ចំណុចសំខាន់៧យ៉ាងអំពីបដិវត្តន៍ឧស្សាហកម្ម ដែលអ្នកគួរយល់ដឹង!
ក្រៅពីដឹងថាបដិវត្តន៍ឧស្សាហកម្មគឺជាចំណុចចាប់ផ្ដើមដ៏សំខាន់មួយ ក្នុងការផ្លាស់ប្ដូររូបភាពមួយចំណែកធំរបស់ពិភពលោកហើយ ថាតើមានការពិតអ្វីខ្លះទៀត ដែលអ្នកអាចនឹងមិនដែលធ្លាប់បានដឹងអំពីការធ្វើបដិវត្តន៍ឧស្សាហកម្មនេះ ?
តើ "បដិវត្តន៍ឧស្សាហកម្ម" មានអត្ថន័យដូចម្ដេច ? បដិវត្តន៍ឧស្សាហកម្មសំដៅទៅលើការផ្លាស់ប្ដូរយ៉ាងធំធេងក្នុងផ្នែកបច្ចេកវិទ្យា កសិកម្ម ការខួងយករ៉ែ ឧស្សាហកម្ម និងមធ្យោបាយធ្វើដំណើរ ចាប់ពីពាក់កណ្ដាលទសវត្សទី១៨រហូតដល់ពាក់កណ្ដាលទសវត្សទី១៩ ហើយឥទ្ធិពលរបស់វាមានទៅលើការផ្លាស់ប្ដូរជាខ្លាំងចំពោះការរស់នៅរបស់មនុស្សផ្នែកសង្គម វប្បធម៌ និងសេដ្ឋកិច្ច។ ខាងក្រោមនេះដែរគឺជាការពិតអំពីបដិវត្តន៍ឧស្សាហកម្ម៖
១) ប្រទេសនាំមុខឲ្យមានការធ្វើបដិវត្តន៍ឧស្សាហកម្មនេះ គឺជាចក្រភពអង់គ្លេស ដោយសារមូលហេតុសំខាន់ៗ៣យ៉ាង។ ទី១ ចក្រភពអង់គ្លេសសម្បូរទៅដោយប្រភពធនធានធ្យូងថ្ម និងរ៉ែដែក ដែលចាំបាច់ត្រូវការដំណើរការណ៍របស់ម៉ាស៊ីនដើម្បីផលិតរបស់ទាំងនេះ។ ទី២ គឺជាស្ថិរភាពនយោបាយរបស់មហាអំណាចពិភពលោកមួយនេះ។ ចុងក្រោយទី៣ ប្រទេសនេះគឺជាអំណាចអាណានិគមដ៏សំខាន់មួយរបស់ពិភពលោក ដែលមិនត្រឹមតែមានប្រភពធនធានសម្រាប់ដំណើរការណ៍ក្នុងឧស្សាហកម្មប៉ុណ្ណោះទេ តែថែមទាំងមានទីផ្សារសម្រាប់លក់ចេញនូវផលិតផលដែលបានផលិតហើយនោះផងដែរ។ ការផ្លាស់ប្ដូរដ៏ធំធេងនេះ ក្រោយមកក៏បានរីកសាយភាយទៅលើប៉ែកអឺរ៉ុបខាងលិច អាមេរិកខាងជើង និងជុំវិញពិភពលោក។
២) ចំណុចសំខាន់អំពីការធ្វើបដិវត្តន៍ឧស្សាហកម្មស្ថិតនៅត្រង់ថា ម៉ាស៊ីនដែលត្រូវបានអភិវឌ្ឍអាចបង្កើតបាននូវផលិតកម្មយ៉ាងច្រើនអនេក បើប្រៀបធៀបនឹងកាលពីមុនដែលផលិតកម្មទាំងឡាយសុទ្ធតែពឹងផ្អែកតែម្យ៉ាងទៅលើកម្លាំងមនុស្ស ធ្វើឲ្យស្ថានភាពសេដ្ឋកិច្ចមុនពេលការចាប់ផ្ដើមនូវបដិវត្តន៍ឧស្សាហកម្មនេះ គឺពីមួយជំនាន់ទៅមួយជំនាន់ផលិតផលទាំងឡាយត្រូវបានផលិតមកក្នុងបរិមាណចំនួនប្រហាក់ប្រហែលគ្នា ជាហេតុនាំឲ្យសេដ្ឋកិច្ចមានសភាពងាប់ក្រឡា។
