តម្រាមាសទាំង៧ ដើម្បីរស់នៅក្នុងជីវិតដ៏រីករាយ ពីលោកស្រីGail Woodardអ្នកនិពន្ធអាមេរិក
លោកស្រីGail Woodard គឺជាអ្នកនិពន្ធម្នាក់របស់អាមេរិក ដែលបានសរសេរសៀវភៅជាច្រើន ជាពិសេសពាក់ព័ន្ធនឹងជីវិត និង ការលើកទឹកចិត្ត។ ក្នុងចំណោមសៀវភៅជាច្រើនដែលបានដាក់លក់យ៉ាងជោគជ័យនៅលើទីផ្សារនោះ ក៏មានសៀវភៅដ៏ល្អមួយឈ្មោះថា «តម្រាមាសទាំង៧ ដើម្បីរស់នៅក្នុងជីវិតដ៏រីករាយ»។ ខាងក្រោមនេះ ជាចំណុចសំខាន់ៗទាំង៧ក្នុងសៀវភៅរបស់លោកស្រី ៖
១) យកចិត្តទុកដាក់៖ មនុស្សជាច្រើន មិនបានយកចិត្តទុកអ្វីដែលបានកើតឡើង អ្នកនៅជុំវិញខ្លួន ឬ អ្វីដែលខ្លួនកំពុងមាននោះឡើយ ហើយមួយថ្ងៃៗពេលវេលាចេះតែកន្លងផុតទៅយ៉ាងលឿន និងឥតប្រយោជន៍។ លោកស្រីGail Woodard បានលើកឡើងថា យើងត្រូវតែចេះយកចិត្តទុកដាក់ និង អង្កេតអំពីរឿងរ៉ាវផ្សេងៗក្នុងជីវិតរបស់យើង ព្រោះថា ការធ្វើបែបនេះពិតជាសំខាន់ខ្លាំងណាស់សម្រាប់មនុស្សម្នាក់ៗ ដើម្បីក្លាយជាមនុស្សដែលអាចគ្រប់គ្រងលើចិត្តរបស់ខ្លួនឯងបាន ព្រោះបើយើងមិនព្យាយាមធ្វើវាទេ ចិត្តរបស់យើងនឹងរវើរវាយ ហើយពេលខ្លះយើងតែងឆ្ងល់ថា ហេតុអ្វីខ្លួនឯងបានធ្វើរឿងអ្វីមួយ ដោយមិនដឹងខ្លួន ឬ មិនអាចគ្រប់គ្រងបាន។ ការយកចិត្តទុកដាក់ និង អង្កេតអំពីជីវិត និង អ្វីៗដែលបានកើតឡើងនេះ វាជួយឲ្យយើងដឹងច្បាស់ថា ខ្លួនឯងកំពុងស្ថិតក្នុងស្ថានភាពអ្វី ហើយគួរកែប្រែឲ្យប្រសើរដោយវិធីណាផងដែរ។
២) និយាយពាក្យថាអរគុណ៖ ជាទូទៅ មនុស្សហាក់ដូចជាកំណាញ់ពាក្យថា អរគុណខ្លាំងណាស់ ទោះបីជាមាននរណាម្នាក់ធ្វើល្អ ឬ បានជួយអ្វីក៏ដោយ។ ត្រូវចាំថា ការនិយាយពាក្យថា អរគុណនេះពិតជាធាតុមួយដ៏សំខាន់ដែលនាំឲ្យជីវិតរបស់អ្នករីករាយ។ ជួយឲ្យរីករាយ ព្រោះវាមិនត្រឹមតែធ្វើឲ្យខ្លួនឯងរីករាយទេ ថែមទាំងធ្វើឲ្យអ្នកនៅដែលបានធ្វើល្អ ឬ ជួយអ្នកនោះមានអារម្មណ៍ថារីករាយ ហើយមានកម្លាំងចិត្តធ្វើល្អថែមទៀត។ លើសពីនេះ ពាក្យថា អរគុណនេះមិនមែននិយាយត្រឹមពេលដែលនរណាម្នាក់ជួយអ្នកទេ តែអ្នកគួរតែនិយាយក្នុងស្ថានភាពជាច្រើនទៀត ដូចជា អរគុណចំពោះកំណើតរបស់ខ្លួនឯង អរគុណចំពោះការខិតខំប្រឹងប្រែងរបស់ខ្លួនឯង អរគុណចំពោះបញ្ហាដែលបានកើតឡើង (ព្រោះវានាំឲ្យអ្នកកាន់តែរឹងមាំជាងមុន) និង ក្នុងស្ថានភាពជាច្រើនទៀត។ ដូច្នេះកុំភ្លេចប្រើពាក្យថា អរគុណ។
