https://youtu.be/DKjK-ZcT7pY
អនាគតនៃវិស័យដឹកជញ្ជូន ត្រូវគេរំពឹងថា នឹងមានការអភិវឌ្ឍលើសពីអ្វីដែលបច្ចុប្បន្នមាន។ កត្តាសំខាន់ដែលអាចធ្វើឲ្យការដឹកជញ្ជូនរីកចម្រើនបានគឺ អាស្រ័យដោយមធ្យោបាយ ជាយានយន្ត និងស្ថានភាពផ្លូវធ្វើដំណើរតែម្ដង ជាក់ស្ដែងផ្លូវបំពង់អភិវឌ្ឍដោយលោក Elon Musk នាយកប្រតិបត្តិក្រុមហ៊ុន Space X និង Tesla Motor និងរថយន្តបើកបរដោយស្វ័យប្រវត្តិជាដើម។
រយៈពេល ២ឆ្នាំមកហើយ ក្រុមហ៊ុនរថយន្ត Nissan បានចាប់ផ្ដើមដំណើរការមន្ទីរពិសោធន៍ ដើម្បីស្រាវជ្រាវ និងអភិវឌ្ឍយានយន្តទំនើបសម្រាប់អនាគត។ ជាក់ស្ដែងនៅជំហានដំបូងនេះ ក្រុមហ៊ុនទើបសម្រេចបានគំរូកូនរថយន្តអគ្គិសនីតូចៗ ដែលអាចប្រើជំនួសរ៉ឺម៉ក និងជំនួសឱ្យការប្រើរថយន្តធំៗដែលនាំឱ្យឆាប់មានការកកស្ទះចរាចរណ៍បានមួយផ្នែក។
Mobility Concept ថ្មីនេះ ជាកូនយានជំនិះដើរដោយអគ្គិសនី មានកង់បួនដូចរថយន្តទូទៅ ទើបត្រូវបានធ្វើតេស្តលើដងផ្លូវនៅសហរដ្ឋអាមេរិក។ វាមានល្បឿន ២៥ម៉ាយល៍/ម៉ោង ឬប្រហែល ៤០គីឡូម៉ែត្រ/ម៉ោង។ មិនខុសនឹងរថយន្តទូទៅឡើយ Mobility Concept នេះក៏មានទ្វារ បើកឡើងដូចបក្សីត្រដាងស្លាប ស្រដៀងនឹងរថយន្ត Lamborghini អីចឹង។ នៅលើរថយន្តនេះ មានបំពាក់ដោយអេក្រង់តូចមួយ សម្រាប់បង្ហាញកម្រិតអាគុយដែលនៅសល់។ អាគុយរថយន្តនេះ អាចប្រើប្រាស់ក្នុងការបើកបរបានចម្ងាយផ្លូវ ៤០ម៉ាយល៍ ឬប្រហែល ៦៥គីឡូម៉ែត្រ។
ក្រុមហ៊ុន Nissan បានតាំងបង្ហាញកូនរថយន្ត Mobility Concept របស់ខ្លួនប៉ុន្មានម៉ូដែល នៅក្នុងពិព័រណ៍រថយន្ត New York International ។ ពេលនេះ លោក Josh Westerhold ដែលជាអ្នកគ្រប់គ្រងជាន់ខ្ពស់នៅមន្ទីរ ពិសោធន៍ Future Lab របស់ Nissan បានប្រាប់គេហទំព័រ TheVerge ថា ក្រុមរបស់លោក ធ្វើសម្រង់មតិ សួរសំណួរមួយចំនួនដល់សាធារណជនអំពីចំណាប់អារម្មណ៍ពាក់ព័ន្ធនឹងកូនរថយន្តរបស់ខ្លួន។ គេមិនទាន់ហ៊ានអះអាងថា Mobility Concept របស់ Nissan នឹងចូលខ្លួនមកបម្រើដល់វិស័យដឹកជញ្ជូនពេលអនាគត ជោគជ័យដែរឬយ៉ាងណាទេ ខណៈ បច្ចុប្បន្នវាគ្រាន់តែជាគម្រោងថ្មីថ្មោងប៉ុណ្ណោះ៕
