វិធី៤យ៉ាងដែលជួយអ្នកឲ្យមានទំនុកចិត្តលើការងារឡើងវិញ
ពេលដែលអ្នកទើបផ្លាស់ប្តូរការងារថ្មីឬទើបចាប់ផ្ដើមការងារដំបូង ទម្រាំមានទំនុកចិត្តលើការងារដែលអ្នកទទួលខុសត្រូវពិតជាមានការលំបាកតិច។ អ្នកខ្លះត្រូវការពេលវេលាដល់ទៅកន្លះឆ្នាំទម្រាំតែមានទំនុកចិត្តលើការងារ។ ការមានទំនុកចិត្តលើការងារពិតជាមានសារៈសំខាន់ព្រោះវាជួយបង្កើនផលិតភាពការងារ ភាពពេញចិត្តពីចៅហ្វាយនិងធានាការងារដ៏ស្ថិតស្ថេរមួយ។ ខាងក្រោមនេះជាវិធីដែលជួយអ្នកឲ្យមានជំនឿជឿជាក់លើការងាររបស់អ្នក៖
១) ត្រូវដឹងច្បាស់ពីខ្លួនឯង៖ ដឹងច្បាស់ពីខ្លួនឯងក្នុងន័យនេះមានន័យថាអ្នកដឹងពីចំណុចខ្លាំងនិងចំណុចខ្សោយរបស់ខ្លួនឯង។ ក្រោយអ្នកដឹងច្បាស់ពីខ្លួនឯងហើយ ធ្វើអ្វីដែលអ្នកពូកែឲ្យបានច្រើន។ទន្ទឹមនឹងនេះ អ្នកក៏ត្រូវព្យាយាមពង្រឹងចំណុចដែលអ្នកខ្សោយផងដែរ។
២) ព្យាយាមរៀនអ្វីដែលថ្មីជារៀងរាល់ថ្ងៃ៖ បុគ្គលិកដែលធ្វើការយូរឆ្នាំច្រើនតែឈប់អភិវឌ្ឍន៍ខ្លួនឯងព្រោះគិតថាខ្លួនឯងចេះច្រើនជាងបុគ្គលិកថ្មីៗ។ ប៉ុន្តែ ពួកគាត់ភ្លេចគិតថាបុគ្គលិកថ្មីៗតែងតែនាំយកនូវគំនិតថ្មីៗចូលក្រុមហ៊ុន។ ដូច្នេះហើយ មិនថាបុគ្គលិកចាស់ឬថ្មី អ្នកត្រូវបន្តអភិវឌ្ឍន៍ខ្លួនឯងដើម្បីតាមទាន់សង្គម។
៣) បើមិនដឹង ត្រូវចេះសួរ៖ ត្រូវចងចាំ អ្នកមិនមែនចេះទាំងអស់នោះទេ។ វាតែងតែមានពេលខ្លះ ដែលអ្នកមិនចេះ ហើយនេះជារឿងធម្មតាទេសម្រាប់បុគ្គលិក។ ពេលដែលស្ថានភាពបែបនេះកើតឡើង អ្នកត្រូវចេះសុំជំនួយពីមិត្តរួមការងារដទៃ។ ការសុំជំនួយមិនត្រឹមតែពង្រឹងគុណភាពការងារនោះទេ ថែមទាំងពង្រឹងស្មារតីក្រុមទៀតផង។
៤) ចូលរួមវគ្គបណ្ដុះបណ្ដាល៖ ជាធម្មតា ក្រុមហ៊ុនតែងតែមានវគ្គបណ្ដុះបណ្ដាលសម្រាប់ពង្រឹងសមត្ថភាពបន្ថែមដល់បុគ្គលិក។ ប៉ុន្តែ បុគ្គលិកខ្លះមិនចូលរួមនោះទេព្រោះខ្ជិល ហត់នឿយពីការងារឬដោយសារតែហេតុផលផ្ទាល់ខ្លួនផ្សេងទៀត។ យ៉ាងណាមិញ វគ្គបណ្ដុះបណ្ដាលពិតជាមានសារៈសំខាន់ព្រោះវាពង្រឹងសមត្ថភាពរបស់អ្នក ដែលជាចុងក្រោយអ្នកមានទំនុកចិត្តលើការងាររបស់អ្នក។ អ៊ីចឹងហើយ អ្នកពុំគួររំលងវគ្គបណ្ដុះបណ្ដាលនោះទេប្រសិនក្រុមហ៊ុនរបស់អ្នកមាន៕
ប្រែសម្រួល៖ អឹុង មុយយូ
ប្រភព៖ addicted2success.com
