តើគួរឆ្លើយតបរបៀបណាជាមួយនឹងស្ថានការណ៍ឈ្លោះទាស់ទែងគំនិតគ្នា ?
មនុស្សម្នាក់ៗមានការយល់ឃើញមិនដូចគ្នានោះទេ ហើយក៏មិនមែនថាការយល់ឃើញរបស់អ្នកត្រឹមត្រូវរហូត ឯការយល់ឃើញរបស់អ្នកដទៃខុសរហូតនោះដែរ។ នៅកន្លែងការងារ អ្នកតែងតែត្រូវធ្វើការជាក្រុមជាមួយនឹងអ្នកដទៃទៀត ហើយក៏ដោយសារតែភាពខុសប្លែកគ្នានៅក្នុងទស្សនយល់ឃើញនេះឯង ទើបបានជាមានពេលខ្លះជម្លោះបានកើតឡើងនៅក្នុងទំនាក់ទំនងអ្នកជាមួយនឹងពួកគេទាំងនោះ។
មនុស្សមួយចំនួនយល់ថាការឈ្លោះប្រកែកគ្នាគឺជារឿងយកឈ្នះចាញ់ ហើយពួកគេដាច់ខាតត្រូវតែជាភាគីដែលឈ្នះ។ ប៉ុន្តែ មនុស្សដែលឈ្លាសវៃ ការទាស់ទែងគ្នាអាចឲ្យពួកគេរៀនសូត្របានច្រើនតាមរយៈភាពខុសគ្នាដែលមាននៅក្នុងទស្សនរបស់មនុស្សម្នាក់ៗ។ គឺនៅពេលមួយដែលមានអ្នកជំទាស់ជាមួយនឹងការយល់ឃើញរបស់អ្នកនេះឯង ទើបអ្នកអាចរីកចម្រើនបាន។
រដំឡើងសរសៃកដាក់គ្នា ដើម្បីយកឈ្នះនិងត្រូវរៀងៗខ្លួន មិនអាចនាំអ្នកទៅណាឆ្ងាយបាននោះទេ។ អ្នកអាចនឹងឈ្នះនៅក្នុងជម្លោះមួយនោះ តែបើអ្នកប្រើប្រាស់វិធីបែបនោះដើម្បីយកឈ្នះភាគីម្ខាងទៀត នោះអ្នកនឹងក្លាយជាសត្រូវរបស់ពួកគេអស់មួយជីវិត ហើយអ្វីដែលសំខាន់គឺអ្នកមិនបានរៀនសូត្រអ្វីដែលមានប្រយោជន៍នៅក្នុងជម្លោះនោះ ក្រៅតែពីការអួតតម្កើងយកត្រូវតែខ្លួនឯងនោះឡើយ។ មិនមែនមានតែអ្នកនោះទេ តែគឺមនុស្សគ្រប់គ្នាសុទ្ធតែត្រូវការការយល់ចិត្តពីអ្នកដទៃ ថ្វីបើទោះជាពេលខ្លះបុគ្គលនោះមិនបង្ហាញប្រាប់អ្នកឲ្យដឹងក៏ដោយ។
នៅពេលអ្នកចង់ឲ្យគេទទួលស្គាល់ថាគំនិតរបស់អ្នកត្រឹមត្រូវ ឯគំនិតរបស់គេអាចនឹងខុសនៅក្នុងស្ថានការណ៍ណាមួយ នោះអ្នកមិនអាចជំទាស់ប្រឆាំងនឹងទស្សនរបស់គេដោយមានគោលដៅថាចង់ឈ្នះនិងត្រូវតែម្យ៉ាងនោះទេ។ អ្នកត្រូវព្យាយាមយល់ពីភាគីម្ខាងទៀតជាមុនសិន។ នៅពេលអ្នកដាក់ចិត្តថាព្យាយាមយល់ពីភាគីម្ខាងទៀត នោះមានពេលខ្លះអ្នកអាចនឹងរៀនសូត្របានថាគឺទស្សនរបស់អ្នកទៅវិញទេដែលអាចមានចន្លោះខ្វះខាតមិនត្រឹមត្រូវ។
តាមរបៀបនេះ អ្នកមិនត្រឹមត្រូវចេះបង្ការជម្លោះដែលអាចលេចឡើងចេញពីភាពខុសគ្នានៅក្នុងទស្សនយល់ឃើញរបស់អ្នកជាមួយនឹងដៃគូសន្ទនារបស់អ្នក ឬក៏ជាសមាជិកក្រុមការងាររបស់អ្នកប៉ុណ្ណោះទេ តែអ្នកថែមទាំងអាចរៀនសូត្របានពីពួកគេទាំងនោះ និងកសាងនូវប្រយោជន៍ដែលល្អសម្រាប់ភាគីទាំងសងខាងថែមទៀតផង៕
ដោយ៖ ស្រីពៅ
