បើមានថៅកែម៉ាកនេះ អ្នកមិនបាច់ផ្ដល់ការជឿទុកចិត្តទៀតទេ
អ្នកដឹងហើយថា អាកប្បកិរិយារបស់ថៅកែអ្នកអាចមានឥទ្ធិពលខ្លាំងណាស់មកលើការងាររបស់អ្នក។ បើថៅកែអ្នកល្អ ការងារអ្នកក៏ប្រព្រឹត្តទៅបានល្អដូចគ្នា តែអ្វីដែលជាបញ្ហានោះគឺពេលថៅកែអ្នកយ៉ាប់ អ្នកមិនចាំបាច់ផ្ដល់ការជឿទុកចិត្តលើពួកគេទៀតទេ។
១) ថៅកែមើលឃើញតែកំហុសបុគ្គលិក៖ ក្នុងនាមជាថៅកែឬក៏អ្នកគ្រប់គ្រងម្នាក់ តើអាចទេបើអ្នករង់ចាំតែសង្កេតមើលកំហុសរបស់បុគ្គលិកខ្លួន? ប្រាកដណាស់ដែលអ្នកបានជួលពួកគេមកគឺដើម្បីឲ្យពួកគេធ្វើការឲ្យល្អសម្រាប់អ្នក តែមនុស្សណាដែលមិនចេះសាងកំហុសនោះ? ពេលខ្លះបើអ្នកបិទភ្នែកខ្លះ កំហុសទាំងនោះនឹងមិនសូវជាធំដុំប៉ុន្មានសម្រាប់ក្រុមហ៊ុនអ្នកឡើយ។
២) ចូលចិត្តការស្ដីបន្ទោសនៅចំពោះមុខគេឯង៖ មនុស្សតែងមានកំហុស។ មានតែមនុស្សមិនដែលធ្វើអីទេ ទើបគ្មានកំហុស ហើយក្នុងនាមជាមេគេ ពេលកូនចៅធ្វើខុស អ្នកគប្បីទុកមុខមាត់ឲ្យគេផង។ យ៉ាងណាក៏ពីមុនមក បុគ្គលិកម្នាក់នោះបានជួយការងារ ជាច្រើនដល់ក្រុមហ៊ុនដែរ។
៣) ឆេវឆាវយល់តែអារម្មណ៍ខ្លួន៖ មនុស្សក៏ឆេវឆាវដែរ តែក្នុងនាមខ្លួនជាអ្នកគ្រប់គ្រងមួយ បុគ្គលិកដែលស្ថិតនៅក្រោមអ្នក នឹងមានសម្ពាធ។ មិនថាគេទទួលបានប្រាក់ខែច្រើនកម្រិតណាទេ តែបើអ្នកតែងតែឆេវឆាវដាក់គេឯងបែបនេះ គ្មាននរណានៅជាមួយបានយូរឡើយ។
៤) និយាយបាតដៃខ្នងដៃ៖ មនុស្សគេយកសម្ដី តែបើអ្នកមិនគោរពសម្ដីខ្លួនតើអ្នកចង់ឲ្យគេគោរពអ្នកដោយរបៀបណាទៅ? ក្បត់ពាក្យស្ដីគឺដូចជាក្បត់នឹងខ្លួនឯង ដូចនេះអ្នកមិនអាចឲ្យបុគ្គលិកខ្លួនជឿទុកចិត្តអ្នកបន្តទៀតបានទេ។
៥) លំអៀងនិងត្រចៀកស៖ ធ្វើជាអ្នកគ្រប់គ្រងគេ គឺមិនងាយស្រួលឡើយ ហើយម៉្យាងទៀតវាចាំបាច់ណាស់ក្នុងការគិតអ្វីមួយឲ្យបានម៉ត់ចត់មុននឹងសម្រេចចិត្ត។ ហាមគិតខ្លី ហាមគិតលឿន និងមិនត្រូវជឿសម្ដីអ្នកណាជាដាច់ខាត បើអ្នកមិនបានឃើញផ្ទាល់ភ្នែក៕
ប្រែសម្រួល៖ ព្រំ សុវណ្ណកណ្ណិកា ប្រភព៖ forbes
