ប្រព័ន្ធប្រតិបត្តិការ iOS ទទួលបានការពេញនិយមប្រើច្រើន ដោយសារវាត្រូវបានបញ្ចូលរួចជាស្រេចនៅលើផលិតផលលក់ដាច់របស់ Apple ទាំងនៅលើ iPhone, iPad និង iPod។ ក្នុងនោះ iPhone 6s/6s Plus ដែលបំពាក់ដោយ iOS 9 ក៏ទទួលបានការចាប់អារម្មណ៍ពីអ្នកប្រើច្រើនណាស់ដែរ។
ខណៈ Android ជាគោលដៅធំជាង ក្នុងការដែលអ្នកសរសេរមេរោគសម្រាប់វាយប្រហារលើឧបករណ៍ចល័ត (mobile malware) នោះ ចំណែក iPhone 6s/6s Plus ក៏គួរឱ្យមានការយកចិត្តទុកដាក់លើបញ្ហាសុវត្ថិភាពផងដែរ។ មេរោគជាមួយផ្នែកក្នុងការលុកលុយ វាយប្រហារឯកសាររបស់អ្នកទៅហើយ ចំណែកការប្រើប្រាស់ដោយមានការធ្វេសប្រហែសក៏ជាកំហុសមួយផងដែរ។ បើមិនប្រយ័ត្នឯកសារ ឬរឿងរ៉ាវពាក់ព័ន្ធខ្លួនអ្នក អាចនឹងបែកខ្ចរខ្ចាយចេញពី iPhone សំណព្វចិត្តអ្នកបាន។
ដូច្នេះទំព័រនេះ យើងនឹងនាំលោកអ្នក មកស្វែងយល់គន្លឹះផ្ដល់សុវត្ថិភាពសម្រាប់ iPhone 6s/6s Plus ដើម្បីបន្ថយហានិភ័យបញ្ហាសុវត្ថិភាពលើកំពូលស្មាតហ្វូននេះបានមួយផ្នែក។
-កំណត់ប្រើ Touch ID ជាមួយ Passcode ខ្លាំងពោលគឺមានលក្ខណៈស្មុគស្មាញពិបាកឱ្យគេបំបែក ឬស្មានត្រូវ
តាមធម្មតាការដាក់ Passcode លើ iPhone គឺដោយប្រើលេខ ៤ខ្ទង់ គឺផ្ដល់សុវត្ថិភាពបានហើយ យ៉ាងណា បើអ្នកដាក់លេខសម្ងាត់កាន់តែវែងវានឹងផ្ដល់ទំនុកចិត្តរឹតតែខ្លាំង គ្មាននរណារាវត្រូវ Password របស់អ្នកបានទេ។ បើចង់ដាក់ Passcode វែងនេះ ត្រូវចូលទៅ Settings → Touch ID & Passcode ហើយបិទ (switch off) Simple Passcode ដើម្បីជ្រើសរើស Passcode បានវែង ដែលបូកបញ្ចូលទាំងតួអក្សរ និងលេខ។
-បិទសារជូនដំណឹង notification ដែលបង្ហាញទោះបីនៅពេលចាក់សោទូរស័ព្ទ (lock screen) ហើយក៏ដោយនោះ
ឧបករណ៍ដែលមានសុវត្ថិភាពមួយហើយនោះ មិនប្រាកដថា ទិន្នន័យក្នុងនោះក៏មានសុវត្ថិភាពដូចគ្នាទេ។ ជាក់ស្ដែងនៅលើ សារ Notification នៅលើ iPhone អាចបង្ហាញគ្រប់ពេល ឱ្យតែមានសារជូនដំណឹងពីសេវាកម្មកម្មវិធីផ្សេងៗនៅលើទូរស័ព្ទ ទោះបីអ្នកបានចាក់សោទូរស័ព្ទដោយមាន Passcode សម្ងាត់ហើយក៏ដោយ។ បែបនេះ ការសម្ងាត់នៃការសន្ទនារបស់អ្នក នឹងបែកធ្លាយ។ ដូច្នេះអ្នកអាចបិទ Notification ផ្សេងៗបាន ដោយចូលទៅ Settings → Passcode (ឬ Touch ID and Passcode) → Allow access when locked ហើយ បិទ (disallow) កម្មវិធីពីការបង្ហោះ (Post) សារ notification មកលើស្រ្គីនដែលបានចាក់សោ (lock screen)។
