ថ្ងៃនេះ​យើង​បាន​ចងក្រង​នូវ​សម្ដី​ដកស្រង់​ចំនួន ​៨ឃ្លា របស់​អ្នក​និពន្ធ​បទភ្លេង​ដ៏​ល្បីល្បាញ​មួយ​រូប​របស់​ចក្រភព​រ៉ូមាំុង​នា​សម័យកាល​តន្ត្រី​ក្លាហ្សិក (The Classical Period) គឺលោក Wolfgang Amadeus Mozart:

១) «ខ្ញុំ​មិន​ចាប់​អារម្មណ៍​ទៅលើ​ការ​សរសើរ​ឬ​ក៏​ស្ដីបន្ទោស​របស់​នរណា​ម្នាក់​នោះ​ឡើយ។ ខ្ញុំ​គ្រាន់តែ​ដើរតាម​អារម្មណ៍​របស់​ខ្លួនឯង​ប៉ុណ្ណោះ។»

២) «មិនមែន​ជា​ប្រាជ្ញា​វៃឆ្លាត​នៅក្នុង​កម្រិត​ដ៏​ខ្ពស់​ឬ​ក៏​ជា​ការ​ស្រមើស្រមៃ​ឬ​ទាំងពីរ​នេះ​ទៅ​ជាមួយ​គ្នា​នោះ​ឡើយ ដែល​បង្កើត​ឲ្យ​មាន​បញ្ញវ័ន្ត​នោះ។ ក្ដី​ស្រឡាញ់ ក្ដី​ស្រឡាញ់ ក្ដី​ស្រឡាញ់ នេះ​ហើយ​ទើប​ជា​វិញ្ញាណ​របស់​បញ្ញវ័ន្ត។»

៣) «នៅ​ពេល​ខ្ញុំ​ធ្វើដំណើរ​នៅ​ក្នុង​រទេះសេះ ឬ​ដើរ​ស្រូប​យក​ខ្យល់​អាកាស​ក្រោយ​ពី​ទទួលទាន​អាហារ​ដ៏​ឆ្ញាញ់​មួយ​ពេល​រួច ឬ​នៅ​ពេល​យប់​ពេល​ដែល​ខ្ញុំ​គេង​មិន​លក់ គឺ​នៅ​ខណៈពេល​បែប​នោះ​ឯង​ដែល​គំនិត​ហូរ​បាន​យ៉ាង​ល្អ​បំផុត​និង​សម្បូរ​ហូរហៀរ​បំផុត។»

៤) «តន្ត្រី​មិនមែន​នៅ​ក្នុង​ណោត​ភ្លេង​នោះ​ទេ ប៉ុន្តែ​នៅ​ក្នុង​ភាព​ស្ងប់ស្ងាត់​ដែល​នៅ​ចន្លោះ​នោះ។»

៥) «ភាព​ស្ងប់ស្ងាត់​ពិត​ជា​សំខាន់​ណាស់។ ភាព​ស្ងប់ស្ងាត់​នៅ​ចន្លោះ​ណោតភ្លេង​គឺ​សំខាន់​ស្មើនឹង​ណោត​ភ្លេង​ដែរ។»

៦) «សេចក្ដី​អត់ធ្មត់​និង​ភាព​ស្ងប់ស្ងាត់​នៃ​ចិត្ត​រួម​ចំណែក​ដល់​ការ​ព្យាបាល​ជំងឺ​របស់​យើង​ច្រើន​ជាង​សិល្បៈ​នៃ​ការ​ព្យាបាល​តាម​បែប​វេជ្ជសាស្ត្រ​ទាំងមូល​ទៅ​ទៀត។»

៧) «ចំពោះ​សេចក្ដីស្លាប់ នៅ​ពេល​ដែល​យើង​យក​វា​មក​ពិចារណា​ឲ្យ​បាន​ដិតដល់ គឺជា​គោលដៅ​ពិត​ប្រាកដ​នៃ​អត្ថិភាព​របស់​យើង។»

៨) «បើ​មនុស្ស​អាច​មើលឃើញ​ដល់​បេះដូង​របស់​ខ្ញុំ​បាន ខ្ញុំ​អាច​នឹង​ស្ទើរតែ​មាន​អារម្មណ៍​ថា​ខ្មាសអៀន។ នៅ​ទីនោះ​ទាំងអស់​គឺ​សុទ្ធតែ​ត្រជាក់ ត្រជាក់​ប្រៀប​បាន​នឹង​ទឹកកក។»

ដោយ៖ ស្រីពៅ

អត្ថបទទាក់ទង៖ ទស្សន​ចំនួន​១០​ឃ្លា​របស់​លោក Deepak Chopra ​ដែលជាអ្នក​និពន្ធ​សញ្ជាតិ​ឥណ្ឌា​អាមេរិក