៣) ស្ងៀមស្ងាត់ (សមាធិ)៖ អ្នកត្រូវតែរកពេលវេលាសមគួរ ដើម្បីធ្វើឲ្យខ្លួនឯងមានអារម្មណ៍ស្ងប់ ហើយរីករាយជាមួយនឹងសន្តិភាពផ្លូវចិត្ត។ ក្នុងមួយថ្ងៃៗមានរឿងរ៉ាវជាច្រើនបានកើតឡើងក្នុងជីវិតរបស់អ្នក ។ ដូច្នេះដើម្បីអាចប្រឈមមុខ និង មានលទ្ធភាពក្នុងការដោះស្រាយបញ្ហាទាំងនោះបាន វាទាមទារឲ្យអ្នកមានវិធីសាស្ត្រល្អៗជាច្រើន ប៉ុន្តែត្រូវចាំថា បើរឿងរ៉ាវកើតឡើងច្រើនពេក វានឹងធ្វើឲ្យអ្នកមានអារម្មណ៍ស្មុគស្មាញខ្លាំងណាស់ ដូច្នេះគិតអ្វីក៏មិនចេញ តែមានតែភាពក្ដៅក្រហាយកាន់តែច្រើនឡើងៗ។ ដើម្បីបន្សាបភាពមួម៉ៅក្ដៅក្រហាយទាំងនោះ និង ដើម្បីមានអារម្មណ៍ល្អគ្រប់គ្រាន់ក្នុងការដោះស្រាយបញ្ហានោះ អ្នកត្រូវតែមានពេលវេលាគ្រប់គ្រាន់សម្រាប់ខ្លួនឯងដើម្បីអង្គុយយ៉ាងស្ងៀមស្ងាត់ និង សម្រួលអារម្មណ៍ រហូតធ្វើឲ្យចិត្តរបស់អ្នកស្ងប់។ នៅពេលនោះ អ្នកនឹងអាចបង្ក្រាបភាពស្មុគស្មាញជាច្រើននៅក្នុងខួរក្បាល បន្ទាប់មកគិតអ្វីក៏ចេញ ហើយធ្វើអ្វីក៏មានប្រសិទ្ធភាពដែរ។
៤) ចេះទម្លាក់ចោលអ្វីដែលត្រូវទម្លាក់៖ មានរឿងរ៉ាវជាច្រើនដែលយើងមិនអាចគ្រប់គ្រងបាន ហើយក៏មិនអាចបញ្ជាវាឲ្យកើតឡើងទៅតាមអ្វីដែលយើងចង់បាននោះដែរ។ ដូច្នេះហើយ កុំបារម្ភហួសហេតុពេក តែគ្រាន់តែចាំថា ធ្វើអ្វីមួយឲ្យអស់ពីលទ្ធភាពទៅបានហើយ។ លោកស្រីGail Woodard ថាបើចង់រស់នៅប្រកបដោយសេចក្ដីសុខ និង ភាពរីករាយនោះ អ្នកត្រូវតែទម្លាក់ចោលអ្វីដែលត្រូវទម្លាក់ ព្រោះថាបើអ្នកមិនទម្លាក់ចោលខ្លះទេ អ្នកនឹងត្រូវស្ពាយបង្វេចដ៏សែនធំ ហើយមិនដឹងថា ដល់ពេលណាដែលអាចដាក់ចុះបាន។ សេចក្ដីស្អប់ ច្រណែន ការគំនុំគំកួន ភាពភ័យខ្លាចចំពោះការរិះគន់របស់អ្នកដទៃ និង ចំណុចអវិជ្ជមានជាច្រើនទៀត សុទ្ធតែតែជាសំពាយដ៏សែនធ្ងន់ ដែលមនុស្សគ្រប់គ្នាកំពុងស្ពាយ ដែលរកកន្លែងដាក់ចុះមិនឃើញ ដូច្នេះហើយពួកគេគ្មានថ្ងៃអាចរកឃើញសេចក្ដីសុខនោះឡើយ។ ប្រសិនបើចំណុចអវិជ្ជមានទាំងនេះ មិនដែលផ្ដល់ចំណេញអ្វីផង ចុះហេតុអ្វីបានជាអ្នកត្រូវក្រសោបជាប់ខ្លាំងយ៉ាងនេះ ម្ដេចក៏មិនដាក់វាចុះទៅ។