-ប្រើ ២-ជំហានក្នុងការផ្ទៀងផ្ទាត់៖
ប្រើ two-step verification នៅពេលណាដែលមុខងារអាចដំណើរការ ធ្វើដូចនេះ នឹងរឹតតែផ្ដល់សុវត្ថិភាពចំពោះ iPhone។ មុខងារនេះ នឹងតម្រូវឱ្យអ្នកចំណាយពេលក្នុងការបំពេញព័ត៌មានផ្ទៀងផ្ទាត់ទម្រង់មួយ ដោយការបញ្ចូល Password របស់អ្នកនិងកូដសម្ងាត់ ៤ខ្ទង់ទៀត នៅពេលអ្នក Singin ចូលទៅសេវាកម្ម iCloud ឬទិញ app ឬអ្វីៗពី iTunes និង App Store ប៉ុន្តែវាក៏ផ្ដល់សុវត្ថិភាពខ្ពស់ជូនលោកអ្នកដែរ។ ដើម្បីបើកជម្រើសនេះ ត្រូវចូលទៅ https://appleid.apple.com → Manage your Apple ID → Password and Security → Two-Step Verification ហើយធ្វើតាមការណែនាំតាមលំដាប់លំដោយ ដើម្បីប្ដូរការកំណត់សុវត្ថិភាពថ្មី៕
-ធ្វើការ backup រាល់អ្វីដែលសំខាន់ៗលើ iPhone របស់អ្នក
Backup ជាវិធីសាស្ត្រល្អមួយ ក្នុងការបញ្ចៀសបញ្ហាបាត់បង់ឯកសារជាយថាហេតុ ករណីបាត់ iPhone ឬត្រូវចោរលួចជាដើម។ អ្នកអាចធ្វើការ backup ទិន្នន័យទាំងឡាយចូលទៅ iCloud បាន។ ចូលទៅ iCloud → Backup ហើយចុចបើក (On)។ បន្ទាប់មកត្រូវឱ្យទូរស័ព្ទភ្ជាប់ទៅជាមួយអ៊ីនធឺណិត ដើម្បីអាច backup បានដូចជា document, account data និងព័ត៌មានផ្សេងៗទៀត។ ប្រសិនទូរស័ព្ទអ្នកត្រូវបានបាត់ ឬចោរលួច ដើម្បីសុវត្ថិភាពទិន្នន័យខ្លាចគេមើលឃើញ អ្នកក៏អាចបញ្ជាលុបចោលពីចម្ងាយបានផងដែរ ហើយអ្នកអាច restore ចូលទៅ iPhone ថ្មីបាន។
-ចុងក្រោយ អ្នកត្រូវដឹងពីវិធានការ ក្រោយ iPhone របស់អ្នកបាត់ ឬត្រូវចោរលួចយក
រាយការណ៍ទូរស័ព្ទ iPhone ដែលត្រូវចោរលួចឱ្យប៉ូលិសបានដឹងជារឿងមួយ ហើយក៏ត្រូវរាយការណ៍ទៅក្រុមហ៊ុនសេវាទូរស័ព្ទនូវលេខដែលអ្នកបានបាត់ដែរ ព្រោះខ្លាចជនល្មើសប្រើប្រាស់លេខទូរស័ព្ទក្នុងបទល្មើសផ្សេងៗ ដែលនាំឱ្យមានការយល់ច្រឡំចំពោះរូបអ្នក។ បើនិយាយពីបរបទស្រុកគេ ពោលគឺក្រុមហ៊ុនសេវាទូរស័ព្ទរបស់អាមេរិក T-Mobile គឺមាននូវ security protocol មកជាមួយ ដែលអាចជួយអតិថិជនធ្វើការផ្អាកខ្សែទូរស័ព្ទរបស់អ្នកប្រើផ្ទាល់ និងលុបទិន្នន័យចោល មុនពេលដែលចោរ អាចទម្លាយចូលប្រើទូរស័ព្ទ ដើម្បីលួចយកព័ត៌មានសំខាន់របស់អ្នកប្រើ។
ដោយ៖ រឹទ្ធិរាជ
ប្រភព៖ malwarebytes
