តើអ្វីជាការបាត់បង់ការចងចាំក្នុងរយៈពេលខ្លី (short-term memory loss) ?
តើអ្នកយល់ឃើញយ៉ាងណាចំពោះអត្ថន័យនៃការបាត់បង់ការចងចាំក្នុងរយៈពេលខ្លី (short-term memory loss) ? ដើម្បីយល់ដឹងពីអត្ថន័យនៃពាក្យគន្លឹះមួយនេះប្រើប្រាស់សម្រាប់ការបកស្រាយទាំងមូល ការយល់ដឹងពីអត្ថន័យនៃពាក្យថា ការចងចាំក្នុងរយៈពេលខ្លី (short-term memory) គឺជាប្រការចាំបាច់ដែលគួរស្វែងយល់ជាមុន។ ការចងចាំក្នុងរយៈពេលខ្លី គឺជាដំណើរការណ៍នៃការផ្ទុកទិន្នន័យបន្តិចបន្តួចជាបណ្ដោះអាសន្នក្នុងរយៈពេលកំណត់ដ៏ខ្លីមួយ ដែលជាទូទៅអាចបានត្រឹមពី១៥ទៅ៣០វិនាទីប៉ុណ្ណោះ និងមានសមត្ថភាពផ្ទុកទិន្នន័យបានត្រឹមតែ៤បណ្ដុំប៉ុណ្ណោះ ដោយផ្អែកតាមការស្រាវជ្រាវថ្មីៗនេះ។ ក្នុងការរស់នៅប្រចាំថ្ងៃ មនុស្សយើងប្រើប្រាស់ការចងចាំក្នុងរយៈពេលខ្លីសម្រាប់ចងចាំលេខទូរស័ព្ទ និងកាលកំណត់ជាដើម ក្នុងទម្រង់ជាការចងចាំបណ្ដោះអាសន្ន រហូតទាល់តែអ្នកបានកត់ត្រាវាទុក។ ងាកមកស្វែងយល់ពីអត្ថន័យនៃពាក្យ "ការបាត់បង់ការចងចាំក្នុងរយៈពេលខ្លី" វិញ បើនិយាយដោយទូលំទូលាយ វាគឺជាអសមត្ថភាពក្នុងការចងចាំអ្វីមួយដែលទើបនឹងកើតឡើងថ្មីៗ។ តើអ្នកអាចដឹងដូចម្ដេចបានថាអ្នកកំពុងប្រឈមមុខនឹងការបាត់បង់ការចងចាំក្នុងរយៈពេលខ្លីនោះ ? ដោយកត់សម្គាល់ខ្លួនឯងពីរោគសញ្ញាខាងក្រោមនេះ អ្នកអាចសន្និដ្ឋានបានថាអ្នកកំពុងមានបញ្ហាបែបនោះហើយ៖
- រោគសញ្ញាធម្មតា៖ ឧស្សាហ៍ដាក់វត្ថុតែមួយនៅខុសកន្លែង មិនអាចរកនឹកពាក្យត្រឹមត្រូវណាមួយយកមកនិយាយបាន មិនចងចាំនូវអ្វីដែលអ្នកទើបនឹងអានរួច ដើរចូលទៅបន្ទប់ណាមួយនិងចាំមិនបានថាហេតុអ្វីអ្នកចូលទៅទីនោះ និងឧស្សាហ៍ហៅឈ្មោះខុស ចំពោះមនុស្សដែលអ្នកតែងខ្វល់ខ្វាយជាដើម។
- រោគសញ្ញាធ្ងន់ធ្ងរ៖ វង្វេងផ្លូវទៅផ្ទះ ភ្លេចភ្លាំងធ្វើកិច្ចការប្រចាំថ្ងៃដូចជា បង់លុយ ឬរៀបចំម្ហូបអាហារ មិនចាំថាអ្នកបានញាំុអាហារហើយឬនៅ សួរសំណួរដដែលជាញឹកញាប់ និងទទួលបទពិសោធន៍នូវការផ្លាស់ប្ដូរអត្តចរិតជាដើម។