៥) ធ្វើជាម្ចាស់លើអារម្មណ៍ខ្លួនឯង៖ មនុស្សទូទៅតែងបណ្ដោយឲ្យអារម្មណ៍របស់ខ្លួនបញ្ជា តាមរយៈអ្វីៗដែលបានកើតឡើង។ ប្រសិនបើអារម្មណ៍របស់យើង ត្រូវបានប្រែប្រួលខ្លាំងទៅតាមស្ថានភាពដែលបានកើតឡើង នោះពិតជាពិបាករកឃើញនូវសេចក្ដីសុខខ្លាំងណាស់។ អ្នកខ្លះឆាប់ខឹង និង ចាប់មួម៉ៅ និយាយឲ្យខ្លីគឺដើរចូលក្នុងផ្លូវអវិជ្ជមាន។ អ្នកត្រូវតែគ្រប់គ្រង និង ធ្វើជាម្ចាស់លើអារម្មណ៍របស់អ្នកឲ្យបាន ដូច្នេះហើយមិនថា មានរឿងអ្វីកើតឡើងនោះទេ អ្នកនៅតែរកឃើញនៅប្រឡោះវិជ្ជមាន និង ឱកាស ហើយអាចដើរចេញទៅយ៉ាងមានសុវត្ថិភាពមិនខាន។ ការគ្រប់គ្រងលើអារម្មណ៍ខ្លួនឯងនេះ មិនមែនជារឿងងាយនោះឡើយ តែអ្វីៗនឹងប្រសើរតាមរយៈការអនុវត្តជារៀងរាល់ថ្ងៃ។ ក្នុងចំណុចនេះ រាល់ពេលអ្នកជួបបញ្ហាអ្វីក៏ដោយ អ្នកកុំបណ្ដោយឲ្យអារម្មណ៍មកបញ្ជាលើអ្នកឲ្យសោះ ពោលគឺត្រូវព្យាយាមគិត ។ ត្រូវឆ្លងកាត់ការពិភាក្សាជាមួយខួរក្បាលសិន ទើបសម្រេចចិត្ត តែបើអ្នកធ្វើទៅតាមអារម្មណ៍តែម្ដង ប្រហែលជាក្នុងចំណោមការសម្រេចចិត្ត១០ រកត្រូវមិនឃើញឡើយសូម្បីម្ដងដែលមានលទ្ធផលល្អ។
៦) ជ្រើសរើសជំនឿផ្ទាល់ខ្លួន៖ ក្នុងនាមជាមនុស្សអ្នកត្រូវតែមានជំនឿផ្ទាល់ខ្លួនរបស់អ្នក ដោយផ្នែកទៅលើហេតុផល និង ការខិតខំប្រឹងប្រែងរបស់ខ្លួនឯង បើទោះបីជាអ្នកដទៃមានគំនិតផ្ទុយក៏ដោយ។ បើអ្នកគិតថា ខ្លួនឯងពិតជាចង់ធ្វើជំនួញមែន អ្នកត្រូវតែមានជំនឿថា ខ្លួនឯងអាចធ្វើបានបើទោះបីជាមានមនុស្សជាច្រើនគិតថា មិនអាចទៅរួចក៏ដោយ។ អ្នកដទៃគិតមិនសំខាន់ ព្រោះមានតែអ្នកប៉ុណ្ណោះដែលសំខាន់ ព្រោះអ្នកគឺជាមនុស្សតែម្នាក់គត់ដែលដើរឆ្ពោះទៅរកអ្វីដែលខ្លួនចង់បាន។ បើអ្នករវល់តែគិតខ្លាចគេថា តើពេលណាដែលអ្នកអាចធ្វើរឿងដ៏អស្ចារ្យក្នុងជីវិតបាន។ ជំនឿយ៉ាងមុតមាំចំពោះអ្វីដែលខ្លួនចង់បាននេះហើយ ដែលធ្វើឲ្យអ្នករស់នៅជាមួយនឹងទំនុកចិត្ត និង សេចក្ដីសង្ឃឹម បូករួមជាមួយនឹងសេចក្ដីសុខ និង ភាពរីករាយរាល់ពេលធ្វើវាម្តងៗ។
៧) រស់នៅជាមួយសេចក្ដីស្រលាញ់៖ សេចក្ដីស្រលាញ់មានទំហំធំធេងខ្លាំងណាស់ ដូច្នេះហើយត្រូវព្យាយាមបណ្ដុះសេចក្ដីស្រលាញ់ឲ្យបានច្រើន មិនថា ជីវិតខ្លួនឯង ក្រុមគ្រួសារ មិត្តភ័ក្ដិ និង មនុស្សទូទៅ។ ការបណ្ដុះសេចក្ដីស្រលាញ់ក្នុងខ្លួន វាប្រៀបបាននឹងការបណ្ដុះនូវស្នាមញញឹមអ៊ីចឹងដែរ ពោលគឺទៅដល់ទីណាក៏មានគេស្វាគមន៍ ហើយក៏មានអារម្មណ៍ថា រីករាយក្នុងជីវិត៕
ដោយ៖ អ៊ុន រស្មី
