ការចុះបញ្ជីម៉ាកតាមប្រព័ន្ធអេឡិចត្រូនិកចាប់ផ្ដើមដាក់ឱ្យដំណើរការហើយ!
ក្រសួងពាណិជ្ជកម្មបានចាប់ផ្ដើមដាក់ ឱ្យប្រើប្រាស់ប្រព័ន្ធចុះបញ្ជីម៉ាកតាមប្រព័ន្ធ អេឡិចត្រូនិក ហើយកាលពីថ្ងៃទី២៥ ខែឧសភាម្សិលមិញ ដែលពិធីសម្ពោធនេះធ្វើឡើងនៅទីស្ដីការក្រសួងពាណិជ្ជកម្មតែម្ដង។
ពិធីសម្ពោធត្រូវបានរៀបចំឡើង ក្រោមអធិបតីភាព ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងមានការចូលរួមពីតំណាងអង្គការកម្មសិទិ្ធបញ្ញាពិភពលោក (WIPO) តំណាងការិយាល័យប្រកាសនីយបត្រតក្កកម្មជប៉ុន មន្ត្រីអន្តរក្រសួងដែលជាសមាជិក-សមាជិកា នៃគណៈកម្មាធិការជាតិគ្រប់គ្រងកម្មសិទ្ធិបញ្ញា និងតំណាងវិស័យឯកជន និងសាធារណជនប្រមាណ ២០០នាក់។
នៅក្នុងឱកាសនោះ ឯកឧត្តម ប៉ាន សូរស័ក្តិ បានគូសបញ្ជាក់អំពីកិច្ចប្រឹងប្រែងរបស់ក្រសួងពាណិជ្ជកម្ម និងការគាំទ្របច្ចេកទេសផ្សេងៗរបស់អង្គការ WIPO ព្រមទាំងដៃគូអភិវឌ្ឍន៍នានា ក្នុងការជំរុញ និងលើកកម្ពស់ការអនុវត្តកម្មសិទ្ធិបញ្ញានៅក្នុងប្រទេសកម្ពុជា ជាក់ស្តែងប្រព័ន្ធស្នើសុំចុះបញ្ជីម៉ាកតាមអេឡិចត្រូនិក ដែលដាក់ឲ្យប្រើប្រាស់ថ្ងៃនេះ គឺជានៃសមិទ្ធផលថ្មីមួយទៀតនៃកិច្ចសហការរវាងក្រសួងពាណិជ្ជកម្ម និងអង្គការ WIPO។
ការសម្ពោធដាក់ឱ្យប្រើប្រាស់ប្រព័ន្ធនេះជាផ្លូវការធ្វើឡើងក្នុងគោលដៅ លើកកម្ពស់ការផ្ដល់សេវាសាធារណៈឱ្យបានលឿន ឆាប់រហ័ស និងកាត់បន្ថយពេលវេលា និងចំណាយថវិកាក្រៅផ្លូវការក្នុងការធ្វើពាណិជ្ជកម្មនៅកម្ពុជា។
ថ្លែងនៅក្នុងពិធីបើកសម្ពោធការដាក់ប្រព័ន្ធការចុះបញ្ជីនេះ ឯកឧត្តម ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម បានបញ្ជាក់ថា ប្រព័ន្ធស្នើសុំចុះបញ្ជីម៉ាកតាមអេឡិចត្រូនិកនេះ មិនត្រឹមតែផ្ដល់ផលប្រយោជន៍ ដល់វិស័យពាណិជ្ជកម្មប៉ុណ្ណោះទេ ប៉ុន្ដែបានផ្ដល់លទ្ធភាពដល់សហគ្រាស ធុនតូច និងមធ្យម ក្នុងការពង្រីកសក្ដានុពលអាជីវកម្មតាមរយៈការធ្វើទីផ្សារលើផលិតផល ដែលមានអត្ដ សញ្ញាណច្បាស់លាស់ និងនាំចេញទៅទីផ្សារអន្ដរជាតិថែមទៀតផង។
តាមរយៈប្រព័ន្ធស្នើសុំចុះបញ្ជីម៉ាកតាមអេឡិចត្រូនិក ដែលដាក់ឲ្យដំណើរការថ្ងៃនេះ សាធារណជនអាចដាក់ពាក្យស្នើសុំចុះបញ្ជីម៉ាក និងសេវាពាក់ព័ន្ធនឹងម៉ាកពាណិជ្ជកម្មនៅគ្រប់ទីកន្លែង ដោយគ្រាន់តែចូលទៅកាន់គេហទំព័រ www.efiling.cambodiaip.gov.kh របស់នាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម។
សូមបញ្ជាក់ថា គិតចាប់តាំងពីឆ្នាំ១៩៩១ រហូតដល់ឆ្នាំ២០១៧ នេះ ក្រសួងពាណិជ្ជកម្ម បានធ្វើការចុះបញ្ជីម៉ាកបានចំនួនជាង ៧ម៉ឺនម៉ាក ទាំងក្រុមហ៊ុនក្នុងស្រុក និងក្រៅស្រុក៕
