ភាពខុសគ្នា៤យ៉ាង រវាងអ្នកជំនួញពិត និង មនុស្សដែលបានត្រឹមគិតចង់ក្លាយជាអ្នកជំនួញ
មនុស្សសម័យនេះមិនសូវចង់ធ្វើការឲ្យគេនោះទេ ផ្ទុយទៅវិញ ពួកគាត់ចង់ជោគជ័យដោយមានក្រុមហ៊ុនឬមុខជំនួញផ្ទាល់ខ្លួន ព្រោះវាមានសេរីភាព និង មោទនភាពចំពោះខ្លួនឯងជាង។ ប៉ុន្តែ វាមានភាពខុសគ្នាឆ្ងាយណាស់រវាងអ្នកជំនួញនិង អ្នកបានត្រឹមចង់ក្លាយជាអ្នកជំនួញ។ ខាងក្រោមនេះជាភាពខុសគ្នា៖
១) អ្នកជំនួញជឿជាក់លើខ្លួនឯងឯ អ្នកចង់ក្លាយជាអ្នកជំនួញគិតតែពីខ្លួនឯង៖
សម្រាប់អ្នកដែលបានត្រឹមគិតចង់ធ្វើជំនួញ តែងគិតពីខ្លួនឯងជានិច្ច ពោលគឺគិតថា មានតែខ្លួនឯងម្នាក់ប៉ុណ្ណោះដែលអស្ចារ្យជាងអ្នកដទៃ ហើយមិនសូវផ្តល់តម្លៃដល់ក្រុមការងារនោះទេ។ ប៉ុន្តែសម្រាប់ អ្នកជំនួញវិញ តែងជឿជាក់លើខ្លួនឯង និង ក្រុមការងាររបស់ខ្លួន ពោលគឺដឹងច្បាស់ថា ខ្លួនឯងម្នាក់មិនអាចនាំមកនូវភាពជោគជ័យដ៏អស្ចារ្យបានឡើយ ដូច្នេះហើយ ត្រូវតែមានការជួយជ្រោមជ្រែងពីក្រុមការងារ។
២) អ្នកជំនួញបន្តដំណើរជានិច្ច ឯអ្នកបានត្រឹមគិតចង់ក្លាយជាអ្នកជំនួញ គិតតែពីរអ៊ូមិនចេះចប់
អ្នកជំនួញនឹងព្យាយាមធ្វើអ្វីៗឲ្យកើតមានឡើង មិនថាវាលំបាកប៉ុណ្ណា។ ចំណែកអ្នកដែលបានត្រឹមគិតចង់ក្លាយជាអ្នកជំនួញ តែងតែរកលេសនៅពេលដែលជួបការលំបាកម្តងៗ អ៊ីចឹងហើយ គិតបានត្រឹមតែគិត គ្មានថ្ងៃណាដែលសុបិនក្លាយជាការពិតឡើយ។
៣) អ្នកជំនួញមិនអនុញ្ញាតឲ្យភាពបរាជ័យមកបញ្ឈប់នោះទេ ឯអ្នកបានត្រឹមគិតចង់ក្លាយជាអ្នកជំនួញវិញងាយនឹងបាក់ទឹកចិត្ត និង បោះបង់
អ្នកជំនួញតែងតែរៀនពីកំហុសឬភាពបរាជ័យដែលពួកគាត់មាន ព្រោះដឹងច្បាស់ថា គ្មាននរណាម្នាក់ដែលគេចផុតពីការបរាជ័យនោះឡើយ តែដរាបណាមិនបោះបង់ នោះភាពជោគជ័យនៅតែអាចសម្រេចបាននៅពេលណាមួយ។ ឧទាហរណ៍ លោក Thoma Edisonបានខិតខំ១០០០ដង ទម្រាំតែបានជោគជ័យក្នុងការរកឃើញអំពូលភ្លើង។ ដោយឡែក សម្រាប់អ្នកបានត្រឹមគិតចង់ក្លាយជាអ្នកជំនួញវិ គឺងាយនឹងបាក់កម្លាំងចិត្តមែនទែន ហើយបោះបង់តែម្តង។
៤) អ្នកជំនួញចង់រីកចម្រើនជាងមុន ឯអ្នកបានត្រឹមគិតចង់ក្លាយជាអ្នកជំនួញវិញតែងចង់ក្លាយជាអ្នកមាន៖ អ្នកជំនួញចង់ពូកែក្នុងអាជីពរបស់ពួកគេ។ លុយចំពោះពួកគាត់គឺមួយផ្នែកតែប៉ុណ្ណោះ ពោលគឺត្រូវធ្វើកិច្ចការដ៏អស្ចារ្យមួយដែលមានឥទ្ធិពលលើអ្នកដទៃ និង មនុស្សទូទៅ។ តែ អ្នកដែលបានត្រឹមគិតចង់ក្លាយជាអ្នកជំនួញវិញ ខិតខំដោយសារតែលុយមួយមុខតែប៉ុណ្ណោះ៕
ប្រែសម្រួល៖ អឹុង មុយយូ
ប្រភព៖ www.lifehack.org
