យោង​តាម​សារព័ត៌មាន​ New York Times ​ចុះ​ផ្សាយ​កាល​ពី​ដើម​ខែ​មីនា​ ឆ្នាំ​២០១៧​នេះ​បាន​​ឱ្យ​ដឹង​ថា​ ​កាល​ពី​បី​ឆ្នាំ​មុន​ អតីត​ប្រធានាធិបតី​អាមេរិក​គឺ​លោក​ Barack Obama ​បាន​បញ្ជា​ឱ្យ​មន្ត្រី​បញ្ចកោណ​​ បង្កើត​ក្រុម​វាយ​ប្រហារ​តាម​ប្រព័ន្ធ​អ៊ីនធឺណិត​​​លើ​កម្មវិធី​មីស៊ីល​របស់​កូរ៉េខាងជើង​ក្នុង​ក្ដី​សង្ឃឹម​ថា​ ​អាច​បង្អាក់​ដំណើរការ​បាញ់​​បាន។ ​ដូច្នេះ​ បើ​គិត​មក​ដល់​ពេល​នេះ​ប្រហែល​ Trump ក៏​ជា​អ្នក​បន្ត​វេន​លើ​ការ​វាយ​ប្រហារ​​តាម​សង្គ្រាម​អត់​គ្រាប់​នេះ​ដែរ។ ​តាម​ការ​ចុះ​ផ្សាយ​ពី​ Business Insider ​ឱ្យ​ដឹង​ថា​ អាមេរិក​ប្រាកដ​ជា​បាន​រៀប​ចំ​ក្រុម​ប្រតិបត្តិការ​សម្ងាត់​មួយ​ក្រុម​ដើម្បី​ត្រៀម​វាយ​ប្រហារ​លើ​កម្មវិធី​នុយក្លេអ៊ែរ​របស់​កូរ៉េខាងជើង​យ៉ាង​ហោច​ណាស់​អស់​រយៈ​ពេល​បី​ឆ្នាំ​ហើយ​ដែរ។ ​គេ​សង្កេត​ឃើញ​ថា​ ការ​ធ្វើ​តេស្ដ​មីស៊ីល​របស់​កូរ៉េខាងជើង​ជា​ច្រើន​គ្រាប់​​ត្រូវ​បាន​បាញ់​បង្ហោះ​ដោយ​មិន​ទទួល​បាន​ជោគជ័យ​នោះ​ទេ ដោយ​អ្នក​ខ្លះ​ជឿ​ថា​ នេះ​ដោយ​សារ​តែ​ស្នាដៃ​របស់​អាមេរិក​​ដែល​វាយ​ប្រហារ​ និង​លួច​​កម្ទេច​ទិន្នន័យ​របស់​កូរ៉េខាងជើងហើយ​មីស៊ីល​ដែល​កូរ៉េខាងជើង​បាញ់​ចុង​ក្រោយ​នេះ​ក៏​អាច​​ត្រូវ​បាន​វាយ​ប្រហារ​ដោយ​អាមេរិក​ដែរ។ ប៉ុន្តែ​អ្នក​ជំនាញ​ជា​ច្រើន​រូប​ បាន​បដិសេធ​លើ​ការ​អះអាង​នេះ​ដោយ​លើក​ឡើង​ថា​ ការ​បរាជ័យ​ដោយ​សារ​តែ​បញ្ហា​បច្ចេកទេស​​នៅ​ពេល​ផលិត​តែ​ប៉ុណ្ណោះ។ ជាក់​ស្ដែង​ កូរ៉េខាងជើង​បាន​ធ្វើ​ការ​សាកល្បង​មីស៊ីល​សំខាន់​ៗ​ និង​មាន​សមត្ថភាព​បាញ់​បាន​ចម្ងាយ​ឆ្ងាយ​បាន​ជោគជ័យ​ជា​ច្រើន​លើក​ច្រើន​សារ។ ​រឿង​មួយ​ដែល​គេ​ដឹង​ថា​​ មីស៊ីល​របស់​កូរ៉េខាងជើង​គឺ​យក​គំរូ​តាម​រុស្ស៊ី​ ខណៈ​បច្ចេកទេស​របស់​រុស្ស៊ី​មាន​​អនុបាត​បរាជ័យ​តែ​ ១៣%​ ខណៈ​កូរ៉េខាងជើង​រហូត​ដល់​ ៨៨%​ឯណោះ។ ​ លោក​បណ្ឌិត​ ​Ken Geers ​អ្នក​ជំនាញ​ផ្នែក​​សន្តិសុខ​អ៊ីនធឺណិត​​ដែល​មាន​បទ​ពិសោធន៍​ជោកជាំ​លើ​​ការងារ​ផ្ដល់​យោបល់​ដល់​រដ្ឋាភិបាល​បាន​លើក​ឡើង​ថា​ ការ​វាយ​​ប្រហារ​ពី​សំណាក់​សហរដ្ឋ​អាមេរិក​លើ​កូរ៉េខាងជើង​គឺ​ពិត​ជា​មាន​ពិត។ ​ទោះ​បី​ជា​កូរ៉េខាងជើង​ផ្ដាច់​ខ្លួន​ពី​ប្រព័ន្ធ​អ៊ីនធឺណិត​​ក្ដី​ ក៏​គេ​​ជឿ​ជាក់​ការ​លួច​យក​ទិន្នន័យ​អាច​ធ្វើ​បាន​តាម​វិធី​ជា​ច្រើន​ទៀត។ លោក​​បាន​​លើក​ឧទាហរណ៍​ថា​ កាល​ពី​ឆ្នាំ​១៩៩៦​ ​រុស្ស៊ី​បាន​លួច​ទិន្នន័យ​របស់​អង្គការ​ណាតូ​​នៅ​អាហ្វហ្គានីស្ថាន​ ដោយ​កាល​នោះ​​បុគ្គលិក​ណាតូ​គ្រាន់​តែ​ទិញ​​ Flash Drive ​ប្រើ​ គឺ​រុស្ស៊ី​អាច​​លួច​ទិន្នន័យ​បាន​ទៅ​ហើយ៕ ដោយ៖ យោធិន​