គន្លឹះទាំង៧យ៉ាងមិនអាចខ្វះបាន សម្រាប់អ្នកដែលទើបតែចាប់ផ្ដើមប្រឡូកក្នុងជីវិតជំនួញថ្មីថ្មោង
អ្នកជំនួញជោគជ័យតែងតែរៀនសូត្រពីភាពបរាជ័យនិងពីមនុស្សដែលធ្លាប់ជោគជ័យមកហើយ។ សម្រាប់អ្នកជំនួញខ្លះ ពួកគាត់មិនត្រឹមតែសិក្សាដោយខ្លួនឯងនោះទេថែមទាំងមានគ្រូបង្វឹកឬទីប្រឹក្សាទៀតផង។ យ៉ាងណាមិញ ប្រសិនអ្នកទើបតែចាប់ផ្ដើមប្រឡូកក្នុងវិស័យពាណិជ្ជកម្មហើយគ្មានអ្នកណែនាំ ចូរកុំបារម្ភអី។ ខាងក្រោមនេះជាគន្លឹះទាំង៧ដែលអាចជួយអ្នកបាន៖
១) ត្រូវជំរុញខ្លួនឯង៖ កម្លាំងចិត្តដ៏ធំនិងខ្លាំងបំផុតគឺត្រូវកើតចេញពីខ្លួនឯង។ អ្នកត្រូវមានគំនិតចង់រីកចម្រើនដោយជំរុញខ្លួនឯងឲ្យហ៊ានពុះពាររាល់ឧបសគ្គដែលអ្នកត្រូវឆ្លងកាត់ព្រោះក្នុងជំនួញ អ្នកនឹងជួបបញ្ហានិងឧបសគ្គជាដើម។
២) ធ្វើការដែលអ្នកស្រឡាញ់៖ ការចាប់ផ្តើមជំនួញមួយគឺមិនមែនជារឿងងាយស្រួលនោះទេ។ វាមិនត្រឹមត្រូវការពេលវេលា ការខំប្រឹងថែមទាំងក្តីស្រឡាញ់ដែលអ្នកមានចំពោះជំនួញដែលអ្នកធ្វើទៀតផង។ ប្រសិនអ្នកគ្មានក្តីស្រឡាញ់ អ្នកនឹងងាយបោះបង់និងមិនមានកម្លាំងចិត្តពេលជួបការលំបាក។
៣) ត្រូវហ៊ានផ្សងព្រេង៖ ប្រសិនយើងមិនសាកល្បង យើងនឹងមិនដឹងថាយើងអាចសម្រេចវាឬអត់នោះទេ។ ដូច្នេះហើយ សាកល្បងហើយបរាជ័យវាប្រសើរជាងមិនសាកល្បងសោះ។ ម៉្យាងវិញទៀត សាកល្បងហើយបរាជ័យ អ្នកក៏មិនខាតអ្វីដែរព្រោះអ្នកនឹងទទួលបានបទពិសោធន៍ជីវិតមួយ។
៤) ត្រូវជឿជាក់លើខ្លួនឯង៖ប្រសិនអ្នកគិតថាអ្នកអាចធ្វើបាន អ្នកនឹងធ្វើបាន។ ប្រសិនអ្នកគិតថាអ្នកមិនអាចធ្វើបាន អ្នកនឹងរកលេសសម្រាប់ខ្លួនឯងជាពុំខាន។ ក្នុងវិស័យជំនួញ មានមនុស្សជាច្រើនណាស់ដែលមិនជឿលើអ្នកនិងជំនួញអ្នក ដូច្នេះហើយភាពជឿជាក់លើខ្លួនឯងគឺសំខាន់។
៥) រកមនុស្សល្អ៖ ដើម្បីឲ្យក្រុមហ៊ុនរីកចម្រើនទៅមុខបាន អ្នកត្រូវមានក្រុមការងារដែលល្អនិងពូកែមួយ។ ដូច្នេះហើយ ត្រូវជ្រើសរើសមនុស្សដែលមានសមត្ថភាពនិងមានអត្តចរិតល្អជាជាងមើលតែសញ្ញាប័ត្រ។
៦) សកម្មភាព៖ បើអ្នកចង់ជោគជ័យក្នុងជំនួញ អ្នកមិនត្រឹមមានគំនិតថ្មីៗនោះទេ អ្នកត្រូវមានយុទ្ធសាស្ត្រល្អៗហើយកែប្រែទស្សនវិស័យនោះឲ្យក្លាយជាការពិត។
៧) រៀនពីកំហុស៖ អ្នកជំនួញគ្រប់រូបសុទ្ធតែមានកំហុស កំហុសក្នុងការគ្រប់គ្រងលុយ កំហុសក្នុងការជ្រើសរើសបុគ្គលិកខុស។ល។ យ៉ាងណាមិញ អ្នកជំនួញដែលពូកែគឺត្រូវស្គាល់កំហុស រៀនពីកំហុសនិងកែប្រែកំហុស៕
ប្រែសម្រួល៖ អឹុង មុយយូ
ប្រភព៖ entrepreneur.com
