ប្រទេសពុករលួយជាងគេបំផុតចំនួន៥នៅទ្វីបអាស៊ីក្នុងនោះមាន ៣ នៅតំបន់អាស៊ាន តែគ្មានកម្ពុជា
កាលពីពេលថ្មីៗនេះ ទស្សនាវដ្ដី Forbes បានចេញផ្សាយប្រទេសដែលពុករលួយបំផុតចំនួន ៥នៅទ្វីបអាស៊ីក្នុងនោះមាន ៣ប្រទេសស្ថិតនៅក្នុងតំបន់អាស៊ីអាគ្នេយ៍។ ការដាក់ចំណាត់ថ្នាក់គឺធ្វើឡើងដោយអង្គការតម្លាភាពអន្តរជាតិ (Transparency International) ដោយធ្វើការស្ទង់មតិរយៈពេល ១៨ខែ ហើយចំណាត់ថ្នាក់គឺល្អឬអាក្រក់ផ្អែកទៅលើអត្រាពុករលួយដែលហៅថា bribery rates។ ប្រទេសទាំង ៥នោះគឺ៖
១)ឥណ្ឌា៖ កម្រិតពុករលួយ ៦៩%។ សេវាសាធារណៈ ៥ក្នុងចំណោម ៦មាន សាលារៀន មន្ទីរពេទ្យ ធ្វើអត្តសញ្ញាណប័ណ្ណ ប៉ូលិស និងទឹកភ្លើងអ្នកបំពេញការស្ទង់មតិជាងពាក់កណ្ដាលឆ្លើយតបត្រូវចំណាយលុយចំពោះអំពើពុករលួយដើម្បីទទួលបានសេវាកម្មនេះ។
២) វៀតណាម៖ កម្រិតពុករលួយ ៦៥%។ ក្នុងចំណោមប្រទេស ១៦ដែលបានធ្វើការស្ទង់មតិ ប្រជាជននៅវៀតណាម (និងម៉ាឡេស៊ី) គឺមានគំនិតអវិជ្ជមានបំផុតអំពីស្ថានភាពនៅក្នុងប្រទេសរបស់ពួកគេ។ ៦០% មានអារម្មណ៍ថា រដ្ឋាភិបាលបំពេញការងារមិនល្អទាល់តែសោះដើម្បីប្រយុទ្ធប្រឆាំងអំពើពុករលួយ។
៣) ថៃ៖ កម្រិតពុករលួយ ៤១%។ ថៃត្រូវបានគេមើលឃើញថា បានបង្ហាញពីការខិតខំប្រឹងប្រែងដើម្បីប្រយុទ្ធប្រឆាំងអំពើពុករលួយគ្រប់ជាន់ថ្នាក់ ជាពិសេសរបបយោធាថៃតែម្ដង។ ១៤% មានអារម្មណ៍ថា អំពើពុករលួយបានកើនឡើងក្នុងរយៈពេល ១២ខែចុងក្រោយ ហើយ ៧២% គិតថា រដ្ឋាភិបាលអំពីប្រយុទ្ធប្រឆាំងអំពើពុករលួយបានកម្រិតមធ្យមឬល្អ។
៤) ប៉ាគីស្ថាន៖ កម្រិតពុករលួយ ៤០%។ ៣ភាគ៤ នៃអ្នកឆ្លើយការបំពេញមតិឆ្លើយថា ប៉ូលិសភាគច្រើន ឬទាំងអស់គឺពុករលួយ។ អ្នកដែលជួបរឿងជាមួយប៉ូលិស និងតុលាការ ៧ភាគ១០ ត្រូវចំណាយលុយលើអំពើពុករលួយ។
៥) មីយ៉ាន់ម៉ា៖ កម្រិតពុករលួយ ៤០%។ ទោះបីជាមានច្បាប់ប្រឆាំងអំពើពុករលួយនៅឆ្នាំ២០១៣យ៉ាងណាក្ដី មនុស្សប្រហែលជាងពាក់កណ្ដាលដែលចួលរួមការស្ទង់មតិមានជំនឿថា ប៉ូលិសភាគច្រើនឬ ទាំងអស់គឺពុករលួយ ហើយ ៤០%ទៀតឆ្លើយថា តុលាការក៏ពុករលួយដែរ។
សូមបញ្ជាក់ថា អង្គការតម្លាភាពអន្តរជាតិ (Transparency International) បានធ្វើការស្ទង់មតិរយៈពេល ១៨ខែទៅលើមនុស្សជាង ២២ ០០០នាក់មកពី ១៦ប្រទេសនៅតំបន់អាស៊ីប៉ាស៊ីហ្វិកមាន ថៃ ស្រីលង្កា មីយ៉ាន់ម៉ា តៃវ៉ាន់ ជប៉ុន អូស្ត្រាលី ប៉ាគីស្ថាន កម្ពុជា ឥណ្ឌា ហុងកុង កូរ៉េខាងត្បូង វៀតណាម ម៉ាឡេស៊ី ឥណ្ឌូណេស៊ី និងចិន៕