ចុះថាតើអ្វីទៅជាឫសគល់បង្កបញ្ហានៃការបាត់បង់ការចងចាំក្នុងរយៈពេលខ្លីនេះឡើងមក ? ឫសគល់ដ៏ចម្បងដែលបង្កជាបញ្ហានេះឡើងមាន២ចំណុចធំៗ ដែលទី១ពាក់ព័ន្ធនឹងស្ថានភាពជំងឺផ្សេងៗរបស់អ្នកបច្ចុប្បន្ន ដែលជះឥទ្ធិពលដល់កម្សោយនៃការចងចាំរបស់អ្នក រួមទាំងការប្រើប្រាស់ថ្នាំមួយចំនួនដែលមានឥទ្ធិពលដល់ភាពចុះខ្សោយនៃការចងចាំ ជាពិសេសថ្នាំបញ្ចុះជាតិខ្លាញ់ និងថ្នាំងងុយគេង។ រីឯដើមហេតុចម្បងមួយទៀត គឺជារបៀបនៃការរស់នៅរបស់អ្នកប្រចាំថ្ងៃ ទាំងការគេងមិនបានគ្រប់គ្រាន់ ឬsleep deprivation ដែលបណ្ដាលមកពីកង្វះអុកស៊ីហ្សែនជាហេតុនាំឲ្យមានការបាត់បង់កោសិកាខួរក្បាលក្នុងតំបន់ដែលមាននាទីផ្ទុកទិន្នន័យសម្រាប់ការចងចាំក្នុងរយៈពេលខ្លី និងទម្លាប់នៃការសម្លឹងមើលអេក្រង់គ្រឿងអេឡិចត្រូនិក ព្រោះថាពន្លឺពណ៌ខៀវដែលជះចេញពីអេក្រង់ធ្វើឲ្យខួរក្បាលទទួលយកពន្លឺនេះថាជាពេលថ្ងៃ រួចបញ្ជូនសញ្ញាឲ្យអ្នកភ្ញាក់ និងដឹងខ្លួន និងពិបាកក្នុងការគេងលក់ស្កប់ស្កល់។ គូសត្រូវរបស់ភាពចុះខ្សោយក្នុងការចងចាំទាក់ទងនឹងរបៀបរស់នៅជាប្រចាំថ្ងៃរបស់អ្នក ក៏ជាបញ្ហាស្មុគស្មាញដែរ។ ភាពតានតឹងនឹងធ្វើឲ្យខួរក្បាលឆាប់វិវត្តទៅរកភាពចាស់ជរា និងការរួមតូច ព្រមទាំងវិវត្តទៅរកជំងឺផ្លូវចិត្ត និងសមត្ថភាពចុះខ្សោយក្នុងការសម្រេចចិត្ត។ មួយវិញទៀតគឺជារបបអាហារដែលអ្នកទទួលទានជាតិស្ករលើសកម្រិត សូម្បីតែប្រភេទអាហារដែលមានជាតិកាបូអីុដ្រាតធម្មតាក៏ដោយ ដែលវានឹងប៉ះពាល់ដល់រយៈពេលកំណត់នៃការផ្ចង់អារម្មណ៍ ការចងចាំក្នុងរយៈពេលខ្លី និងភាពនឹងនផ្នែកអារម្មណ៍ផងដែរ។ ដើម្បីទប់ទល់ជាមួយបញ្ហានេះកុំឲ្យរីករាលដាលដល់ធំរហូតដល់វិវត្តទៅជាជំងឺភ្លេចភ្លាំង (Alzheimer’s) និងពង្រឹងមកវិញនូវការចងចាំរបស់អ្នកឲ្យជ្រះស្រឡះល្អ អ្នកត្រូវធ្វើកិច្ចការតែមួយក្នុងពេលតែមួយ បញ្ចៀសពីការរំខានផ្សេងៗ ផ្ចង់អារម្មណ៍យ៉ាងពេញទំហឹងលើអ្វីមួយ និយាយវាចេញមកលឺៗ បំបែកទិន្នន័យនោះជាបំណែកតូចៗ កត់ត្រា ដើរក្បែរធម្មជាតិ ទទួលទានកាហ្វេ ទទួលទានដំណេកឲ្យបានស្កប់ស្កល់ កាត់បន្ថយភាពស្មុគស្មាញតាមរយៈសកម្មភាពចំណង់ចំណូលចិត្តផ្សេងៗ កាត់បន្ថយអាហារសម្បូរជាតិគ្លុយកូស ជាពិសេសគឺការតាំងសមាធិផ្ចង់អារម្មណ៍នោះឯង៕
ប្រែសម្រួល៖ ស្រីពៅ ប្រភព៖ bebrainfit
