ក្រៅពីប្រាក់ខែខ្ពស់ បុគ្គលិកពិតជាត្រូវការចំណុចទាំង ៣យ៉ាង នេះពីថ្នាក់លើរបស់ខ្លួន
ជាទូទៅបុគ្គលិកគ្រប់រូប សម្លឹងឃើញប្រាក់ខែ ជាគោលសំខាន់មួយដែលជំរុញឲ្យពួកគេចង់ធ្វើការនៅក្រុមហ៊ុនណាមួយ។ ប៉ុន្តែវាគ្រាន់តែជាផ្នែកមួយប៉ុណ្ណោះ ហើយមានចំណុចសំខាន់ៗជាច្រើនដែលបុគ្គលិកពិតជាត្រូវការមិនអាចខ្វះបាន ទោះមានប្រាក់ខែខ្ពស់ក៏ដោយ។
១) យុត្តិធម៌៖រឿងអយុត្តិធម៌តែងកើតមាន នៅកន្លែងធ្វើការមួយចំនួន ជាពិសេសបុគ្គលិកដែលមិនសូវចេះយកចិត្តយកថ្លើមថ្នាក់លើមួយចំនួន។ ថ្នាក់លើដែលចូលចិត្តឲ្យគេអែបអបបែបនេះ ពិតជាមិនងាយនឹងជំរុញឲ្យការងារក្រុមហ៊ុនដំណើរការទៅបានយ៉ាងល្អនោះឡើយ ព្រោះបុគ្គលិកដែលមានសមត្ថភាព នៅមិនយូរឡើយ។ យុត្តិធម៌ជារឿងសំខាន់បំផុត ក្នុងការធ្វើការជាក្រុម ព្រោះថាបុគ្គលិកគ្រប់រូបនឹងគ្មានឆន្ទៈក្នុងការបន្តការងារខ្លាំងក្លាទៀតឡើយ បើថ្នាក់លើផ្តល់តម្លៃ និង គុណសម្បត្តិតែលើបក្សពួករបស់ខ្លួន។
២) ការលើកទឹកចិត្ត៖ ការលើកទឹកចិត្ត គឺពិតជាសំខាន់សម្រាប់បុគ្គលិកទាំងអស់ ព្រោះថា គ្មាននរណាម្នាក់អាចដោះស្រាយបញ្ហាបានទាំងអស់គ្រប់ពេលឡើយ ហើយតែងជួបបញ្ហាជៀសមិនផុត។ នៅពេលដែលបុគ្គលិកជួបបញ្ហាស្មុគស្មាញផ្សេងៗ ពួកគេពិតជាត្រូវការពាក្យលើកទឹកចិត្តពីថ្នាក់លើរបស់ខ្លួន ដើម្បីមានកម្លាំងចិត្តបន្តការងារទៀត។
៣) គោលការណ៍ច្បាស់លាស់៖ ធ្វើការក្នុងក្រុមមួយដែល គ្មានគោលការណ៍ និង ផែនការច្បាស់លាស់ នាំឲ្យការងារមានភាពច្របូកច្របល់ខ្លាំង។ ដូច្នេះហើយ ថ្នាក់លើដែលមានសមត្ថភាព និង ភាពឆ្លាតវៃគួរតែបង្កើតឲ្យមានគោលការណ៍ច្បាស់លាស់ ក្នុងក្រុមការងារដើម្បីជាប្រទីបមួយបំភ្លឺផ្លូវដល់មនុស្សគ្រប់គ្នា៕
ដោយ៖ រតនា វិចិត្រ
ប្រភព៖ www.entrepreneur.com & www.lifehack.org
