនជាមនុស្សយន្តមួយនោះបានប្រព្រឹត្តសកម្មភាពអ្វីមួយខុសឆ្គងដែលអាចមានប៉ះពាល់ដល់អាយុជីវិតរបស់មនុស្សជាយថាហេតុ តើនរណាជាអ្នកទទួលខុសត្រូវចំពោះបញ្ហានេះទៅ ?
ដោយ៖ ស្រីពៅ
