លក្ខណៈពិសេស៤យ៉ាងរបស់ប្រទេសស៊ុយអែត ដែលអ្នកគួររៀនសូត្រតាម
ប្រទេសស៊ុយអែត គឺជាប្រទេសមួយដែលស្ថិតនៅប៉ែកខាងជើងនៃអឺរ៉ុប ជាមួយនឹងផ្ទៃដីសរុបចំនួន៤៥០,២៩៥គីឡូម៉ែត្រការ៉េ និងមានចំនួនប្រជាជនសរុបគិតត្រឹមចុងខែមករាឆ្នាំ២០១៧ ចំនួន១០,០០៥,៦០០នាក់។ តើប្រទេសស៊ុយអែតមានភាពអស្ចារ្យអ្វីខ្លះដែលធ្វើឲ្យប្រជាជនមានមោទនភាពចំពោះប្រទេសរបស់ខ្លួន ?
១) វាជាតំបន់មួយដែលអំណោយផលដល់ការធ្វើជំនួញ៖ យោងតាមតារាងប្រចាំឆ្នាំនៃប្រទេសដ៏ល្អបំផុតសម្រាប់ការធ្វើជំនួញរបស់Forbes (Forbes’ annual list of the Best Countries for Business) ប្រទេសស៊ុយអែតត្រូវបានដាក់ឲ្យនៅលំដាប់កំពូលក្នុងចំណោម១៣៩ប្រទេស បើប្រៀបទៅនឹងមហាអំណាចពិភពលោកអាមេរិក ស្ថិតនៅត្រឹមលំដាប់ទី២៣ប៉ុណ្ណោះ។ កាលពី១០ឆ្នាំមុន ប្រទេសដ៏ល្អបំផុតនាំមុខទី១សម្រាប់ការធ្វើជំនួញមួយនេះ ស្ថិតនៅត្រឹមលំដាប់ទី១៧ឯណោះ។ កន្លងពីរទសវត្សមុន ពួកគេក៏បានឆ្លងកាត់នូវការផ្លាស់ប្ដូរដោយដកថយនូវអំណាចគ្រប់គ្រងរបស់រដ្ឋាភិបាលទៅលើមុខជំនួញក្រុមហ៊ុន និងកាត់បន្ថយនូវប្រាក់រដ្ឋមួយចំនួនដែលត្រូវចំណាយលើសុខុមាលភាពរបស់ប្រជារាស្ត្រ។ ស៊ុយអែតក៏ជាប្រទេសមួយនាំមុខឲ្យបច្ចេកវិទ្យាច្នៃប្រឌិត ដូចមានជាតឹកតាងនូវក្រុមហ៊ុនល្បីឈ្មោះជាច្រើនដូចជា Volvo, Electrolux, Ericsson, IKEA និង H&Mជាដើម។
២) ការប្រកួតប្រជែងជាសកល៖ តាមការចេញផ្សាយរបស់វេទិកាសេដ្ឋកិច្ចពិភពលោក (The World Economic Forum) ទៅលើសន្ទស្សន៍នៃការប្រកួតប្រជែងជាសកល (Global Competitiveness Index) ដែលធ្វើឡើងជារៀងរាល់ឆ្នាំ ប្រទេសដ៏មានឥទ្ធិពលមួយនេះ ក៏ទទួលបានចំណាត់ថ្នាក់ល្អដោយស្ថិតក្នុងលំដាប់ទី៦ដែរ ជាមួយនឹងសន្ទុះនៃការកើនឡើងមានដល់ទៅ៣.៧%នាឆ្នាំ២០១៦។ ម្យ៉ាងទៀតក៏ជាភាពអស្ចារ្យរបស់ប្រទេសដែរ ដែលបានប្រឹងប្រែងទៅលើការកាត់បន្ថយឱនភាពរហូតធ្លាក់ចុះអស់៣០លេខមកនៅត្រឹមលំដាប់ទី២២ក្នុងឆ្នាំ២០១៥។ រីឯទីផ្សារកម្លាំងពលកម្មរបស់ស៊ុយអែតបានបំពេញដំណើរការណ៍ទៅយ៉ាងមានប្រសិទ្ធភាព រហូតអាចធ្វើឲ្យប្រទេសនេះមានអត្រាអ្នកមានការងារធ្វើខ្ពស់ ព្រមទាំងកម្រិតនៃការចូលរួមពីស្ត្រីក្នុងកម្លាំងពលកម្មក៏ខ្ពស់ផងដែរ។
៣) មានកម្រិតនៃអំពើពុករលួយទាប៖ ជាកិត្តិសព្ទដ៏គួរឲ្យស្ងើចសរសើររបស់ប្រទេស ស៊ុយអែតធ្វើបានយ៉ាងល្អក្នុងការទប់ស្កាត់អំពើពុករលួយរហូតអាចស្ថិតក្នុងលំដាប់ទី៤ក្នុងសន្ទស្សន៍អំពើពុករលួយនៃតម្លាភាពអន្តរជាតិនាពេលថ្មីៗនេះ (Transparency International's latest Corruption Perceptions Index) ក្នុងចំណោមការវាស់ស្ទង់ទៅលើ១៨៦ប្រទេសក្នុងសកលលោក។
៤) មានលិខិតឆ្លងដែនដែលមានអំណាច៖ អំណាចនៃលិខិតឆ្លងដែនត្រូវបានកំណត់ដោយផ្អែកទៅលើថាតើប្រទេសមួយអាចចូលទៅកាន់ប្រទេសដទៃៗទៀតដោយមិនស្ថិតនៅក្រោមការកំណត់របស់ច្បាប់បានប៉ុន្មានប្រទេស ឬនិយាយយ៉ាងសាមញ្ញគឺជាការចូលទៅកាន់ប្រទេសដទៃដោយមិនទាមទារនូវការសុំបែបបទទិដ្ឋាការ (visa)។ តាមការចាត់លំដាប់ថ្នាក់របស់Henley & Partners បានបង្ហាញថា ប្រទេសស៊ុយអែតគឺជាប្រទេសដែលមានលិខិតឆ្លងដែនមានអំណាចបំផុតស្ថិតក្នុងលំដាប់ទី២ ជាចំណាត់ថ្នាក់ដែលនៅចាញ់ប្រទេសអាល្លឺម៉ង់មួយលំដាប់។ ទោះជាប្រជាជនអាល្លឺម៉ង់អាចចូលទៅកាន់១៧៧ប្រទេសដោយមិនចាំបាច់សុំបែបបទទិដ្ឋាការ ប្រជាជនស៊ុយអែតចាញ់អាល្លឺម៉ង់ត្រឹមតែ១ប្រទេសតែប៉ុណ្ណោះក្នុងចំណោមប្រទេសដែលអាចទៅរួចចំនួន២១៨ប្រទេស៕
ប្រែសម្រួល៖ ស្រីពៅ ប្រភព៖ worldeconomicforum
