ប្រព័ន្ធប្រតិបត្តិការ iOS 9.3 ពេលនេះបង្ហាញខ្លួន ដែលអាចឱ្យអតិថិជនប្រើប្រាស់ឧបករណ៍ iOS ទាំងឡាយធ្វើបច្ចុប្បន្នភាពបានហើយ។ ប្រសិនលោកអ្នកកំពុងប្រើចាប់ពីជំនាន់ iPhone 4s, ហើយ iPad ចាប់ពីជំនាន់ iPad 2 និង iPod Touch ជំនាន់ទី៥ អ្នកនឹងទទួលបានសារបញ្ជាក់ប្រាប់ថា ឧបករណ៍អេឡិចត្រូនិករបស់អ្នក គឺអាចអាប់ដេតសូហ្វ៊ែរបាន។ យ៉ាងណា អ្នកក៏អាចចូលទៅឆែកមើលនៅក្នុង Settings ដោយខ្លួនឯងផងដែរ ដោយចូលទៅ Settings → General → Software Update។
ចុះក្រៅពីរបៀបអាប់ដេតហើយនោះ តើអ្នកស្វែងយល់ពីលក្ខណៈពិសេសរបស់ iOS 9.3 បានច្រើនកម្រិតណា? ខាងក្រោមនេះ គឺជាមុខងារថ្មីទាំងឡាយដែលមាននៅលើ iOS 9.3៖
១) Night Shift
នៅក្នុង Control Center មាននូវប៊ូតុងថ្មីមួយ ព្រមទាំងជម្រើស (option) ដែលអ្នកអាចកំណត់ពេលលើការប្រើមុខងារ Night Shift ដើម្បីឱ្យមានការផ្លាស់ប្ដូរពណ៌ នៃអេក្រង់របស់អ្នកដោយស្វ័យប្រវត្តិ អាស្រ័យតាមពេលវេលា។ ដើម្បីអនុវត្តត្រូវចូលទៅ Settings → Display & Brightness → Night Shift រួចធ្វើការកំណត់។
https://youtu.be/GO5X8V3ih3M
គំនិតក្នុងការបង្កើតមុខងារ Night Shift ឡើងមកគឺដើម្បីឱ្យអ្នក កែពណ៌ពន្លឺរបស់អេក្រង់ ងាយស្រួលសម្លឹងមើលទៅតាមកាលវេលា និងមិនឱ្យប៉ះពាល់ដល់ដំណេក ដោយសារពណ៌ពន្លឺបាចសាចខ្លាំងមកលើភ្នែក ហើយក៏អាចធ្វើឱ្យអ្នកអាចលេងទូរស័ព្ទបានយូរជាងមុនយ៉ាងហោច កន្លះម៉ោងទៀត ដោយមិនឆាប់ងងុយគេង តាមរយៈការកំណត់ពណ៌ពន្លឺនេះ។
២) Education for iPad
ចំពោះ iOS 9.3 នៅលើថេប្លេត iPad ត្រូវបានបញ្ចូលមុខងារពិសេសគឺគាំទ្រឱ្យមានការប្រើដោយដៃមនុស្សច្រើន (multiple user) ពោលជាមនុស្សផ្សេងគ្នា។ មុខងារនេះ ត្រូវបានបង្កើតឡើងសម្រាប់ការរៀនសូត្ររបស់ក្មេង នៅក្នុងថ្នាក់រៀនថ្មីផ្សេងៗគ្នា (Classroom) និងដំណើរការគ្រប់គ្រងសាលារៀន Apple School Manager សម្រាប់ User ផ្សេងៗគ្នា ងាយស្រួលផ្ទេរទិន្នន័យ (syncs) ហើយគ្រូៗងាយស្រួលគ្រប់គ្រង iPad ទាំងអស់នៅក្នុងថ្នាក់រៀនមួយថែមទៀត។
៣) ភ្ជាប់ទៅកាន់នាឡិកា Apple Watch ច្រើនជាមួយឧបករណ៍ iOS តែមួយ
ប្រព័ន្ធ iOS 9.3 អាចឱ្យអ្នកធ្វើការភ្ជាប់ (pair) ជាមួយនាឡិកា Apple Watch បានច្រើនជាមួយឧបករណ៍ iOS តែមួយ។ វាក៏ជាមុខងារមានប្រយោជន៍មួយ ដែលបណ្ដាអ្នកអភិវឌ្ឍកម្មវិធី (developer) ចង់ឱ្យមានផងដែរ។ ប៉ុន្តែក៏តម្រូវឱ្យនាឡិកា Apple Watch ទាំងនោះដំណើរការដោយ watchOS 2.2 ចុងក្រោយដែរ។
៤) ដាក់លេខកូដសម្ងាត់នៅលើកម្មវិធីកត់ចំណាំ (Note)
មុខងារថ្មីមួយទៀតនៅលើ iOS 9.3 គឺ អាចឱ្យអ្នកដាក់ password នៅលើកម្មវិធី note ដើម្បីជៀសវាងការលួចមើលពីអ្នកក្រៅ។
៥) មុខងារ 3D Touch ដំណើរការជាមួយកម្មវិធីច្រើនជាងមុន
ពេលនេះ អ្នកអាចប្រើ 3D Touch បានជាមួយកម្មវិធីកាន់តែច្រើនជាងមុនដូចជា Weather, Compass, App Store, iTunes Store និង Settings ជាដើម។ 3D Touch អាចឱ្យអ្នកភ្ជាប់ WiFi និង Bluetooth បានរហ័ស ចំណេញពេលវេលា។
៦) មុខងារបន្ថែមថ្មីនៅលើ Apple Health
Apple Helath គឺជាកម្មវិធីមួយទៀតដែលទទួលបានមុខងារថ្មី អាចបង្ហាញសកម្មភាពផ្សេងៗដូចជា ចលនាដុតកាឡូរី, នាទីធ្វើលំហាត់ប្រាណ និងចំនួនម៉ោងដែលបានឈរជាដើម។ ក្រៅពីនេះនៅមានការកែលំអនៅលើកម្មវិធីមួយចំនួនផ្សេងទៀតដូចជា Verizon Wi-Fi calling, Landscape mode សម្រាប់ Apple News, Podcast មើលវីដេអូ full-screen, iBook គាំទ្រការ sync ជាមួយ iCloud ដូចជា PDFs និង eBookនិងមានជួសជុលបញ្ហា bug ដែលបានកើតមាននៅលើ Version មុនៗ៕
