ហេតុអ្វីអ្នកនៅតែមិនអាចរកបានការងារល្អ ដូចអ្នកទៃ? អានមូលហេតុទាំង៥នេះ!
ការទទួលបានការងារល្អ គឺជាក្ដីប្រាថ្នារបស់មនុស្សគ្រប់រូបនៅក្នុងសង្គម ដើម្បីអាចទ្រទ្រង់ជីវភាពគ្រួសារឲ្យបានប្រសើរ មិនថានៅកម្ពុជា ឬនៅប្រទេសណានោះទេ។ ប៉ុន្តែយ៉ាងណាក៏ដោយ ការងារដែលល្អនោះ ពិតជាមិនងាយរកនោះឡើយ ជាពិសេសសម្រាប់អ្នកដែលមិនស្វាហាប់ក្នុងការឆាប់ចាប់យកឱកាស។ ខាងក្រោមនេះ ជាហេតុផល
១) ខ្វះចំណេះដឹង៖ ការងារដែលល្អ និង ផ្ដល់អត្ថប្រយោជន៍ច្រើននោះ គឺតែងធ្លាក់លើតែមនុស្សណាដែល មានចំណេះដឹងខ្ពស់។ ប្រសិនបើចំណេះដឹងរបស់អ្នកមិនគ្រប់គ្រាន់ ឬ មានតែសញ្ញាប័ត្រប៉ុន្តែគ្មានចំណេះដឹង គឺពិតជាមិនអាចទៅរួចនោះឡើយ។ ដូច្នេះហើយ បើអ្នកជាសិស្ស គឺគួរតែព្យាយាមពង្រឹងចំណេះដឹងឲ្យបានខ្ពស់ ដើម្បីជាទុនក្នុងការចាប់យកការងារល្អដែលអ្នកពេញចិត្ត។
២) ខ្វះបទពិសោធន៍៖ ចំណេះដឹង និង បទពិសោធន៍មិនអាចខ្វះផ្នែកណាមួយបានឡើយ ព្រោះបើគ្រាន់តែមានចំណេះដឹង តែខ្វះបទពិសោធន៍នោះ ក៏ម្ចាស់ក្រុមហ៊ុនត្រូវដកថយដើម្បីគិតបន្តិចសិនដែរ។ ដូច្នេះជម្រើសល្អ ក្នុងពេលដែលកំពុងសិក្សានោះ អ្នកគួរតែព្យាយាមសន្សំបទពិសោធន៍ការងារបណ្ដើរៗ ជាពិសេសធ្វើការងារណាដែលពាក់ព័ន្ធនឹងការងារដែលអ្នកចង់បាននៅពេលអនាគត។
៣) គិតរឿងប្រាក់ខែខ្លាំងពេក៖ ការងារដែលល្អមិនមែនមានន័យថា នឹងផ្ដល់ប្រាក់ខែកប់ពពកភ្លាមៗដល់អ្នកនោះឡើយ ពោលគឺអ្វីៗទាមទារពេលវេលាឲ្យបានសមស្រប។ ដូច្នេះប្រសិនបើអ្នក គិតថាវាជាការងារដែលល្អសម្រាប់អ្នក សូមកុំទាន់ទាមទារប្រាក់ខែខ្ពស់ពេក នាដំណាក់កាលដំបូង ពោលគឺធ្វើយ៉ាងណាត្រូវឲ្យក្រុមហ៊ុននោះទទួលអ្នកសិន។ ក្រោយពេលដែលមានឱកាសចូលបម្រើការហើយ អ្នកត្រូវតែបង្ហាញដល់ក្រុមហ៊ុនថា អ្នកគឺពិតជាមនុស្សដែលអស្ចារ្យ ហើយសមតែទទួលបានប្រាក់ខែខ្ពស់។
៤) មិនចេះចាប់យកឱកាស៖ បច្ចុប្បន្នទីផ្សារការងារកម្ពុជា គឺមិនទូលាយពេកនោះទេ ដូច្នេះហើយឱកាសល្អតែងតែកើតមានចំពោះអ្នកស្វែងរកប៉ុណ្ណោះ ហើយវាពិតជាមិនអាចដើរទៅគោះទ្វារដល់ផ្ទះរបស់មនុស្សខ្ជិលឡើយ។ សម្រាប់មនុស្សមួយចំនួន ពិតជាមិនអាចទទួលបានការងារល្អឡើយ ទោះបីជាមានចំណេះដឹងខ្ពស់ក្ដី ដោយសារតែការដេកចាំគេផ្ដល់ឱកាសឲ្យ។
៥) គ្មានភាពអំណត់ក្នុងការងារ៖ គ្រប់ទម្រង់នៃការងារទាំងអស់ គឺសុទ្ធតែមានចំណុចលំបាកផ្សេងៗ ពីគ្នា ដូច្នេះអ្វីដែលអ្នកត្រូវមាននោះ គឺភាពអំណត់ ដើម្បីអាចជម្នះវាបាន ទោះបីជាជួបបញ្ហាប៉ុណ្ណាក៏ដោយ។ សម្រាប់មនុស្សគ្មានចិត្តអត់ធន់ ប្រាកដណាស់ថា នឹងត្រូវវេចបង្វេចរត់ចេញមិនខាន៕
ដោយ៖ អ៊ុន ភក្តី