៣) ប្រទេសដែលមិនទាន់បានសាកល្បងការធ្វើបដិវត្តន៍ឧស្សាហកម្មនេះ មាននៅបណ្ដាប្រទេសដូចជា អាហ្វ្រិក និងអាសីុ។ រីឯប្រទេសដែលបានទទួលបទពិសោធន៍ការផ្លាស់ប្ដូរដ៏ធំធេងនេះរួចហើយ ត្រូវបានគេហៅថា 'ប្រទេសទី៣ ឬប្រទេសអភិវឌ្ឍ'។
៤) ដោយសារការផ្លាស់ប្ដូរនេះបានជះឥទ្ធិពលជាខ្លាំងដល់សេដ្ឋកិច្ចរបស់សង្គម បដិវត្តន៍ឧស្សាហកម្មក៏បង្កើតចេញនូវប្រព័ន្ធសេដ្ឋកិច្ចមួយឈ្មោះថា "របបមូលធននិយម"។
៥) យ៉ាងណាមិញ ការផ្លាស់ប្ដូរជីវភាពប្រជាជនតាមទម្រង់នៃការធ្វើបដិវត្តន៍បែបនេះ មិនបានផ្ដល់ផលវិជ្ជមានចំពោះមនុស្សគ្រប់គ្នានោះឡើយ។ សេដ្ឋកិច្ចរវាងក្រុមអ្នកក្រ និងវណ្ណៈអ្នកធ្វើការ មានគម្លាតខុសគ្នាជាខ្លាំងជាមួយវណ្ណៈអ្នកមានដែលជាម្ចាស់នៃឧស្សាហកម្ម។ ម្យ៉ាងទៀត អ្នកធ្វើការក្នុងរោងចក្រទាំងអស់ សុទ្ធតែទទួលផលប៉ះពាល់ពីប្រព័ន្ធនៃការធ្វើការដដែលៗជាច្រើនម៉ោងបែបនេះ ដែលក្នុងរយៈពេលវែងផ្ដល់គ្រោះថ្នាក់ដល់សុខភាពជាខ្លាំង ព្រមទាំងការប៉ះពាល់ចំពោះបរិស្ថានពីការបញ្ចេញជាតិពុល និងកាកសំណល់ពីឧស្សាហកម្មរោងចក្រផងដែរ។
៦) ដោយសារបែបនេះហើយ បានជាអំឡុងពេលនៃការធ្វើបដិវត្តន៍ឧស្សាហកម្មនោះ ស្របពេលដែលការផ្លាស់ប្ដូរផ្នែកសេដ្ឋកិច្ចចំពោះពួកអ្នកមានមានភាពវិជ្ជមាន អ្នកក្រក៏កាន់តែក្រជាងមុន ដូច្នេះការធ្វើបាតុកម្មប្រឆាំងតវ៉ាក៏កើតមានឡើងនាពេលនោះផងដែរ។
៧) ម៉ាស៊ីនដើរដោយចំហាយទឹក គឺជាម៉ាស៊ីនដំបូងនិងសំខាន់ជាងគេមួយនៅក្នុងបដិវត្តន៍ឧស្សាហកម្ម ដែលត្រូវបានរកឃើញដោយអ្នកច្នៃប្រឌិតជនជាតិអង់គ្លេសមួយរូប ឈ្មោះថា Thomas Newcomen ក្នុងឆ្នាំ១៧១២។ ក្រោយមកក៏ត្រូវបានអភិវឌ្ឍដោយបុរសជនជាតិស្កុតឡែនម្នាក់គឺលោក James Watt។ បើគ្មានម៉ាស៊ីនដើរដោយចំហាយទឹកនេះទេ ពួកយើងក៏ប្រហែលជាមិនបានឃើញការផ្លាស់ប្ដូរដ៏វិជ្ជមានចំពោះមធ្យោបាយធ្វើដំណើរដូចជា រថភ្លើង នាវា ក្រៅពីវាត្រូវបានប្រើប្រាស់ក្នុងរោងចក្រ និងការខួងយករ៉ែរួចហើយ៕
ប្រែសម្រួល៖ ស្រីពៅ
ប្រភព៖ www.owlcation.com
