ចិននឹងក្លាយជាមហាអំណាចសេដ្ឋកិច្ចផុតលេខ វ៉ាដាច់អាមេរិកក្នុងឆ្នាំ ២០២៤ខាងមុខ
យោងតាមទិន្នន័យចេញផ្សាយរបស់ធនាគារពិភពលោក (World Bank) និង មូលនិធិរូបិយវត្ថុអន្តរជាតិ (IMF) បានឲ្យដឹងថា ចិននឹងក្លាយជាមហាអំណាចសេដ្ឋកិច្ចធំជាងគេនៅលើពិភពលោកក្នុងឆ្នាំ ២០២៤ ខាងមុខ។ ក្នុងរយៈពេលដូចគ្នានេះ បណ្តាប្រទេសមកពីតំបន់អាស៊ីចំនួន ៥ ត្រូវបានគេរំពឹងថា នឹងជាប់ឈ្មោះក្លាយមហាអំណាចសេដ្ឋកិច្ចពិភពលោកនៅក្នុងចំណោមមហាអំណាចសេដ្ឋកិច្ចកំពូលៗទាំង ១០។
សេដ្ឋកិច្ចចិនត្រូវបានគេមើលឃើញថា មានកំណើនលូតលាស់បោះពួយទៅមុខយ៉ាងលឿនចាប់តាំងពីទសវត្ស ៩០មក ខណៈដែលឥណ្ឌា និងឥណ្ឌូណេស៊ីកំពុងបោះជំហានបន្តិចម្តងៗចូលក្នុងបញ្ជីមហាអំណាចសេដ្ឋកិច្ចធំជាងគេបំផុតទាំង ១០ របស់ពិភពលោក ហើយត្រូវបានគេរំពឹងថា ប្រទេសទាំងពីរនេះនឹងបន្តឡើងចំណាត់ថ្នាក់ទី ៣ និងទី ៥ នៅត្រឹម ៤ឆ្នាំខាងមុខប៉ុណ្ណោះ។ ចំណែកជប៉ុនវិញ ដែលកំពុងឈរនៅលេខរៀងទី ៣នៅពេលបច្ចុប្បន្ននេះ ត្រូវបានគេរំពឹងថា នឹងធ្លាក់ទៅលេខ ៤វិញនៅក្នុងរយៈពេលដូចគ្នានេះ ខណៈដែលរុស្សី នឹងឡើងមកលេខរៀងទី ៦ ពីចំណាត់ថ្នាក់ទី ១១ នៅក្នុងឆ្នាំ ២០២០នេះ។
ការកើនឡើងនៃប្រជាជនវណ្ណៈកណ្ដាល គឺជាហេតុផលដ៏ធំមួយដែលធ្វើឲ្យតំបន់អាស៊ីហក់យ៉ាងលឿនក្ដោបក្ដាប់សេដ្ឋកិច្ចពិភពលោកនៅពេលខាងមុខ។ ខណៈដែលចិនមានកំណើនយុវជនវ័យក្មេងខ្ពស់នៅដើមសតវត្សទី ២១នេះ គេរំពឹងថា មហាយក្សអាស៊ីមួយនេះនឹងប្រឈមមុខទៅនឹងប្រជាជនចាស់ជរាដែលអាចប៉ះពាល់ដល់សង្វាក់ផ្គត់ផ្គង់នៅពេលខាងមុខ។ ចំណែកឥណ្ឌូណេស៊ី ហ្វីលីពីន និងម៉ាឡេស៊ីវិញ ត្រូវបានគេរំពឹងថា នឹងមានកំណើនកម្លាំងពលកម្មខ្ពស់គួរឲ្យកត់សម្គាល់នៅក្នុងរយៈពេលប៉ុន្មានឆ្នាំទៀតនេះដែលរួមចំណែកធ្វើឲ្យខ្លួនអាចចាកចេញពីប្រទេសដែលមានប្រាក់ចំណូលកម្រិតមធ្យម។ នេះបើយោងតាមការចេញផ្សាយរបស់ World Economic Forum។
ក្រុមហ៊ុនធំៗមកពីបណ្តាប្រទេសក្នុងតំបន់អាស៊ីដូចជា ក្រុមហ៊ុន Huawei និងTataឥណ្ឌាបានបង្ហាញសក្ដានុពលរបស់ខ្លួនរួចទៅហើយនៅសតវត្សនេះ ហើយគេរំពឹងថា នឹងមានក្រុមហ៊ុនធំៗជាច្រើននឹងបង្ហាញខ្លួននៅលើទីផ្សារសេដ្ឋកិច្ចពិភពលោកនៅពេលឆាប់ៗខាងមុខ។ ក៏ប៉ុន្តែកំណើនយ៉ាងឆាប់រហ័សនៅក្នុងទ្វីបអាស៊ីក៏បណ្ដាលឲ្យកើតមាននូវបញ្ហារបស់ខ្លួនដែរដូចជាការបែងចែកយ៉ាងលឿនរវាងប្រាក់ចំណូលនៅជនបទ និងទីក្រុង ការសឹករិចរិលនៃបរិស្ថាននិងបញ្ហាប្រឈមថ្មីៗសម្រាប់អភិបាលកិច្ច និងស្ថាប័នផ្សេងៗ៕
ដោយ៖ ខេវិន
ប្រភព៖ statista
