បច្ចុប្បន្នមានស្មាតហ្វូនច្រើនស៊េរី ច្រើនម៉ាក កំពុងចរាចរលើទីផ្សារ ហើយបើមើលលើទីផ្សារក្នុងស្រុក នៃប្រទេសកម្ពុជាយើងវិញឃើញថា ទូរស័ព្ទថ្មីរបស់ Samsung ដែលទើបចេញលក់គឺ Galaxy S7 និង S7 edge ពិតជាបានទាញចំណាប់អារម្មណ៍សាធារណជនយ៉ាងខ្លាំង។ ទោះជាយ៉ាងណា iPhone ក៏នៅតែឈរជើងរឹងមាំ នៅតែមានអតិថិជនបន្តគាំទ្រ និងទិញប្រើ។
សូមបញ្ជាក់ថា មូលហេតុធ្វើឲ្យទាំង iPhone និង Galaxy ទទួលបានការពេញនិយមប្រើ គឺដោយសារទូរស័ព្ទទាំងពីរភ្ជាប់ដោយលក្ខណៈ សម្បត្តិខ្ពស់ ល្បឿនលឿន។ ទន្ទឹមនឹងលក្ខណៈ សម្បត្តិល្អ ប៉ុន្តែតម្លៃអាចថ្លៃបន្តិច ពិសេសគឺ iPhone តែម្ដង ដែលម៉ូដែលទើបចេញលក់ សុទ្ធតែជាង ១ពាន់ដុល្លារទៅហើយ។ ដូច្នេះទំព័រនេះ យើងនឹងណែនាំស្មាតហ្វូនល្អប្រើស៊េរីខ្ពស់ Quad HD ដែលមានតម្លៃក្រោម ៤០០ដុល្លារ សម្រាប់អ្នកមធ្យមទិញប្រើបានយ៉ាងស្រួល មិនបាច់ចំណាយប្រាក់ច្រើន។
១) BLU Pure XL
មានលក់លើទីផ្សារតាំងពីខែកញ្ញា ឆ្នាំ២០១៥។ Pure XL ជាស្មាតហ្វូនរបស់ក្រុមហ៊ុនអាមេរិក BLU ភ្ជាប់លក្ខណៈ សម្បត្តិល្អប្រើ ដូចជា អេក្រង់ ៦អ៊ីញ Quad HD Super AMOLED។ BLU Pure XL គឺជាស្មាតហ្វូនធំជាងគេក្នុងបញ្ជីចំណាត់ថ្នាក់នេះ។ វាមានដង់ស៊ីតេភិចហ្សែលខ្ពស់រហូតដល់ 490ppi មានមេម៉ូរីម៉ាស៊ីនទំហំ 64GB, RAM 3GB, បំពាក់ដោយឈីប MediaTek Hekio X10, ដំណើរការដោយ Android Lollipop។ តម្លៃនៅលើគេហទំព័រ Amazon គឺត្រឹមតែ ៣៤៩ដុល្លារអាមេរិក។
២) LG G4
ជាស្មាតហ្វូនស៊េរីទំនើបរបស់ LG ភ្ជាប់លក្ខណៈសម្បត្តិខ្ពស់ៗ។ វាមានអាយុមិនទាន់ដល់ ១ឆ្នាំនៅឡើយទេ បន្ទាប់ពី LG ទើបប្រកាសជំនាន់ថ្មីគឺ LG G5 ថ្មីៗកន្លងទៅ។ LG G4 មានអេក្រង់ ៥,៥អ៊ីញ IPS Quad HD ដង់ស៊ីតេភិចហ្សែលរហូតដល់ 538ppi, កាមេរ៉ាសមត្ថភាពខ្ពស់ទំហំ 16MP, RAM 3GB, មេម៉ូរីម៉ាស៊ីន 32GB និងអាចបន្ថែមកាត microSD បាន។ G4 បំពាក់ដោយឈីប 6-core Qualcomm Snapdragon 808។ តម្លៃ G4 នៅលើគេហទំព័រ http://www.bhphotovideo.com/ គឺ ៣៧៩,៩៩ដុល្លារអាមេរិក។
៣) Motorola Moto X Pure Edition
ក៏ជាស្មាតហ្វូនទំនើបមួយដែលមានតម្លៃ ៣៩៩ដុល្លារ។ វាមានអេក្រង់ ៥,៧អ៊ីញ Quad HD IPS ជាមួយដង់ស៊ីតេភិចហ្សែល 520ppi ដំណើរការដោយ Android Marshmallow ហើយបំពាក់ឈីបដូច LG G4 ដែរ គឺ Qualcomm Snapdragon 808។ Moto X Pure Edition មានកាមេរ៉ារហូតដល់ 21MP, RAM 3GB, អាចដោយកាត microSD បាន និងមានបច្ចេកវិទ្យាការពារមិនឱ្យចូលធូលីដីថែមទៀត។
៤) ZTE Axon Pro
ត្រូវបានចេញលក់តាំងពីខែសីហា ឆ្នាំ២០១៥ ភ្ជាប់ដោយលក្ខណៈ សម្បត្តិខ្ពស់ ក្នុងនោះមាន RAM 4GB បំពាក់ឈីប Octa-core Snapdragon 810។ វាមានអេក្រង់ ៥,៥អ៊ីញ Quad HD ការពារដោយកញ្ចក់ Gorilla Glass ដើរដោយ Android 6.0 Marshmallow។ តម្លៃរបស់វាខុសគ្នាទៅតាមទំហំមេម៉ូរីគឺ ៣៤៩ដុល្លារ (ទំហំ 32GB) ឬ ៣៧៩ដុល្លារ (ទំហំ 64GB)៕
